Ads by Google Ads by Google

Felanulanua’i tapenaga a le atunu’u mo le Aso Sa Tina

E felanulanua’i polokalame ma auala na saunia e aiga ma ekalesia i le atunu’u, e fa’amanatu ai le Aso Sa o Tina o lenei tausaga, i le fa’aiuga o le vaiaso na te’a nei.

 

O ni isi o ekalesia sa latou fa’ataua o latou tina e ala i tala fa’atino, pesepesega aemaise ai o meaalofa ma taumafataga, ae o isi fo’i o aiga sa faia ni polokalame e pei o se’i, faiga meaalofa atoa ai ma le ofoina atu o ni mea alofa fa’apitoa mo tina.

 

I le avea ai o le aso Sa o tina i tausaga ta’itasi, o se aso e tulimata’i uma i ai le silasila a tama ma le fanau, sa molimauina ai fo’i e le Samoa News i tapenaga a le atunu’u mo le aso Sa o tina i lenei tausaga, ni isi o aiga sa lei mafai ona atoatoa le agaga o le aso Sa o tina, ina ua motusia le ula o le mafutaga, ona ua valaau le Atua i le tina o le aiga.

 

E malu ane lava le afiafi i le aso Faraile na le aso To’ona’i na te’a nei, o pisi lava ni isi o aiga i le tau fa’amae’aina o fa’atauga mo se taumafaga o le aso o Tina, atoa ai ma le tau sailiina o se laei mo lo latou aso fiafia.

 

O se tasi o itu sa maitauina e le Samoa News, o le tele o fale su’isu’i i le talafatai o le atunu’u e aofia ai Fagatogo, Pago Pago ma le aga’i atu i Leloaloa ma Aua, na amata tapunia mai lava nei fale su’isu’i i le aso Lulu o le vaiaso na te’a nei, ina ua le toe taliaina ni isi ofu fou e su’iina, e mafua mai i le tele o toniga ma ofu ua mae’a ona fa’atoai atu mo le tapenaina lelei.

 

Na taua e se ulugali’i mai Filipaina o lo o faia sa laua fale su’isu’i i Fagatogo, o Anntonio ma Isabel Aquino e fa’apea, o se aso Sa o tina ese lenei le pisi i le la pisinisi, ina ua ova ma le 60 ofu sa fa’atoai atu mo le su’iina, amata mai lava i le aso Tofi o le isi vaiaso seia oo mai i le aso Lulu na te’a nei na tapunia ai le toe taliaina o ni isi ofu fou e tuuina atu i totonu.

 

Na taua e le ali’i o Aquino e fa’apea, o isi tina sa fa’atoai atu a latou toniga, e ta’itolu o latou laei sa fa’atonu e su’i.

 

“O le taua o le aso Sa o tina i lenei tausaga, o le a maua ai le avanoa e fai meaalofa atu ai i nai tina e tusa ai o lo latou aso fa’apitoa”, o le saunoaga lea a le tama o Mark Emanuelu o Fagatogo.

 

Ae na taua e le susuga a Viliamu Tonumaipe’a i le Samoa News, “pau le itu o lo o o’u pisi ai i lenei aso (aso Tofi na te’a nei), o le lafoina lea o la’u atigi pusa mo si o’u tina i Vaigaga i Samoa, fa’atasi ai ma sina seleni ou te faimeaalofa atu ai ia te ia”, o le saunoaga lea a Tonumaipe’a, o se ali’i e galue i le kamupani a le StarKist Samoa i Atu’u.

 

Na taua e le afioga i le ali’i kovana ia Lolo Matalasi Moliga i lana feau fa’amanuia mo le Aso Sa o Tina i lenei tausaga e fa’apea, afai e mafaufau i le upu Tina, e tasi lava le upu e oso ane i lona manatu, o le tina e le manatu fa’apitoa.

 

Saunoa le ali’i kovana e fa’apea, e le taitai moe le tina sei vagana ua moe muamua lana tama, e le nofo filemu fo’i o ia pe afai e gasegase si ana tama, ma e ui lava fo’i i fa’afitauli e fetaia’i ma le tina i lona olaga, e muamua lava i mea uma i lona mafaufau lona aiga.

 

Sa ia taua fo’i e fa’apea, atonu e tutusa uma talitonuga o le atunu’u i le tulaga lenei, o le alofa o le tina, e fa’atusa ina lea i le alofa o le Atua, lea na ofo mai e le Atua lona soifua e togiola ai le lalolagi, e fa’apena fo’i le alofa o le tina, e tu’uina atu uma mo lona aiga.