Ads by Google Ads by Google

Fasi ‘molimau’ ina ua sosola ma inupia i luga va’a fagota

Na taua e le tama’ita’i pule o le Karaoke Bar ia Fa’asaina Park i se vaega o lana fa’amatalaga tusitusia sa tu’uina atu i leoleo i le aso 20 Aperila 2013, na mafua ona ia fasia tama’ita’i e to’alua lea o lo o avea ma “molimau autu” a le malo i lana fa’amasinoga autu lea o lo o fa’agasolo i le taimi nei, ona ua sosola ma pati (party) ma la ‘ta’ito’alua’ i luga o le va’a fagota e aunoa ma sona iloa.

 

E to’alua leoleo na fesiligia e le malo atoa ai ma le itu tete’e i le aso lona fa talu ona fa’agasolo le fa’amasinoga autu i le va o le malo ma Park, fa’apea ai Lusia Tusi po o Sheila e pei ona iloa ai o ia e le to’atele o tagata.

 

O le isi tama’ita’i leoleo na ia fa’atalatalanoaina Park ae o le isi sa ia fa’atalatalanoaina tama’ita’i e to’alua na a’afia, le tama’ita’i o “I.M” ma “M.W”, o tama’ita’i uma mai Samoa na sponsor mai e Park e galulue i lana pisinisi.

 

Na taua e le tama’ita’i leoleo ia Samantha Lam Yuen, o ia na fesiligiaina ia Park i le aoauli o le aso 20 Aperila 2013, e tusa ai o le fa’alavelave na tula’i mai i le po na tuana’i, ma maua ai loa le avanoa e fa’amatala atu ai e Park ia te ia le mea atoa sa tupu, atoa ai ma le mafua’aga na ia fasia ai tama’ita’i e to’alua na a’afia.

 

Na taua e Park i le tama’ita’i leoleo na fesiligiaina o ia e fa’apea, o tama’ita’i e to’alua na a’afia, o ona “nieces”, na ia aumaia mai Samoa e galulue i lana pisinisi, o lona tiute fo’i, ia mautinoa e saogalemu i laua i taimi uma, e tatau fo’i ona usita’i ia te ia, ma ia ona iloa so o se mea e o aga’i i ai.

 

Na taua e Park i lana fa’amatalaga sa tu’uina atu i leoleo, lea fo’i na fa’aliliu e le fa’aliliu upu a le fa’amasinoga i luma o le vaega iloilo iuga e fa’apea, o le po lea na tula’i mai ai le fa’alavelave, sa ia fa’atonuina ai “M.W” e alu i le fale ua tapuni le fale kalapu, ae na finau atu “M.W” ia te ia, e fia o ma “I.M” e pati ma la uo i luga o le va’a fagota, peita’i sa ia fai i ai e leai, ae sa finau atu pea “M.W” ia te ia ina ia o ma “I.M” i luga o le va’a fagota.

 

Na fa’atonu e Park ia “M.W” e nofo i lalo ae sei la talanoa, peita’i sa musu o ia, ona toe fa’atonu fa’atolu lea e Park ia “M.W” e nofo i lalo ae sa atili ai ona tete’e ma tali mai, o ia ua fia alu i Upolu, ona fai lea i ai o Park, e onosa’i se’i aulia le aso e sosoo ai ona sauni lea e alu i Upolu.

 

Na taua e Park i lana fa’amatalaga sa tuuina atu i leoleo e fa’apea, na avea le le usita’i o “M.W” ia te ia, atoa ai ma lona lafo atu o upu mamafa ma palau vale atu ia te ia ma itu na ia poina ai loa “M.W” fa’apea ai ma “I.M”.

 

Na taua fo’i e Park e fa’apea, ina ua latou talanoa ma matua o tama’ita’i ia e to’alua, sa latou talanoa atu ai ia te ia, so o se taimi e le usita’i ai tama’ita’i ia e to’alua ia te ia, ia sasa ma fa’atonu.

 

Sa ia taua fo’i e fa’apea, o le taimi lava na moe ai, o le taimi fo’i lea na o ai tama’ita’i ia i luga o le va’a ma pati ai ma a la uo, ma o iina na mafua ai ona oso lona popole, ina ne’i tula’i mai fa’alavelave ia te i laua i luga o le va’a, ae na te le i fa’atonuina i laua e o ma nei tamaloloa i luga o le va’a.

 

E le o se taimi muamua lea ua sosola ai “M.W” ma “I.M” e pati ma la uo i luga o va’a fagota, e pei ona taua e Park i lana fa’amatalaga tusitusia, ae ua fa’atele ona la o e aunoa ma se fa’atanaga, ae a fa’atonu atu e soia, ae fai mai e leai se feau a Park ia te i laua.

 

Na manino i le faamatalaga a Park sa tuuina atu i leoleo, na te le i faatagaina tamaitai e to’alua o lo o aafia e o ma ni tamaloloa, po o le faia foi o ni gaioiga faapena i taimi o a latou inuga pia, ae tatau ona lava se la malologa mo galuega o le aso e sosoo ai.

 

E tasi lava le fesili a le loia a Sheila o Joel Shiver na fesiligia ai le tama’ita’i leoleo ia Lam Yuen, o lona fesiligia lea o le molimau a Park, pe sa i ai se taimi na taua ai e Park le a’afia atu ai o Sheila i gaioiga uma e pei ona tu’uaia ai o ia e le malo, na tali le tama’ita’i leoleo, “e leai”.

 

Na taua e le tama’ita’i leoleo ia Maria Penitusi lea na ia fesiligia tama’ita’i e to’alua na a’afia, sa ia vaaia unaoa ma maosia i foliga ma le papatua o “M.W” i le taimi na latou talatalanoa ai e tusa o le mea sa tupu.

 

Ina ua fesiligia e le leoleo le molimau i le mafua’aga o maosia ma unaia o lo o vaaia i lona tino, sa ia taua ai, o maosia ma unaoa ma mafua mai ina ua fasi o ia e Park.

 

O le taeao nei lea ua faamoemoe e toe fa’aauau ai taualumaga o lenei mataupu i luma o le afioga i le ali’i fa’amasino sili ia Michael Kruse, atoa ai ma ali’i fa’amasino lagolago ia Fa’amausili Pomele ma Lili’o Satele.