I le faamanatuina ai o le aso Toto Laau i Amerika Samoa i le taeao ananafi (Earth Day), na fautuaina ai e le afioga i le lutena kovana, Lemanu Peleti Mauga, o ia foi o le kovana le-tumau, i se sauniga puupuu sa faia i Utulei, le atunuu aemaise ai i latou sa auai i le molimauina o lenei faamoemoe, le tatau lea ona faataua e tagata uma laau ma le siosiomaga na aumai e le Atua mo Samoa, aua o lo latou tofi lea.

Saunoa Lemanu e faapea, afai na aumai e le Atua le siosiomaga mo le lalolagi e aofia ai ma Samoa, o le tiute o tagata uma o le puipui ma tausi faalelei ina ia mautinoa e tua i ai tupulaga i aso o i luma.

I le malae o le Su’igaula a le Atuvasa  na faatautaia ai se sauniga puupuu, e faamanatu ma faataua ai le aso Toto Laau i le lalolagi ma Amerika Samoa.

O le polokalame na amata i se savaliga sa faia i le vaveao, lea na auai ni isi o Matagaluega a le malo e aofia ai le AS-EPA, o i latou fo’i ia na tuu faatasia le polokalame.

O le Faatonusili o le Ofisa o Paka ma Malae Taaalo ia Maeataanoa Pili Gaoteote na taitaia le sauniga puupuu e tatala aloaia ai lenei faamoemoe i se tatalo, ina ua mae’a le viiga o le Atua na lagiina e i latou sa auai i le polokalame.

I le taimi o le talosaga, e le gata na talosia ai faamanuiaga a le Atua mo eleele ma le siosiomaga o Amerika Samoa, ae na talosia ai fo’i le faatafa gasegase a le afioga i le kovana sili ia Lolo Matalasi Moliga, a’o faataotolia ai i Hawaii ona o sailiga togafiti.

O le Fa’atonusili o le Ofisa o le AS-EPA ia Ameto Pako na saunoa i le taua o lenei aso, ma ia taua ai le taua tele o laau i le olaga o le tagata soifua, aua o iina e maua mai ai meaai mo le tino, aemaise ai o le ea o lo o manavaina e tagata soifua.

“O le siosiomaga na aumai e le Atua faapea ai ma laau sa ia foa’i mo le tagata, o mea taua ia e tatau ona tatou tausi faapelepele i ai, aua o iina e atagia mai ai tulaga manuia o tagata soifua uma,” o se vaega lea o le saunoaga a Ameto.

Sa ia taua fo’i e faapea, o le faamamaina o le siosiomaga e ala i le totoina o laau, teuteu faamama le laueleele ma toaga e toto laau mo le lumana’i o aiga ma fanau, o le tiute lea e tatau ona faia e tagata uma, i aso taitasi ae le faapea ua na o se vaega faapitoa latou te faatinoina lea galuega taua.

“O le tausia lelei o lo tatou tofi mai le Atua, o le tiute lea a tatou uma, o le tiute a oe le tama, tina ma fanau, aemaise ai tatou o ta’ita’i, aua afai e manuia le laueleele ma tupu olaola laau o lo o toto ai, ona manuia fo’i lea o le lumana’i o tagata Samoa faapea fanau lalovaoa,” o Ameto lea.

Na taua e le susuga a Mataio Fineaso, o se alii faifaatoaga o lo o faatau ana faatoaga i le School Lunch, o le taua o le tausi lelei o le eleele ma toto laau, e le gata e tua i ai aiga ae aoga fo’i mo le tausiaina o le ola maloloina o le tagata.

“E tele aoga o le laau ma le eleele i le soifua o le tagata,” o le saunoaga lea a Fineaso i le taimi na toto ai e le faletua o le Lutena kovana ia Pohakalani le laau e tasi i lalo o le palapala, a’o molimauina e le toatele o le atunuu sa auai i le polokalame.

“O le isi aoga o le laau na te fuaina mai le ea lelei, maua ai meaai, toe taofi mai ai le palapala mai le tafea atu i le sami, ae o le aoga o le eleele, e toto ai faatoaga e tausi ai aiga,” o le isi lea saunoaga a Fineaso.

Saunoa Ameto e faapea, “e le tatau ia Amerika Samoa ona faavaivai e toto laau aua o iina o lo o taoto mai ai le lumanai o tagata uma, e le tatau foi ona tatou faatamala i le tausiaina o lo tatou tofi mai le Atua, o lo tatou faasinomaga fo’i lea e le mafai ona toe aveesea, aua o Samoa mai aso anamua, e le gata sa faalagolago i le eleele, o laau faapea fo’i ma le sami.”

O le feau faaiu o lea aso, ua fautuaina ai tagata uma o le atunuu ina ia i ai se aso e te totoina ai se laau i lalo o le palapala, e tua i ai fanau mo le lumana’i.