[E toe fa’atalofa atu i paaga masani a le tatou polokalame i lenei vaiaso, malo le soifua manuia, ae o le toe soso’oina atu lea o le tatou polokalame fa’asolo, lea na gata mai i le vaiaso na te’a nei i le taimi lea ua talanoa atu ai le tamaititi o Koso i lana uo o Kei e tusa ai o le manaoga a lona tina.]

 “Se vaai oe Koso la’u uo, aua le avea le Se ma mea mamafa i lou mafaufau, ua leva ga ou iloaiga le kulaga lega eke kalagoa mai ai, oga o faukuaga fo’i ga a o’u makua ia ke a’u e fa’akakau i le va o a’u ma o’u kuafafige e ko’alua o lo o i lo makou aiga, ae aua le avea gei mea fa’akauva’a ma iku eke magaku ai ua i ai se pa pupugi i lo ka va”, o le tali atu lea a le alii o Keli i le talatalanoa atu asi ana uo. O masaniga a tupulaga o le nu’u o Amouta, e malama ane le taeao ua leva ona i uta i fanua galue le aumaga mo le tapenaina mai o feau masani o le aso e pei o fafie, popo faapea ai ma sina meamata mo le tausiga a le aiga i le afiafi, ae o le afiafi e tumu tumu ai i le malae kirikiti mo ta’aloga masani.

Na taunu’u lava Koso ma Keli ma la avega i tai i le aai, ona fai loa lea o le la tonu, o le a o e ave a la avega i o la aiga ma fai sina koma ma tapena le meaai a le tagata latou ia mo le afiafi, ona la fetaui ai loa lea i le malae kirikiti i le afiafi. O le aga’i atu o Keli i lona fale lea e tu i le isi itu o le nu’u ae fa’afeia ina ua valaau atu se tagata i lona leo, ae na segia le mauli o le tama ina ua fa’asaga mai i tua i lona fia iloa po o ai lea e valaau atu i lona igoa, ae tau atu ai lana vaai i le tama’ita’i o Silia o le tuafafine a lana uo o Koso. E ui i le mamafa o le avega a Keli o lo o amo, ae na manatu e tu pea ma amo ae se’i fa’atali le tausala lea ua valaau atu i lona igoa pe i ai se feau taua o lo o mana’o i ai.

“Se tu’u i lalo lau amoga ma le mamafa”, o le valaau mamao atu lea a le tama’ita’i o Silia ia Keli lea o lo o tu mai i le isi tulimanu o le auala, a o lea fa’atoa savali ese atu le tama’ita’i mai le faleoloa sa fai ai lana fa’atau, o apa pilikaki e lua, ga’o ma le aniani, o mea e fai ai le meaai o le afiafi.

“A o fea Koso lea na lua o i uta?”, o le fesili atu lea a Silia ina ua latalata atu i le vaega tonu o lo o tu mai ai Keli, “O le la ua alu atu i le fale e tu’u lana amoga ma tapena lana saka o le afiafi, ona fa’ai’u fo’i lea i le malae kirikiti se’i ta sina polo e fa’alusilusi ai tauau ua alu fo’i le aso galue latou ia”, o le tali atu lea a Keli i le fesili a Silia ma punou ifo loa i lalo ua fa’atafa lana amoga i le isi itu o le auala, ae ua aapa tu lona lima ma aumai le afa faguinu lea ua tu’u atu e Silia ia te ia, ma avau loa le fale talatala a le to’alua lea, ma fai ai loa le tonu, o le a toe fa’aauau talanoaga o le afiafi i le malae kirikiti pe a o o i taimi o taaloga a le aumaga.

E fo’i ua Keli i le fale i le aso lea, ae ua fa’atalatala i lona mafaufau le la tuutuuga ma Siia la te toe fetaui i le malae kirikiti, pau le itu lea ua tau popole ai lona mafaufau, ina ne’i avea le la talanoaga ma Silia lea ua fuafua i le afiafi ma itu e manu’a ai le loto o lana uo o Koso, pe afai na te vaaia i laua i le malae kirikiti i le afiafi lea, ui o lea, ua manatu ane lava le tamaititi o Keli, afai o se auala lelei lea mo ia e talanoa atu ai i le tausala, lona uiga, o le a avea ai fo’i ma itu e tauaso atu ai ma le alofa i le la mafutaga ma si ana uo o Koso.