O le fesuisuia’i o le tau e fa’atau ai le kalone suau’u i kamupani suau’u i le atunu’u, atoa ai ma le tuai ona pau i lalo o le tau o le kesi i Amerika Samoa, ae ua mae’a ona fa’alauiloa i maketi i fafo le pau maualalo o le kesi, o le autu lea o se iloiloga sa faia i luma o le Senate i le vaiaso nei, lea na fesiligia ai e afioga i Senatoa le Pule o le Ofisa o le Suauu a le malo, susuga ia Sione Kava.

Sa molimau fa’atasi ma Kava i luma o le Komiti o le Faagaioiga o le malo a le Senate, lea o loo ta’ita’ifono ai le afioga i le ali’i senatoa ia Galea’i M. Tu’ufuli, le afioga a Taulapapa Willie Sword, o le ali’i pule lea o le kamupani suau’u a le Pacific Island Energy i le atunu’u.

Na fia malamalama le afioga Senatoa ia LeAtualevao Sosene Asifoa i le mafua’aga e ala ai ona tuai na pau le tau o le kesi i pamu kesi i le atunu’u, a’o lea ua fa’alauiloa mai i ripoti mai fafo ua pau le tau o le suau’u i maketi i fafo.