Ua fautuaina e le afioga i le ali’i Senatoa ia Laolagi Fonoti Savali Vaeao le Komiti Fa’afoe a le Falema’i o le LBJ, e le gata ina ia “toe faitau i le tulafono, ae sa ia fautuaina fo’i i latou ina ia “usita’i i le tulafono”, e tusa ai o a latou penefiti e maua i le avea ai o i latou ma totino o le Komiti Fa’afoe a le Falema’i, ae aua nei o latou faia ni isi suiga e le tafeagai ma le tulafono.

O lea fautuaga mai ia Laolagi, na tu’uina atu lea i se iloiloga sa faia a le komiti o le Soifua Maloloina a le Senate ma sui o le Komiti Fa’afoe a le LBJ, e fa’atatau i le tele o mataupu o lo o tutupu mai i le falema’i, e aofia ai le toe faaopoopoina o penefiti e maua e sui o le komiti fa’afoe.

Na taua e Laolagi e fa’apea, e tusa ai o ripoti sa ia fa’alogo ai i luga o le “leitio”, ua toe pasia e le komiti faafoe le toe faaopoopo o tupe mo a latou penefiti i le ta’i $200 i le fonotaga e usuia, ae o lea ua maea ona faatulaga e le tulafono le aofai o le tupe e maua e sui o le komiti i le tausaga, i le $5,000 mo totino o le komiti ae $6,000 mo le ta’ita’ifono.

“E le o i ai se tulaga o fa’apea mai ai le tulafono, e mafai e le komiti fa’afoe ona toe fai ni isi suiga i penefiti ua maea ona fa’atulaga, o le atugaluga lena o lo’u sui senatoa, ma avatu ai sa’u fautuaga i le komiti fa’afoe, e sili pe a toe vaavaai i le tulafono, afai e moni ripoti ua ou fa’alogo i ai, lona uiga o se tulaga ua le talafeagai ma le tulafono, e le tatau foi ona outou faia se faaiuga e le o fautua mai ai le tulafono”, o se vaega lea o le saunoaga a Laolagi.

Ae na fa’amanino atili e le ta’ita’ifono o le Komiti Fa’afoe a le LBJ ia Leilua Mase Akapo e fa’apea, o se fautuaga sa tuuina mai i le Pulesili tuai o le falema’i lea na fa’atoa mavae atu nei, na mafua ai ona faia e le komiti le tulaga e pei ona fesiligia.

Saunoa Leilua e fa’apea, sa fa’avae le fautuaga a le pulesili muamua ina ua ia maitauina, toeitiiti o aso uma e fono ai le komiti faafoe mo le tau faia o ni faaiuga i le tele o mataupu ma faafitauli sa tulai mai i le falemai i lea vaitau, ma tuuina atu ai loa lana fautuaga i le komiti faafoe, e sili pe a faaopoopo se ta’i $200 i penefiti a sui o le komiti, pe afai e ova atu ma le ta’i fa’alua ona fono le komiti i le masina.

I lalo o le tulafono na faavae ai le falema’i e pei ona saunoa Leilua, e fa’atali i le kuata po o le tolu masina ona fono le komiti, peita’i o le taimi nei, e i ai masina e ova atu ai i le fa’alua ona fono le komiti.

Saunoa Leilua e fa’apea, e tusa ma le 4 masina o taoto le fautuaga a le alii sa avea ma pulesili o le falemai e faaopoopo le tai $200 i penefiti a le komiti, peita’i sa ia nofonofo pea e le faia i ai sana faaiuga, na te lei taliaina fo’i, ae ona ua finau atu totino o le komiti e faatatau i le mataupu lea, na mafua ai loa ona ia taliaina, ma atama ai loa i le masina na te’a nei ona faaopoopo le ta’i $200 i penefiti o lo o maua e le komiti faafoe i le masina, pe afai e sili atu i le faalua ona fono le komiti.

“O le gaioiga la lea ua matou faia, o le a taofiofi ai pea i le fa’alua ona matou fono i le masina, ina ia taofia ai le totogiina atu o le ta’i $200 i totino o le komiti faafoe e pei ona fautuaina ai i matou e le pulesili muamua o le falema’i”, o le saunoaga lea a Leilua i luma o le komiti a le maota maualuga.

Sa ia taua fo’i le mae’a ona fesiligia o ni fautuaga mai loia e uigai lenei mataupu, ma ua maea ona tuuina atu fautuaga a loia, e ui na te le i fa’ailoaina i luma o le komiti a le senate po o le a lea fautuaga.

E le i tete’e Laolagi e faaopoopo tulaga o penefiti mo totino o le komiti, pau lona atugaluga e pei ona ia taua, e tatau i le komiti ona mulimulita’i i le tulafono, ina nei avea le auala lea ua faia e le komiti faafoe a le falemai ma itu e mafai ai foi e isi komiti faafoe ona latou faia ni faaiuga faapenei, e ese mai i auala o lo o fautua mai ai le tulafono.

Sa ia taua fo’i e fa’apea, so o se vaega ua faatulaga e le tulafono, o le tulaga tonu lena e tatau ona usitaia e tagata uma, ae a sili atu loa se isi auaunaga e ese mai le vaega o lo o fautua mai ai le tulafono, o le taulaga ofo lena a le tagata mo le atunuu.

Na faaiu le saunoaga a Laolagi i lona fautuaina lea o le komiti faafoe, afai ua latou taliaina le fautuaga a le pulesili muamua a le falema’i, atoa ai ma se fautuaga ua tuu atu e loia, ua tatau loa la ona sui le tulafono ina ia o gatasi ma le gaioiga lea ua faia i le taimi nei.

O le isi tulaga sa fautuaina e afioga i senatoa, o le toe vaavaai lea i le tau o vailaau o lo o faatau ai i le falema’i, ina ia mautinoa e mafai ona talafeagai ma le tulaga o lo o i ai le manaoga tau tupe a le falemai.

Mo se faataitaiga e pei ona saunoa le sui peresetene ia Nuanuaolefeagaiga S. Nua, o le fagu fualaau lea sa ia faatauina i fafo e fesoasoani ai i le gasegase o le suka, e ova ma le $80 ae le atoa se 100 fualaau i totonu, ae ina ua maea lana fagu fualaau ina ua taunuu mai iinei, sa alu i le falema’i i Fagaalu e toe fa’atau mai ai le fagu fualaau lava lea, ae na te’i ina ua alu atu e na o le $10 le tau o le fagu fualaau lea.

Na fesili Nuanuaolefeagaiga i le komiti faafoe, pe le o le isi lea mafua’aga o lo o ala ai ona faaletonu le itu tau tupe a le falema’i, o le le talafeagai o le tau o vailaau, ae na faamanino e Leilua e fa’apea, na pau le tulaga o lo o totogi e le falema’i mo le atunuu i le taimi nei, e na o le totogi mo le faaaogaina o le falema’i (facility fees), ae o ni totogi mo tautua o lo o ofo atu mo le atunuu, e le o totogiina, ona o le isi lea vaega o lo o faamanino i lalo o le tulafono, e ofo fua atu e le falema’i lana tautua mo tagata lautele.

“O le vaega taua e ao ona silafia e le maota, soo se tagata gasegase e sulu atu i le falema’i, e le mafai e le falema’i ona teena o ia, tusa lava pe leai sana tupe e totogi ai lana pili, aua e faasa i le tulafono ona matou teena se tagata gasegase e sulu atu mo se fesoasoani”, o le saunoaga lea a Leilua i luma o le maota.