Ads by Google Ads by Google

Fasi se ulugali’i Kolea ae gaoi oloa mai i totonu o le faleoloa

E to’atasi le ali’i ua taofia nei e leoleo i le toese i Tafuna, ona o le fa’alavelave lea na la talepeina ai ma se isi ali’i se faleoloa i Kokoland i le masina o Me ua mavae atu, ae gaoi oloa ma tupe mai totonu o le faleoloa toe fasi ma le ulugali’i Kolea e ana le faleoloa.

O le ali’i e to’atasi ua taofia nei e leoleo o Don Bernard, lea ua molia i moliaga o le faomea i le tulaga muamua; gaoi; fa’ao’olima i le tulaga tolu atoa ai ma le faaleagaina o meatotino i le tulaga muamua, ae o lo o tau sailia pea e le o leoleo le isi ali’i o lo o masalomia sa to’alua ma Bernard i le taimi o le osofaiga.

I faamaumauga a le faamasinoga o lo o taua ai e faapea, o le po o le aso 30 o Me, 2013 na valaau ai ni isi i le Ofisa o Leoleo i Tafuna ona o le faleoloa a se ulugalii Kolea, i Kokoland, ua talepe e ni isi ma fasi le ulugalii.

Na faamatala e le ulugalii e ana le faleoloa o le Lee’s Enterprises, e toalua ni alii na osofaia lo la faleoloa ma gaoia ai ni katuni sikaleti e 12, pepa fai telefono e tusa ma le $350 le tau, ma siliva e tusa ma le $30 le aofa’i, sa i totonu o se pepa.

Na ta’ua e le ulugalii na aafia i leoleo e faapea, na faateia i laua a’o la momoe i le pisa ma pa’o o ni tagata i fafo o le faleoloa, ae ki atu le moli o lo o i totonu o le faleoloa ae la vaaia loa le isi ali’i ua ia tu’i le faitoto’a o le faleoloa i se ma’a ma nuti ai, ma la ulufale faamalosi atu ai i totonu o le faleoloa.  Na ta’ua e le ulugalii lo la fe’ei ma valaau mo se fesoasoani.

Sa faamatala e le ulugalii i leoleo e faapea, o se tasi o nei alii e maualuga toe lapo’a, ae o leisi e puupuu ae sa fusi uma o la foliga i mitiafu.

Na ta e le tamaloa Kolea le isi alii ia i se laau, peitai na mafai ona se’i ese mai le lima o le tamaloa Kolea, ona ia taumafai lea e titina lona ua ma una’i i tafatafa o le pusaaisa, ae o le isi ali’i na aga’i i le itu sa tamo’e aga’i i ai le fafine Kolea e pei ona taua i faamaumauga a le faamasinoga.

Na taua e le fafine Kolea i leoleo e faapea, ina ua ulufale faamalosi alii e toalua i totonu o le faleoloa, sa ia vaaia ai le ali’i puupuu ua aga’i atu i le vaega o lo o i ai o ia, peitai sa ia oso i fafo mai le fa’amalama o le fale ma maua ai lona avanoa e sola ese ai, ma ia vaaia ai se taavale o pasi ane i luma o le auala, o lea na ia ee atu i ai mo se fesoasoani peita’i sa alu lava le ta’avale e le’i atu atu ia te ia.

Na toe maua e le alii puupuu o ia ma toe toso faatata lona ulu i totonu o le fale, ona ia faaoolima lea ia te ia e ala i lona ta kikiina o lona mavana ma ona vae a’o ta’atia i totonu o le faleoloa.

Na taua e le fafine Kolea i leoleo e faapea, a’o fasi e le tagata puupuu o ia, sa faafuase’i ona ta’u e le tagata lea lona igoa ma fai atu ia te ia e tape le moli, o iina na ia faalogoina ai e masani o ia i le leo o le tagata lea.

Na toso ese e le tagata puupuu le mitiafu o lo o ufi ai ona mata ma ia iloa atu ai ona foliga, ona ia valaau lea o lona igoa ‘Don’ ma faamolemole atu i ai e aua le fasia laua ma lona to’alua, ona ia vaaia lea o “Don” ua savali atu ma ave katuni sikaleti mai luga o le fata o le faleoloa ma valaau i lana uo na la to’alua la te o ese loa ma le fale.

A’o taumafai leoleo e saili nei alii na mafai ona faailoa e ni molimau i leoleo ni faamatalaga e feso’ota’i ma le faalavelave sa tupu i le po e pei ona taua, ma mafua ai loa ona fesiligia e leoleo ia Bernard ma lana uo lea lava e le’i toe maua.

Na faamaonia e le uo a Bernard i leoleo mea uma sa tutupu i le po o le faalavelave, e aofia ai le fusi o la foliga ma Bernard ma la aga’i atu loa ma osofa’i le faleoloa faatasi ai ma le ulugalii, ae gaoi ni isi o oloa mai totonu e aofia ai sikaleti ma pepa fai telefoni.

Sa ia faailoa fo’i i leoleo e faapea, o lona ‘ona tele i lea po na mafua ai ona faaosofia o ia e faatino le gaioiga sa la faia ma Bernard.

E silia ma le $100 le tau aofa’i o oloa sa gaoia i le po na tulai mai ai le faalavelave, ma meatotino sa faaleagaina e tusa lona tau ma le $1,120 e pei ona taua i faamaumauga a le faamasinoga.

O lo o taofia pea i le toese i Tafuna le ali’i o Bernard ina ua le mafai ona ia totogiina le $20,000 na faatulaga e tatala ai o ia, e faatalitali ai lana ulua’i iloiloga lea ua faamoemoe e faia i luma o le faamasinoga maualuga i le masina fou o Iulai.