Ads by Google Ads by Google

Fesiligia ni isi tagata matutua fa’aiuga TAOA

Ua fa’aalia e ni isi o tama ma tina matutua o lo o i lalo o le polokalame a le Ofisa o Tagata Matutua, le TAOA, lo latou le fiafia i le faaiuga ua faia e taofia ai le tuuina atu o pepa taumafa (food voucher) mo i latou mo le masina o Me, 2014.

 

Na taua e ni isi o i latou sa mafai ona talanoa mai i le Samoa News e fa’apea, e le tatau ona taofia fua pepa taumafa ua maea ona fuafuaina e le ofisa mo tagata matutua i masina taitasi, aua o pepa taumafa nei ua uma ona fuafua mai e le ofisa o lo o faatupeina le polokalame a tagata matutua.

 

“E lagona le faanoanoa i le faaiuga ua faia e taofia ai pepa taumafa mo le masina o Me, afai ua manatu le Ofisa o le TAOA e sui pepa taumafa i taumafa vela i le masina o Iuni, e tatau pea lava la ona faaauau pea le tuuina mai o pepa taumafa mo Me, ae le o le taofia fua ona o suiga na mafua ai i le latou Ofisa,” o le fa’asea lea a le tina matua o Fanalua Amituana’i o Tafuna.

 

Ae na taua e le tama o Lokeni Mauga o Pago Pago e fa’apea, o pepa taumafa o lo o maua e tagata matutua i masina taitasi, o lo o fesoasoani ai i le faatauina o taumafa mo i latou ma latou aiga.

 

“O le $40 lea e maua mai i masina taitasi o lo o fesoasoani i le faatauina o isi mea mo le aiga, ae afai lava o le a taofi le tuuina mai o pepa taumafa mo Me, lona uiga ua tele le faaletonu i le aiga i lea masina, o le a le maua foi e matou lea fesoasoani,” o le saunoaga lea a le susuga Mauga.

 

O le vaiaso na te’a nei na faamaonia mai ai e le Ofisa o le TAOA i le Samoa News, o le a leai ni pepa taumafa e maua e tagata matutua mo le masina fou o Me, ona o lea ua sauni le Ofisa mo le tuuina atu o le suiga fou i le polokalame, e ala i taumafa vela o le a tufatufa atu i tagata matutua i le masina o Iuni.

 

O le fuafuaga ina ia taofia le tufatufaina atu o pepa taumafa i tagata matutua, ona e manaomia le lava o le tupe e faatino ai le suiga fou o le polokalame o le a faia nei, e pei o le totogiina lea o fale’aiga latou te kukaina taumafa mo tagata matutua, aemaise ai o le totogiina o ta’avale latou te kilivaina atu taumafa i tagata matutua o lo o faataoto lima i maota ma laoa.

 

E ui i lea suiga, ae ua fautuaina e le ofisa o le TAOA tagata matutua uma ua atoa le ta’i 60 tausaga, ina ia ripoti atu i le Ofisa i Pago Pago mo le lesitalaina o latou suafa i le suiga fou o le polokalame lea ua fuafua e amata ia Iuni o le tausaga nei.

 

O se tala fiafia mo tagata matutua i le polokalame fou lea e pei ona fa’amaonia e le Fa’atonusili o le TAOA ia Ale Tifimalae, e le faailogaina ituaiga tagata e agavaa i le polokalame lenei, ae o le a tatala le avanoa mo so o se tasi o lo o aumau i totonu o le teritori ua atoa tausaga e agavaa ai i le polokalame.