E tolu aso o se a’oa’oga o lo o fa’atauaia e le ‘Troy and Theodora Polamalu Foundation’ i le vaiaso nei, e fesoasoani ai i le fa’aa’upegaina atili o faiaoga a o sauni atu ai mo le amataina o le isi tausaga aoga o lo o sosoo mai.

E silia i le to’a 50 faiaoga, faufautua, puleaoga ma sui pule na auai i le ulua’i aso na tatala aloaia ai lenei aoga, i fogafale muamua o le Pago Plaza i Pago Pago i le aso Lua na te’a nei, i le aoaoga ua fa’aautuina ‘Fa’aSamoa: Academic and Life Skills’.

E to’afa sui mai le vaega e taua o le ‘Life Skills 360’ o lo o fa’atautaia lenei polokalame, i lalo o le ta’ita’iga a le susuga a Penny Semaia, o ia lea o lo o fa’atonu mo aoaoga i tulaga agava’a eseese i lalo o le polokalama o le Life Skills.

O isi sui o lo o malaga mai ma Semaia mo le fa’atautaia o lenei aoaoga e aofia ai le uso o Polamalu o Tafea Polamalu, o lo o ia umia le tulaga o le ‘professor of sociology and writing’ mai le aai o Oregon; susuga Dr. Charles Small, o le isi lea sui o le ‘Life Skills 360’, ae o ia fo’i o le Fa’atonu i le polokalame e fesoasoani ai e atina’e ta’aloga mo fanau aoga i le Iunivesite o Arkansas, ma le susuga a Dr. Gabby Yearwood, o se polofesa mai le Iunivesite o Pittsburgh tulaga o aoaoga ma auala e atina’e ai le soifua taalo.

Na faailoa e le susuga a Semaia i le mamalu o faiaoga le taua o le aoaoga o le a latou faasoa faatasi ai mo le umi e tolu ao, o le a mafai ai ona fesoasoani atili i la latou pito laau fa’a faiaoga.

Na taua e Tafea le taua tele o le gagana ma le aganu’u a Samoa o lo o naunau le toatele o fanau aoga latou te fia aoaoina, ae mo ia, o se lagona ootia ina ua ia faalogo atu i faiaoga o lo o pepese ma tatalo e ala i le faaaogaina o le gagana.

Na taua e Semaia e fa’apea, o le taua o aoaoga nei o le a mafai ai ona fesoasoani i mafaufau o fanau aoga, ina ia unaia a latou taleni mo lo latou lumana’i e ala i tulaga tau ta’aloga, afeleti, po o le fa’aleleia fo’i o le aoaoina o le mafaufau i le itu tau aoaoga.

Sa ia fa’afetaia le galuega fita o lo o fa’atinoina e faiaoga i aso taitasi, i le aoaoina lea o fanau ina ia avea i latou ma tagata lelei ma fa’atuatuaina mo le lumana’i.

O le aso lea ua fa’amoemoe e fa’amae’a ai lenei aoaoga.