Ua fautuaina e le afioga i le ali’i senatoa ia Galea’i M. Tu’ufuli le maota maualuga i le vaiaso na te’a nei, ina ia aveese mai le paketi a le malo mo le tausaga tupe fou 2016, vaega tupe uma ua fuafua le malo e fa’aopoopo i totogi o ana tagata faigaluega (increment), pe afai o loo i ai se fuafuaga a le malo e na o le fa’ailoa mai o nei vaega tupe i totonu o le paketi, ae le o i ai se fuafuaga e totogi atu ia tupe i tagata faigaluega.

O lea fautuaga mai ia Galeai, na tu’uina atu lea i le taimi o folafolaga a le maota maualuga i le aso Faraile na te’a nei, ina ua felafoa’i afioga i Senatoa mo a latou fautuaga e fa’atatau i le paketi.

Saunoa Galea’i e fa’apea, e foliga mai e le o malamalama lava Ofisa o le malo i le tulafono e fa’atatau i tupe fa’aopoopo i totogi o tagata faigaluega, pe a fuafua i le auala lea ua fa’ailoa e molimau o lo o fa’aaoga i ai tupe sa fa’aagaga e fa’aopoopo i totogi o tagata faigaluega.

“O lo o manino le tulafono, o tupe ia sa pasia atu e le malo e fa’aopoopo i luga o totogi o tagata faigaluega a le malo, o tupe ia e tatau lava ona totogi e le malo, ae foliga mai e ese le auala o lo o fa’aaoga i ai e le malo tupe ia,”o le saunoaga lea a Galea’i i luma o le maota o sui.

Na fa’ailoa e Galea’i e fa’apea, afai sa manino le fa’afofoga a le Komiti Soofaatasi e le Fono i molimau a sui o le malo i le vaiaso na te’a nei, sa latou taua ai le fa’aaoga e le malo o tupe sa pasia e faaopoopo i totogi o tagata faigaluega a le malo i le tausaga tupe 2014 ma le 2015, e fa’a faigaluega ai tagata faigaluega fou.

“Afai e le i totogia e le malo i tausaga e tolu ua mavae atu tupe sa pasia e le Fono Faitulafono e fa’aopoopo i totogi o tagata faigaluega a le malo, o lo’u lagona la, o tupe uma lava ua fa’atulaga mai e le malo i le paketi o le tausaga tupe fou 2016, e tatau ona aveese uma mai totonu o le paketi,” o le saunoaga lea a Galea’i, ona ia fautuaina lea o le ta’ita’ifono o le komiti o le paketi a le senate ia Laolagi Fonoti Savali Vaeao, ina ia fuafua pe fia le aofa’i o le tupe lea ua fuafua le malo e fa’aopoopo i totogi o tagata faigaluega mo le tausaga tupe fou, ina ia aveese mai le paketi ae fa’asoa atu i ni isi atina’e lelei ma aoga a le malo.

I le amataga o le vaiaso na te’a nei, na fautuaina ai e le afioga i le ali’i senatoa ia Magalei Logovi’i le maota maualuga, ina ia aami le Loia Sili po o se loia fautua a le Fono Faitulafono, se’i aumai sana fautuaga fa’aloia, pe talafeagai ma le tulafono le gaioiga o lo o faia e le malo, o le fa’aaoga lea o tupe sa pasia e fa’aopoopo i totogi o tagata faigaluega e fa’a faigaluega ai tagata faigaluega fou i le malo.

I le avea ai o le afioga i le Sa’o ia Magalei ma Teutupe a le malo i le taimi o le nofoaiga a Togiola ma Faoa, sa ia saunoa ai i luma o le maota maualuga i le vaiaso na te’a nei e fa’apea, so o se taimi lava e pasia ai e le Fono Faitulafono le tulafono o le Paketi, e tatau i le faigamalo ona latou aloaia ma usitaia fa’aupuga uma ma numera o lo o i ai.

“Afai e fai mai le tulafono o le paketi o le tupe lea ua pasia e fa’aopoopo i totogi o tatgata faigaluega a le malo, lona uiga e pau lava lena o le auala e mafai ona fa’aaoga i ai e le malo le vaega tupe lea, ae le o le fa’aaoga e le malo e fa’a faigaluega ai isi tagata faigaluega fou,” o le saunoaga lea a Magalei.

Na fa’ailoa e Magalei i luma o le maota e fa’apea, e le sa’o molimau a le malo fai mai e pule le kovana i le auala e fa’aaoga i ai le tupe lea ua pasia e fa’aopoopo i luga o totogi o tagata faigaluega a le malo.

I luma o le maota o sui, sa fesiligia ai fo’i e afioga i faipule tulaga e fa’atatau i le taofiofi e le malo o tupe sa pasia e fa’aopoopo i totogi o tagata faigaluega a le malo, a o lea ua foliga mai e ese le auala lea ua fa’aaoga i ai.

Saunoa le afioga i le ali’i senatoa ia Gaea Perefoti Failautusi e fa’apea, e leai se malosi o le malo e fa’aaoga ai tupe ia i se isi lava auala, se’i vagana ai le fa’aopoopo o le tupe lea i totogi o tagata faigaluega a le malo.