Ads by Google Ads by Google

Fesiligia se fa’aiuga su’esu’ea fa’asaga i a Ta’afua

O le vaiaso na te’a nei na tu’uina atu ai e le Taitaifono o le Komiti o le Litaea a le malo sana tusi i le Komesina o Leoleo, e fesiligia ai se fa’aiuga ua o o i ai su’esu’ega a leoleo fa’asaga i le Pulesili o le Ofisa o le Litaea, e tusa ai o tu’uaiga o lo o faia fa’asaga ia te ia.

 

Na fa’ailoa e le afioga a Va’anatiu T. Iafeta i lana tusi ia Save Liuato Tuitele e fa’apea, ua tusa nei ma le 5 vaiaso talu ona fa’amalolo le tumau le susuga a Filisouaiga Ta’afua mo le 30 aso, a o lea lava e le i maua e le Komiti Fa’afoe se fa’amatalaga e tusa ai o suesuega a leoleo sa faia.

 

Na fa’ailoa e Va’anatiu ia Save e fa’apea, talu ona malolo Ta’afua mai le galuega, ua avea ma avega mamafa i le Ofisa o le Litaea tulaga o tiute ma galuega tauave, ona o lo o toesea fo’i le sui pulesili mai le galuega ona o ni isi o fa’alavelave fa’aleaiga i atunu’u i fafo.

 

“Ae sili ai ona taua, e le i mafai e le Komiti Fa’afoe a le Litaea ona tu’u atu se avanoa ia Ta’afua, e fa’ailoa mai ai sana fa’amatalaga e tusa ai o tu’uaiga fa’asaga ia te ia,” o se vaega lea o le tusi a Va’anaiu.

 

“I se fautuaga fa’aletulafono sa tu’uina atu e le Loia Sili i le ta’ita’ifono tuai a le Komiti o le Litaea ia Fanene Morris Scanlan, o lo o fautuaina ai e le Loia Sili le Komiti Fa’afoe i le le amanaiaina o aia tatau fa’aletulafono o le susuga a Ta’afua,” o se vaega lea o le tusi a Va’anatiu.

 

Na si’itia e Va’anatiu se vaega o le fautuaga fa’aletulafono a le loia sili i lana tusi ia Save, lea o lo o taua ai e fa’apea, “I le mataupu lenei, e tatau i le Komiti Fa’afoe ona latou faia se la’asaga, ina ia mautinoa ai, e tu’uina atu le avanoa i le Pulesili na te fa’ailoa manino mai ai tulaga o fa’amatalaga e tusa ai o tuuaiga fa’asaga ia te ia. E tatau fo’i ona maua le avanoa o le Pulesili na te malamalama ai i tu’uaiga fa’asaga ia te ia, atoa ai ma le tu’uina atu o mea molimau e lagolagoina ai tu’uaiga fa’asaga ia te ia i luma o le Komiti Fa’afoe.”

 

Saunoa Va’anatiu e fa’apea, i lona faitauina ai o le fautuaga mai le Loia Sili, ua tula’i mai ai se atugaluga ia te ia, i le ono fetaia’i lea o le teugatupe a le litaea ma se aitalafu, e mafua mai i le teena, atoa ai ma le le amanaiaina o aia tatau o le susuga a Ta’afua.

 

“Ina ia taofia ai le ono tula’i mai o se tulaga matuia fa’apea e a’afia ai tulaga o tupe a le litaea, ua ou talosagaina ai ma le fa’aaloalo lau afioga, ina ia tu’uina mai i le Komiti Fa’afoe o le Litaea se taunu’uga o la outou suesuega sa faia, ina ia mafai ai e le Komiti Fa’afoe ona fa’atautaia le iloiloga fa’asaga ia Ta’afua, e tusa ai o tu’uaiga fa’asaga ia te ia,” o se vaega fa’ai’u lea o le tusi a Va’anatiu.

 

O le masina na te’a nei na fa’amalolo le tumau ai le susuga a Ta’afua, i lalo o se fautuaga mai le Komiti Fa’afoe, ina ua alia’e ni tu’uaiga fa’asaga ia te ia, i le faaaoga seseina lea o tupe a le Litaea.

 

I le tula’i mai ai o lenei mataupu, sa talosagaina ai loa e le Komiti Fa’afoe ia Save ina ia faia se suesuega fa’asaga i lenei mataupu.