O le aso Faraile na te’a nei na feiloa’i ai le afioga i le Fa’amasino Sili ma le Sui Komesina le tumau o le Matagaluega o Leoleo, mo le fesiligiaina o auala o lo o taulimaina ai e Leoleo fualaau fa’asaina o lo o avea ma mea molimau a le malo.

O lea feiloaiga ona o se poloaiga a Michael Kruse i le afioga ia Save Liuato Tuitele, lea fo’i sa i ai i totonu o le potu fa’amasinoga maualuga i le vaiaso ua te’a, i le taimi na iloilo ai e le fa’amasinoga mea molimau fa’asaga i le mataupu o lo o tu’uaia ai Ventilate Motuliki, i lona umia fa’asolitulafono lea o vaega o le pauta fa’asaina o le aisa.

Na taua e Kruse le fia maua o se avanoa la te feiloai ai ma Save, lea fo’i sa avea muamua ma Fa’amasino Lagolago o le fa’amasinoga maualuga, mo le fia fa’amalamalamaina o auala o lo o taulima ai e le Ofisa o Leoleo fualaau fa’asaina o lo o teuina i totonu o le potu e teu ai mea molimau a le malo.

O le afioga Save na auai e fia fa’afofoga i le iloiloga lea sa faia i le aso Faraile na te’a nei i luma o le ali’i fa’amasino sili, ina ua poloa’i e le fa’amasinoga ni ali’i leoleo ina ia o o atu e molimau i luma o le fa’amasinoga, e tusa ai o vaega o fualaau fa’asaina lea sa maua i le mataupu a Motuliki, lea na taua i se ripoti na tuuina atu i luma o le fa’amasinoga maualuga e fa’apea ua leiloloa.

O ni isi o ali’i leoleo na poloaina e le fa’amasinoga e o o atu e molimau e aofia ai i laua sa pulea le potu o lo o teu ai mea molimau a le malo, fa’apea ai leoleo o lo o galulue i le Vaega o suesueina mataupu i Fualaau Fa’asaina a le Ofisa o Leoleo.

Na fa’ailoa e molimau i luma o le fa’amasinoga maualuga i le vaiaso na te’a nei, e le i leiloloa fualaau fa’asaina lea na maua mai i le mataupu a Motuliki, ae o lo o i ai pea i totonu o le potu e teu ai mea molimau, ae o le isi vaega o ia fualaau fa’asaina o lo o auina atu i Amerika mo le faia i ai o suesuega, e le vaega o le ‘Drug Enforcement Administraiton’ (DEA), ma e o o mai i le taimi nei o lo o fa’atali se ripoti o ia suesuega.

O le ali’i loia sili lagolago ia Tony Graf, o lo o tula’i mo le malo, lea na ia fa’ailoa i le Samoa News e fa’apea, o se tasi o mafua’aga ua ala ai ona fia malamalama atili le fa’amasinoga i le mataupu lenei, pe aisea ua tuai ai na tuuina atu fualaau i le DEA mo le suesueina.

E le i mafai e Save ona fa’ailoa i le Samoa News ni isi o fuafuaga o lo o taumafa e faia e fa’aleleia ai lea auaunaga a le Ofisa o Leoleo, pau lana saunoaga, o le a maua se isi ripoti pe a mae’a le la feiloaiga ma le fa’amasino sili.

E le gata o le mataupu i le taulimaina o fualaau fa’asaina na finagalo Kruse e maua i ai se la feiloaiga ma Save, ae fa’apena fo’i i le mataupu e fa’atatau i le va feagai o pagota ma leoleo i le falepuipui i Tafuna.

Saunoa Kruse e faapea, o ripoti ua tuuina atu i luma o le faamasinoga ua vavala mai ai, o lo o i ai le faafitauli o lo o tulai mai i totonu o le toese i Tafuna, aemaise lava i tu’uaiga o le fasi lea e leoleo o le toese o pagota.

Mo se fa’ata’ita’iga e pei ona saunoa Kruse, o se mataupu o lo o fa’agasolo i luma o le fa’amasinoga fa’aitumalo i le taimi nei fa’asaga i se leoleo o le falepuipui, lea o lo o tu’uaia i le fasiga o se ali’i pagota i luma o le lisi leoleo o le falepuipui.

O Motuliki, o se tagatanuu o le malo o Tonga e 55 tausaga le matua, na ta’usala e le faamasinoga i le moliaga mamafa o lona umia faasolitulafono o vaega o le pauta fa’asaina o le aisa, i lalo o se maliliega na latou sainia ma le malo ma talia e le fa’amasinoga maualuga.

O tuuaiga fa’asaga ia te ia na alia’e mai ina ua alu e piki mai se afifi mai le falemeli i Fagatogo i le aso 6 Mati, 2013, ae te’i ina ua alu atu ae fa’ailoa ane i ai e sui o le Ofisa o Tiute o lo o i ai, o le afifi lea o lo o alu atu e piki o lo o masalomia e i ai ni fualaau fa’asaina i totonu.

Ina ua fesiligia Motuliki po o fea e aumai ai le afifi lea e alu atu e piki, sa ia tali e fa’apea, o le afifi na aumai i le niece a lona to’alua mai San Francisco.

Ina ua tatala e sui o le Ofisa o Tiute le afifi, sa latou maua i ai se isi afifi i totonu, lea sa i ai ni tama’i taga pepa iila se 11 o lo o i ai vaega o le pauta fa’asaina o le aisa.

Na taua e Motuliki i leoleo e fa’apea, o ia na alu atu e piki mai le afifi ma le tuutuuga, e i ai le tamaloa mai Malaeloa po o Vailoa fo’i e alu atu e piki le afifi, ona ia maua lea o le totogi e $500 mo le pikiina o le afifi.