Fia manino Fono i auala o ao ai aitalafu mai pisinisi

E le’i tali ioe pe leai le sui Faatonu o le Matagaluega o Fefaatauaiga ma Alamanuia a le malo ia Lelei Peau, ina ua fesiligia pe sa i ai se tupe a lana matagaluega na faaalu i le faatupeina o le vaiaso faapitoa o le ‘Samoan Heritage Week’ i Hawaii i le tausaga nei.

Saunoa Peau, o lo o i ai i totonu o le latou paketi i lalo o le vaega e taua o le ‘special division account’ le vaega tupe lea o lo o faaagaaga mo tulaga tau i le faalauiloaina o le teritori i pisinisi i fafo, o iina lea sa auala mai ai le vaega tupe na faatupe ai le polokalame e pei ona fesiligia.

Na saunoa Vaamua Henry Sesepasara, “o lea ou te vaavaai atu i le tou paketi, e le o i ai se vaega tupe o faaagaga mo le Heritage Week, o se tupe mai la outou matagaluega lea na faatupe ai le Heritage Week i Hawaii i le tausaga lenei pe leai,?” o le fesili lea a Vaamua.

Na taua e le isi sui o le matagaluega ia Rex Thompson i luma o le komiti, e le o i ai se tupe o faatulaga e faatupe ai le Heritage Week i le latou paketi mo le tausaga tupe fou.

E lei faatagaina e le taitaifono o le komiti o le paketi a le Senate ia Lemanu Peleti Mauga ona tali le fesili a le alii Senatoa ia Velega Savali Jr, ina ua ia fesiligia Peau, pe i ai se aoga o le Samoan Heritage Week o lo o faia i Hawaii i le tamaoaiga o le teritori o Amerika Samoa.

Saunoa Velega, o le isi lea alagatupe a le malo o lo o maimau peitai e le o mautinoa pe o i ai sona aoga i le tamaoaiga o le atunuu.

Na soisoi Velega ma toe saunoa e faapea, e fesootai lana fesili ma le paketi a le matagaluega o lo o fesiligia, ona o se tasi lenei o mataupu o lo o faaauau pea ona faaalu ai e le malo tupe.

I le uluai taimi na faatoa faatulai mai ai e le malo le Heritage Week, e $200,000 le tupe na talosaga atu ai le kovana i le Fono Faitulafono e faamatuu atu, e fesoasoani ai i le faatupeina o lenei faamoemoe, peitai o le faafitauli na maitauina e le Fono, na muamua faaaoga le tupe ae mulimuli pasia e le Fono le pili e faataga ai lona faaaogaina.

O le tausaga na sosoo ai na tofu atu ai loa le mataupu lenei i le faamasinoga maualuga, ina ua faila e Velega se tagi faasaga i le kovana, i lona faaaogaina lea o tupe e le i pasia atu e le fono, ma ia talosagaina ai loa le faamasinoga mo sana poloaiga le tumau, e taofia ai le kovana mai lona faaaogaina o ia vaega tupe sei vagana ua pasia atu e le fono, lea foi na talia e le faamasinoga maualuga.

AITALAFU A PISINISI I LE MALO

O se tasi o mataupu na fesiligia i le iloiloga o le paketi a le Matagaluega o Fefaatauaiga ma Alamanuia, o aitalafu i lisi a pisinisi i le malo mo le faaaogaina o fanua i le malo, le National Park.

O lea fesili mai sui o le fono na afua mai i se ripoti na tuuina atu e le Teutupe a le Fono i afioga i Senatoa ma Faipule, lea o loo taua ai le silia ma le $2 miliona le tupe o loo aitalafu ai pisinisi i le malo.

E talitonu le Teutupe a le malo ia Talaolemotu Mauga na tapenaina lenei ripoti, e aoga tele lenei tupe e mafai ai ona fesoasoani i le itu tau tupe a le malo, pe afai e mafai e le malo ona faamalosi le aoina mai.

O le afioga i le alii faipule ia Vailoata Eteuati Amituana’i na fesiligia le sui faatonusili o le Matagaluega o Alamanuia ma Fefaatauaiga ia Lelei Peau, po o i ai se auala o faaaoga e lona ofisa e faamalosia ai le aoina mai o tupe nei, ae na saunoa Peau, o lo o latou galulue soosootauau ma le Ofisa o le Tupe faapea ai le Loia Sili mo le tau aoina maia o tupe nei.

Na fesili le alii faipule ia Taotasi Archie Soliai ia Peau, po o i ai ni fuafuaga a le latou ofisa faasaga i pisinisi e le o totogia atu a latou lisi i le malo, ae na tali Peau, e le o i ai i le latou ofisa se malosi e aveese ai se lisi mai se pisinisi e le o totogiina le latou aitalafu.

Na taua foi e le molimau e faapea, o tupe o loo maua mai i le faaaogaina o fanua o le malo mai pisinisi, o loo alu i le toe faatupeina o manaoga mo le malo.