Ads by Google Ads by Google

Fesiligia livi tausaga kovana ma le lutena kovana

I le iloiloina ai e le Fono o le paketi a le Matagaluega o Tagata Faigaluega a le malo i le taeao ananafi, na fesiligia ai e le afioga i le alii Senatoa ia Galea’i Tu’ufuli le mafuaaga e agava’a ai le kovana ma le lutena kovana i livi tausaga (annual leave).

“E agavaa le kovana ma le lutena kovana i livi tausaga,?” o le fesili a Galea’i, lea na tali ai le tamaitai faatonu ia Evelyn Vaitautolu-Langford e faapea, o le tulafono (Administration Codes) lea o lo o mulimulita’i ai faaiuga a lona ofisa, o lo o latou faamatalaina e faapea, “soo se tagata faigaluega lava a le malo o lo o maua sona totogi mai le malo,” e agavaa le tagata lena i livi tausaga.

“Lona uiga la e agavaa foi le kovana ma le lutena kovana i livi tausaga,” o le molimau lea a Evelyn na mafua ai ona toe fesili Galea’i, “O ai na faia le faaiuga lena e agavaa le kovana ma le lutena kovana i livi tausaga.?”

E lei tali Evelyn i le fesili a le alii Senatoa, ae na talifuaitau le sui faatonusili ia Ulugaono Allen e faapea, o lo o i ai lava i totonu o le tulafono le tulaga lea, o le mafuaaga foi lena o lo o mulimulitai ai le latou matagaluega.

Saunoa Galeai, “I lo’u talitonuga e le agavaa le kovana ma le lutena kovana i livi tausaga, aua o i laua o lo o filifilia e le atunuu e ala i le palota, e oo foi i faatonusili, e le agavaa ai i latou leaga o latou na tofia e le kovana, ou te fia iloa la poo ai na faia le faaiuga lena e agavaa le kovana ma le lutena kovana i livi tausaga,” o le saunoaga lea a Galeai.

Na talosagaina e Galeai molimau ina ia tuuina atu i luma o le maota ni faamaumauga e lagolagoina ai la laua mau, afai o se faaiuga na tuu atu e le loia sili po o se mataupu foi na aumai i le faamasinoga, e tatau la ona tuuina atu sei vaavaai i ai le fono.

Ae na toe saunoa le sui faatonu e faapea, o livi tausaga mo le kovana ma le lutena kovana na faaauau mai lava i nisi o nofoaiga ua mavae atu, lea foi e faaauau mai e le faatonu ma le matagaluega o lo o i ai i le taimi nei, pau le itu e le mafai ona ia faailoa, na te le o iloa po o ai sa faia le faaiuga e agavaa i laua nei i livi tausaga, peitai na fautua Galeai i molimau, ina ia o e toe iloilo ma faitau le tulafono, ma suesue poo ai na faia le suiga e pei ona ia fesiligia.

“Na pau tagata faigaluega e agavaa i livi tausaga o tagata faigaluega tumau a le malo,” o le saunoaga lea a Galeai.

Na tuliloa e le alii faipule ia Taotasi Archie Soliai ma ia taua ai e faapea, i lalo o le Ulutala 7.1203 (a) o le Tulafono Toe teuteu a Amerika Samoa o loo taua ai e faapea, “o tagata faigaluega tumau a le malo e agavaa i latou i livi tausaga....”

“Fai mai le tulafono, pau tagata e agavaa i livi tausaga na o tagata faigaluega tumau a le malo,” o le saunoaga lea a Taotasi, “Ou te iloa foi e tutusa o ta talitonuga i le tulaga lea, e malosi atu le tulafono (A.S.C.A) lea nai lo le ‘Administration Codes’ pe a oo ina faamalosi tulaga o ta’iala ma tulafono e lima taitaiina ai galuega faatino i le malo,” o le isi lea saunoaga a Taotasi.

I le faaiuga o le saunoaga a le alii faipule, sa ia fautuaina ai le tamaitai faatonu ina ia saili se fautuaga a le loia sili po o le loia a le Fono, mo le faamalamalama sa’oina o le uiga o le tulafono e faatatau i livi tausaga.

E ese mai i le mataupu i livi tausaga, sa fesiligia e Galea’i suiga i tulaga ua faia i le Matagaluega o leoleo i se taimi e lei mamao atu.

Saunoa Galea’i, e le gata o loo ia fesiligia le taimi ua faia ai nei suiga, ae o le isi foi faasea lea ua gugulu ai le atunuu, mai le silia i le toa 200 tagata faigaluega a le matagaluega lea, e tusa ma le toa 45 i latou ua faaee i ai le tofiga taitai (supervisor) i totonu o le matagaluega.

“O le atugaluga o nisi o le atunuu, ua toatele naua nei mau supervisor ae tau le toatele ni tagata faigaluega a le matagaluega, lona uiga ua tau leai nisi e faia galuega aua ua toatele supervisor, e i’u ina pule le isi supervisor i le isi supervisor, ae le o lena foi, e i’u ina alu atu le supervisor, suprevise na o pepa o loo i luga o lana laulau talu ai ua leai nisi na te supervise ina, ae lelei ona toe vaavaai i le tulaga lea,” o le fautuaga lea a le alii Senatoa.