O se tasi o mataupu na tele i ai manatu ma fesili a ni isi o sui o le Komiti Soofaatasi o le Paketi a le Fono Faitulafono, fa’asaga i le Paketi a le Ofisa o Fesootaiga a le malo (ASTCA), o vaega tupe o lo o fa’aagaga mo femalagaaiga a sui o le Komiti Fa’afoe mo le tausaga tupe fou 2015.

O le afioga i le tamaitai faipule mai le itumalo o Tualauta ia Vui Florence Vaili Saulo na ia fesiligia le ta’ita’ifono o le Komiti Fa’afoe ia Roy JD Hall Jr, po o le a se taua o femalagaaiga a le Komiti Fa’afoe mo le atina’eina o le tautua ma le auaunaga a le ASTCA.

O le isi fo’i itu sa fia malamalama i ai le tamaitai faipule, mai le $327,000 o le tupe ua fa’atulaga mo femalagaaiga a le ASTCA, o le $103,000 e alu i malaga a le Komiti Fa’afoe pe aisea ua alu ai le tasi o vae tolu o le paketi fuafuaina mo femalagaaiga a sui o le komiti fa’afoe.

Saunoa Hall Jr, o le taua o fonotaga o lo o fuafua e auai atu i ai sui o le Komiti Fa’afoe, e mafai ai ona latou talatalanoa i auala e fa’aleleia ai tulaga tau pulega, ina ia fesoasoani ai i le faatautaiga o le tautua a le ASTCA mo le lumana’i.

Na fa’amanino fo’i e Hall, e le o sui uma e to’a 9 o le komiti fa’afoe e malaga, ae ua na o ni nai sui ua filifilia, e ui na te le i fa’ailoa suafa o sui o lo o agava’a i lalo o femalagaaiga.

O le isi mataupu na fesiligia e le tamaitai faipule, o polokalame fa’ataoto a le ASTCA mo le fausia o ni isi o galuega e pei o le fausiaina lea o le ‘Call Center’ ma isi galuega o lo o fuafuaina mo le tausaga tupe fou, ae le o i si se vaega tupe o fuafua e fa’aalu mo le fausiaina o nei galuega.

Saunoa Vui e fa’apea, e foliga mai e le o tuuina atu e le ASTCA galuega nei i kamupani tua, ae ua manatu lava le ASTCA latou te fausiaina, ma ua atagia mai ai le tulaga lea, o le a fa’atauva le ASTCA o le vaega tumaoti a le malo ma pisinisi tua i tulaga o galuega tetele nei.

Na fa’amanino e le Pulesili le tumau o le ASTCA ia Aleki Sene Jr e fa’apea, e mafai ona faa faigaluega ni isi tagata faigaluega pe afai e manaomia mo le galuega, ae talu ai e lei i ai muamua se Call Center i Amerika Samoa, o le isi lena vaai mamao a le ASTCA, ina ia mautinoa e lelei ma mautu le polokalame mo le fausiaina o le Call Center fou e pei ona fuafuaina.

Saunoa Sene Jr e fa’apea, o le fuafuaga lea ua fa’ataoto e le ASTCA, o le a faia muamua aoaoga mo tagata faigaluega o lo o i ai i le taimi nei ina ia maua e i latou le agava’a e fa’atino ai le galuega, a mae’a, ona va’ava’ai loa lea pe toe manaomia ni isi tagata faigaluega fou mai fafo e fesoasoani i le fa’atinoina o le galuega.

Pau le isi tulaga sa fautuaina e sui o le Komiti Soofaatasi, o ni isi o taimi e motusia ai fesootaiga tau initaneti, ae o lo o totogi pea lava e tagata a latou pili.

Ina ua fesiligia le galuega mo le tosoina o uaea mo fesootaiga i vaega eseese o le atunuu, le ‘BLAST Project’ po o ai nofoaga e aofia ai, na saunoa Hall Jr, o le poloketi lea e aofia ai motu uma o Amerika Samoa e pei o Manu’a, Tutuila ma Aunu’u, ma o lo o i ai fo’i se fuafuaga e tatau ona fa’aitiitia le tau mo le fa’aaogaina o le initaneti pe a mae’a le galuega, ona ua maitauina le taugata o lea tautua i le taimi nei.

Na faamanino atili e Sene Jr e fa’apea, e ui i ni isi o fa’afitauli o lo o tula’i mai i le galuega, ae o lo o taumafai pea ina ia mae’a tonu lava le galuega i le masina o Iuni 2015 e pei ona fuafuaina i le konekarate ua mae’a ona sainia.

Na fesili le sui fofoga fetalai ia Talia Fa’afetai Iaulualo i molimau, po o afea e taunuu ai le uaea o fesootaiga i Manu’a, ua leva ona nofo tatali le itumalo i le taimi e taunu’u atu ai lenei tautua mo tagata Manu’a, ae na saunoa Sene Jr, o lo o tumau pea le fuafuaga, o le masina o Novema e tatau ona amata toso ai le uaea o fesootaiga mo Manu’a e pei ona fuafuaina.

Na fesili le afioga i le alii faipule ia Vailoata Eteuati Amituana’i i molimau, po o tumau pea le fuafuaga sa latou fa’alauiloa i le amataga o le tausaga, o le mafai lea ona a’oa’o e sui o le kamupani o lo o tosoina le uaea o fesootaiga tagata faigaluega a le ASTCA i metotia ma auala e fa’atino ai le galuega, ina ia toe fo’i atu latou i fafo ae ua maua e tagata faigaluega a le ASTCA le tomai ma le agava’a e fa’atino ai le galuega i fesootaiga faaonaponei, aemaise ai lava tulaga o le mataituina ma le faaleleia o le uaea i le taimi e manaomia ai.

Saunoa Hall Jr, o lo o tumau pea lea moemitiga e pei ona latou fa’alauiloa i se taimi ua tuana’i, o lo o galulue pea sui o le konekarate a le ‘Michels Corporation’ mo le aoaoina o tagata faigaluega a le ASTCA, ina ia latou malamalama i auala e fa’atino ai le galuega pe afai ae toe malaga ese atu le konekarate ma le atunuu.

I tulaga nonogatupe a le malo i le ASTCA, o le isi lea mataupu sa fia malamalama i ai suio le Komiti Soofaatasi, ae na faamanino e Hall Jr e fa’apea, o le nonogatupe a le falema’i o le LBJ i le ASTCA e $10 miliona, o lo o tulaga lelei lava le totogiina o lea nonogatupe i le taimi nei, toe $6.7 miliona le paleni o lo o totoe.