Ua fesiligia e ni isi o faipule o le Maota o Sui i le aso Faraile le finagalo o le afioga i le ali’i senatoa ia Soliai Tuipine Fuimaono, i le le tatau lea ona toe fa’aaoga e le Fono tupe e fai ai meaalofa mo taimi o maliu o senatoa po o faipule, ona o tupe ia, o le afu a le atunu’u o lo o aumai e fa’atupe ai galuegaa le Fono Faitulafono.

Saunoa le affoga i le ali’i faipule ia Fatulegae’e Palepoi Mauga e fa’apea, e lagona lona fa’anoanoa i le saunoaga a Soliai e fa’atatau i le fa’aaoga lea o tupe a le fono e fai ai meaalofa mo sui o le fono e maliliu, ona o lea e fai tonu lava i le taimi o le manu’a e fitoitonu i le maota o sui, ae ua to’atele isi senatoa ua maliliu ma fai i ai meaalofa a le fono, e le i fa’asea lava i ai se faipule.

O le itu e sili ona fa’anoanoa ai le ali’i faipule, ona o lea ua salalau i ripoti a le au tusitala lenei mataupu, ma atagia mai ai le fa’aletonu o galuega fa’atino a le fono.

Na fa’ai’u le saunoaga a le ali’i faipule i lona talosagaina lea o le Fofoga Fetalai ia Savali Talavou Ale, ina ia fa’aulu se tulafono e puipuia ai le toe soona liki atu i tua o fa’amatalaga ma mataupu e fitoitonu i le fono faitulafono.

Na tula’i le afioga i le tama’ita’i faipule ia Vui Florence Saulo ma ia lagolagoina le finagalo o Fatulegae’e e tusa ai o lenei mataupu, atoa ai ma lona fa’anoanoa tele i le finagalo sa fa’aalia e le ali’i senatoa.

Saunoa Vui e fa’apea, e tumu lona sui faipule i le fa’aaloalo i le maota maualuga o lo o afifio ai tupu ma ee o le atunu’u, peita’i o le finagalo ua fa’aalia e le ali’i senatoa, e lagona ai le fa’anoanoa, ona o lea fa’atoa tupu lava lea o se fa’alavelave i se faipule o le maota o sui, a o lea ua fa’asea le ali’i senatoa.

O le isi itu na taua e Vui, o lea ua salalau ripoti i le saunoaga a le afioga a Soliai, a o lea e le i lagomau le afioga i le ali’i faipule i lona oliolisaga tumau.

“Ou te manatu ua tusa ma le to’afa afioga i ali’i senatoa ua tuumalo, ae fai lava i ai fa’aaloaloga a le fono e aunoa ma se fa’asea a le maota o sui, a o lea fa’atoa tuumalo lea o se faipule a o lenei ua fa’asea le ali’i senatoa”, o le saunoaga lea a Vui.

Na fautua le afioga i le ali’i faipule ia Vaetasi Tuumolimoli Saena Moliga i sui o le maota, ina ia taoto pea le saunoaga a le a Soliai, o lona lava lea finagalo fa’a sui senatoa, ae le o le finagalo atoa lea o le maota o tama o le atunu’u atoa ai mal e Fono Faitulafono.

O le finagalo fo’i lea na saunoa i ai Savali ina ua maua lona avanoa e tali fuaitau ai i saunoaga a ni isi o faipule.

Na talosaga Savali i le maota ina ia to’a pea le tai e tusa ai o lenei mataupu, ona e le o se mataupu e fou, ae taoto atu pea i se la fa’aiuga ma le peresetene o le senate.

Ae na manino i le finagalo o Soliai i le taimi na tulei saunoa ai i luma o le maota maualuga, e le o fa’aituau sona finagalo ona o le ali’i faipule lea ua tuumalo, ae o lana fautuaga sa ave i le ali’i peresetene o le senate ia Gaoteote Palaie Tofau, ia amata lelei loa i le tausaga fou lenei ona sui auala e fa’atautaia ai fesoasoani a le fono i tulaga o maliu, ina ia taofia le toe fa’aaogaina o tupe o lo o tuuina mai e fa’atupe ai galuega a le fono, ae sili pe a fai saoga i senatoa ma faipule mo meaalofa i taimi o maliu.

O le atugaluga o Soliai mafua ai ona ia laga lenei mataupu, o lo o silafia uma lava e le atunu’u aemaise i latou sa i ai i le taimi o le sauniga fa’alemalo o le afioga i le ali’i faipule ia Talolema’agao Lemapu Suiaunoa Talo, e le o ni tupe a le fono lea na fai ai lana meaalofa, ae o tupe sa aumai i le afu a tagata o le atunu’u.

“I lo’u talitonuga, e le tatau ona tatou toe fa’aaogaina tupe o lo o aumai e fa’atupe ai galuega a le fono e fai ai tatou meaalofa i aso o maliu, e tatau ona tatou fa’aeteete i le tulaga lena, leaga o le afu o tagata o lo o aumai e fa’atupe ai galuega a le fono, ae i lo’u taofi, a toe tula’i mai se isi manu’a fa’apenei i le lumana’i, po o le maota o sui po o le senate fou, saunoa mai a oulua afioga i ta’ita’ifono ona tatou sasao lea mo ni a tatou saogamea e fai”, o le saunoaga lea a Soliai.

Na taua e Soliai lona lagolagoina o le tatau lea ona fai se meaalofa a le fono e tali atu ai i fa’aaloaloga a aiga o se senatoa po o se faipule ua maliu, peitai e le tatau ona toe aumai i tupe a le fono, ae tatau ona fai saoga a maota e lua.

Na fa’afetaia e Gaoteote le fautuaga a le ali’i senatoa ia Soliai e tusa ai o lenei mataupu, peita’i i lana saunoaga, e le fou le mataupu e pei ona saunoa i ai Soliai, ae le o se mataupu fo’i e fa’atauagavale i ai le la pito laau ma le fofoga fetalai, ona o mea ua masani ai le fono.