E ta’i 28 masina lea ua fa’asala ai e le fa’amasinoga maualuga i le toese i Tafuna le Pule o le fale kalapuo le Karaoke Bar ma lona fesoasoani i le vaiaso na te’a nei, ina ua ta’usala i laua e se vaega iloilo iuga i le masina o Oketopa na te’a nei, i le moliaga mamafa e tasi o le la fesoasoani lea e fa’alauiloa faiga fa’atalitane, atoa ai ma moliaga mama o le fa’ao’olima i le tulaga tolu.

O le fa’asalaga fa’a falepuipui ua tu’uina atu mo Fa’asaina Park ma lona fesoasoani ia Lusia Tusi, o ni isi ia o tu’utu’uga o le la nofova’ava’aia e ta’i 7 tausaga.

Na fa’atoese ma loimata ia Park i le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia, se’i fa’aauau ai pea ona mafuta i lona aiga, fanau ma lona tina.

Sa ia fa’atoese fo’i i le fa’amasinoga, malo o Amerika Samoa atoa ai ma ona tagatanu’u, ina ia fa’amagalo o ia e tusa ai o lana solitulafono sa fai, e ui e le i fa’atoese o ia i tama’ita’i e to’alua sa a’afia i lenei mataupu.

E tele itu lelei na fa’ailoa e le ali’i loia ia Fiti Sunia mo Park, e ono fesoasoania i se fa’asalaga a le fa’amasinoga e tu’uina mai mo lana mataupu, o ni isi o ia itu lelei e aofia ai le avea o Park o se tagata faipisinisi manuia i le atunu’u, ua tele fo’i tausaga o avea o ia ma se tasi o tagata faipisinisi o lo o fesoasoani malosi i le atina’e o le atunu’u

Mai le tele o tausaga o avea Park o se tina faipisinisi, e leai ma se solitulafono na ta’usala muamua ai o ia e pei ona taua e Sunia i lana fa’afinauga.

Na finau Sunia ina ia fa’anofovaavaaia Park, ia poloaina fo’i o ia na te totogi le salatupe e $5,000 ae aua ne’i tu’uina atu se fa’asalaga fa’a falepuipui ia te ia, ina ia mafai ai pea ona fa’aauau lana tautua i lana pisinisi o lo o tautua ai le atunu’u.

Ae afai e manatu le fa’amasinoga e fa’asala Park i le falepuipui, na talosaga Sunia ina ia lava aso e 90 e loka ai o ia, ona e 3 ni pisinisi o lo o ia fa’atautaia, e mana’omia fo’i lona auai i le fa’atautaia o ana pisinisi ia.

Ina ua maua le avanoa o Tusi e fa’atoese ai i le fa’amasinoga, e le gata sa ia fa’atoese i le atunu’u ma le malo e tusa ai o lana solitulafono sa fai, ae sa ia talosagaina fo’i se avanoa e fa’aauau ai pea ona mafuta i lana fanau ma si ona uso, ona ua maliliu uma o la matua.

Na taua e le ali’i loia fautua ia Joel Shiver na tula’i mo Tusi e fa’apea, o le ua molia, o se tina ua 55 tausaga o lona soifua sa galue malosi mo le atina’eina o lona aiga i le tele o tausaga ua mavae, e le i fa’atasi fo’i ona a’afia o ia i se solitulafono.

Na finau Shiver i le fa’amasinoga ina ia fa’anofovaavaaia Tusi ae aua ne’i tu’uina atu ia te ia se fa’asalaga fa’a falepuipui, ina ia fa’aauau ai pea ona latou mafuta ma si ana fanau e pei ona ia talosagaina.

Na muamua lava osofa’i e le loia a le malo ia Jessica Bargman, le leai o se taimi na fa’atoese ai Park ma Tusi i tama’ita’i mai Samoa e to’alua sa a’afia i le gaioiga, ua mafua ai ona ta’usala i laua i luma o le fa’amasinoga.

Na taua e Bargman e fa’apea, e ui o lea ua taoto le fa’aiuga a le vaega iloilo iuga e ta’usala ai Park ma Tusi, ae sa la fa’ailoa i le ofisa nofovaavaaia le tumau pea o le la tete’e i tu’uaiga fa’asaga ia te ia.

O se tasi o itu matuia na taua e le loia a le malo e uiga i lenei mataupu, o le aumai lea o tama’ita’i mai atunu’u e galulue i totonu o le teritori, ma i’u ina a’afia ai i latou i amioga fa’atalitane fa’apenei.

Na taua fo’i e le itu a le malo e fa’apea, o se tasi o itu matuia sa maitauina i lenei mataupu, e le gata na aumai e Park tama’ita’i mai Samoa e galulue i lana pisinisi, ae sa ia faapologa i laua, pule malosi ia te i laua, toe fa’a faigaluega i laua mo aso e fitu o le vaiaso e aunoa ma le totogiia o i laua i totogi talafeagai.

E le gata na finau le loia a le malo ina ia fa’asala i laua nei i le fa’asalaga pito sili ona maualuga o lo o fa’atulaga mai e le tulafono, ae sa ia taua fo’i e fa’apea, o le mataupu e pei ona ta’usala ai Park ma Tusi ua leva tele tausaga o tula’i mai a o lea fa’atoa ta’usala ai i laua.

Na fa’ailoa fo’i e Bargman i le fa’amasinoga, e ui o lea ua ta’usala Park i le moliaga mamafa o lona taumafai lea e fa’alauiloa faiga fa’atalitane, ae oo mai lava i le taimi nei o lo o tatala pea lava lana pisinisi na tula’i mai ai faiga fa’asolitulafono na a’afia ai tama’ita’i mai Upolu.

A o le i tu’uina atu le fa’asalaga a Park ma Tusi, na fesili le afioga i le fa’amasino sili ia Michael Kruse i le mafua’aga e ala ai ona faigofie ona aumai tama’ita’i mai fafo latou te fa’atinoina galuega i totonu o fale kalapu, a o lea lava e maua i latou i totonu o le atunu’u e fa’atinoina ituaiga galuega nei.

Saunoa Kruse e fa’apea, afai e le lelei ona mata’itu ma fa’amalosi tulafono a le Ofisa o Femalagaaiga, o le a fa’aauau pea ona tutupu fa’afitauli fa’apenei i le atunu’u, e le iloa fo’i po o i ai ni isi pisinisi fa’apenei i isi tulimanu o le atunu’u ae le o mafai ona iloa atu.

E le o se taimi muamua lenei ua taulimaina ai e le fa’amasinoga ni mataupu fa’apenei, e pei ona saunoa Kruse.

Saunoa Kruse e fa’apea, o le mataupu muamua na taulimaina e le fa’amasinoga i ni tausaga ua mavae, sa fa’atatau i faiga fa’atalitane e maua ai tupe, peita’i o le mataupu lea ua ta’usala ai Park ma Tusi, o le unaia lea o tama’ita’i e fa’atino faiga fa’atalitane.

E ui e ta’i 28 masina lea ua fa’asala ai e le fa’amasinoga Park ma Tusi e taofia i le toese, peita’i o le a mafai ona iloilo e le fa’amasinoga se talosaga e tatala ai i laua i tua e faigaluega, pe a mae’a ona la tuliina ulua’i masina ta’i 6 o le la fa’asalaga fa’a falepuipui lea ua amata tuliina nei.