Ads by Google Ads by Google

Fautuaga fa’asaga i le tulafono faataga ai ‘fana ea’ i le teritori

E tele ni fautuaga sa tuuina atu e le Loia Sili tofia ia Talauega Eleasalo Ale i luma o le Komiti o le Puipuiga o le Saogalemu Lautele, faasaga i le tulafono taufaaofi lea ua i luma o le maota o sui i le taimi nei, e faataga ai ona faatau, aumai pe umia fo’i e so o se tasi le ituaiga fana e taua o le ‘fana ea’.

 

I se iloiloga sa faia i luma o le komiti a le maota o sui e uiga i lenei tulafono taufaaofi, sa fautuaina ai e le susuga a Talauega le tatau lea ona toe vaavaai le komiti i auala o lo o faaupuina ai le tulafono, atoa ai ma le faaliliuina o upu mai le gagana faaperetania aga’i atu i le gagana Samoa, ina ia mautinoa e leai se fete’enaiga e tula’i mai ai i lea tulaga.

 

A’o le i folasia e Talauega ana fautuaga i luma o le komiti, sa ia faamamafaina ai le avea ma atugaluga i le malo aemaise ai le ofisa o le loia sili, soo se taimi e ulufale mai ai a’upega mata’utia i totonu o le teritori, ona o le manatu e ao ona puipui tupulaga a le atunuu ma fanau laiti mai le ono aafia ai o i latou, aemaise o ni faafitauli e ono tutupu mai ai.

 

O le ‘fana ea’ o lo o taua i le tulafono taufaaofi lenei e pei ona taua e Talauega, e tatau ona tutusa lona igoa i le gagana faaperetania o lo o taua ai i le tulafono ma le gagana Samoa, ina ia faigofie i tagata o lo o faitau i le gagana Samoa ona malamalama.

 

O le ituaiga fana lenei, e na o pulu vaivai e mafai ona faaaoga ai, ae na o le tasi fo’i le pulu e mafai ona tuu i totonu i le taimi e tasi e faapa ai, e le mafai ona otomeki le lua o ni pulufana.

 

Na taua e Talauega, le ona tatau ona mautu tulaga uma mo le tulafono ina ia malu puipuia le atunuu i le taimi e faaaoga ai le ituaiga fana lenei.

 

Na taua e se tasi o molimau sa valaau e le komiti ina ia auai i le iloiloga, o se sui fo’i lea o le vaega o le JROTC i aoga maualuluga, o le a’upega ua taua o le ‘fana ea’, e fiafia tele tagata fai faatoaga i le atunuu e aofia ai ma ia e faaaoga, ona e le gata e leo laititi pe a pa, ae mafai fo’i ona faaaoga e faalalo ai manu faalafuå o lo o faaleagaina faatoaga.

 

Mo se faataitaiga e pei ona taua e le molimau, e aoga tele le fana ea e faalalo ai moa o lo o latou ‘aia fatu koko, e le o se fana e fa’ate’i tagata pe a pa, e saogalemu foi mo tagata o le aiga i le taimi e faaaoga ai.

 

Na fesili le afioga i le alii faipule ia Fetui Fetu Jr i le molimau, pe mafai ona faatamaia ai se moa i le fana ea, na tali le molimau ioe.

 

“Afai e mafai ona mate ai le moa po o isi fo’i meaola, lona uiga e mafai fo’i ona aafia ai le soifua o le tagata, e tatau fo’i la ona tatou faaeteete i le ituaiga fana lea,” o le saunoaga lea a Fetui i luma o le komiti.

 

 Ae na taua e le molimau e faapea, i le avea ai o ia ma faiaoga i le vaega o le JROTC, e taua tele ituaiga fana nei e fesoasoani ai i aoga a fanau o lo o naunau e ulufale atu i vaega ‘au a le malo tele, aua o se avanoa lelei lea e koleni ai latou mo le faaaogaina ma le umiaina o fana.

 

Na taua e le molimau e faapea, afai e lelei ona a’oa’oina fanau i auala e umia ma fa’aaoga ai a’upega mata’utia, o le a le avea le i ai o fanau i totonu o le aiga o se popolega mo tupulaga talavou, aua o le taimi lava e pasi ai fanau mai aoaoga i le faaaogaina o fanau, ona latou iloa fo’i lea o le lelei ma le saogalemu o auala e teu malu ai fana i totonu o aiga.

 

Na taua fo’i e le molimau e faapea, o le mafuaaga lena o lo o taua ai le tulafono le tatau lea ona lesitala fana ea pe a finagalo se tasi e i ai sana fana ea, ma ia tuuina atu faamatalaga uma i le ofisa o leoleo e uiga i le tagata o le a umia ma lesitalaina lea fana, ina ia faa faigofie ai ona saili faamaumauga taua nei i taimi e tutupu mai ai ni faafitauli.

 

Sa fautuaina e le afioga i le alii faipule ia Vailoata Eteuati Amituana’i le loia sili tofia ma lona ofisa, ina ia silasila toto’a i ni isi o faleoloa o lo o faatautaia e tagata mai Asia, lea ua ia vaai o lo o faatau ai pulu e faaaoga i le fana ea, o lo o faaauala mai o ni pulu mo mea taalo a fanau laiti, ina nei aafia ai se soifua o fanau ao lenei e le o faatagaina i lalo o le tulafono.

 

Saunoa le taitai komiti ia Su’a Alexander Jennings e faapea, o le a toe fofogaina le komiti i se isi iloiloga e faia, pe a maea ona iloilo e le komiti fautuaga ma suiga e pei ona tuuina atu e le loia sili tofia a le malo.