O le tama’ita’i e 18 tausaga le matua lea na maua i ai e leoleo vaega o le pauta fa’asaina o le ‘aisa (methamphetamine) i le masina o Oketopa o le tausaga na te’a nei, ua fa’asala e le fa’amasinoga e taofia i le falepuipui mo le umi e 20 masina, o se tasi lea o tu’utu’uga o lana nofova’ava’aia e 5 tausaga.

E tolu moliaga mamafa na ulua’i tu’uaia ai e le malo ia Elsarina Lefatia, o ia moliaga e aofia moliaga e lua o le umia fa’asolitulafono o vaega o fualaau fa’asaina ma le fa’amoemoe e tulei ma fa’atau atu i isi tagata, ma le moliaga o le umia fa’asolitulafono o vaega o fualaau fa’asaina.

Sa tu’uaia fo’i o ia i le moliaga mama o le i ai lea o se apa pia sa matala i totonu o le ta’avale i le taimi na taofia ai e leoleo lana ta’avale. (O le loia a Lefatia sa ia faailoa i le faamasinoga e 18 tausaga o le ua molia.)

Ae i lalo o se maliliega na sainia e Lefatia ma le malo lea fo’i na talia e le fa’amasinoga, na ia tali ioe ai i le moliaga lea na toe teuteu e le malo, ina ia fa’ailoa ai le moliaga o lona umia fa’asolitulafono o vaega o le pauta fa’asaina o le aisa.

Saunoa le afioga i le fa’amasino sili ia Michael Kruse e fa’apea, na mafua ona taofia e leoleo le ua molia, ina ua maua atu o ia o lo o ia fa’aaoga se vaega o le auala tele a le malo o se fale mamao (bathroom), ma fai ai loa a latou tuliga ma ta’avale a leoleo i se saoasaoa uiga ese, ma i’u ina taofia ai loa lana ta’avale, lea na saili ma maua i ai fualaau fa’asaina e pei ona ta’usala ai o ia e le fa’amasinoga.

E ese mai i fualaau fa’asaina sa maua e leoelo ia Lefatia, sa fa’apea fo’i ona maua i ai paipa e ula ai le aisa, straw ua tipi fa’amaai tulimanu, atoa ai ma se tinoitupe e $4,900.

A o le i tu’uina atu le fa’asalaga a le fa’amasinoga e tusa ai o lenei mataupu, na fa’atoese le ua molia e tusa ai o lana solitulafono, ma ia talosagaina ai se isi avanoa o ia.

E le gata na ia fa’atoese i le fa’amasinoga ma le malo o Amerika Samoa e tusa ai o le matuia o lana solitulafono sa fai, ae sa ia fa’atoese fo’i i ona matua ina ia fa’amagalo o ia i lona le usita’i ma lona le fa’alogo.

A o le i fa’ailoa e le loia a Lefatia ia Douglas Fiaui ni isi o itu lelei e ono fa’amama ai se fa’asalaga mo le ua molia, sa ia finauina se vaega o le ripoti a le Ofisa Nofova’ava’aia, lea o lo o fa’apea mai ai, sa fa’ailoa e Lefatia i leoleo i le taimi na taofia ai o ia, o ia na te fa’atauina atu aisa i isi tagata.

Na taua e Fiaui e fa’apea, e le gata e le i faia se tala fa’apea a Lefatia i leoleo, ae le o i ai fo’i se vaega fa’apea i totonu o le ripoti a leoleo, peita’i na fa’ailoa e Kruse ia Fiaui, o lo o i totonu o le ripoti a leoleo le ta’utino o Lefatia i le taimi na pu’e fa’apagota ai o ia, na te fa’atauina atu aisa i isi tagata.

Na fa’ai’u le fa’afinauga a Fiaui i lona talosagaina lea o se fa’asalaga fa’anofovaavaaia o le ua molia, o ia o se tama’ita’i e talavou tele lona olaga.

Na talosaga le loia a le malo ia Russel Smith i le fa’amasinoga, ua lava masina e 12 e taofia ai Lefatia i le toese, ma ia poloaina o ia e auai i ni aoaoga e fesoasoani ai i a’afiaga o le ‘ava malosi ma fualaau fa’asaina o lo o a’afia ai lona olaga.

Na taua e Smith i lana fa’afinauga e fa’apea, o Lefatia, o se tama’ita’i e matua talavou lava, ae foliga mai e sese le auala lea ua aga’i i ai lona olaga.

Na fa’ailoa e Kruse ia Lefatia, e tasi lava le itu lelei ua silasila i ai le fa’amasinoga mo ia, o le talavou lea o lona olaga.

O isi tuutuuga o le nofova’ava’aia a le ua molia e aofia ai lona totogi o le salatupe e $5,000, aua ne’i toe soli tulafono, fa’asa fo’i ona ia toe tagofia fualaau faasaina po o le ava malosi.