O le fa’afitauli o le tasi o le tagata mai fafo ae tele ona igoa i fa’amaumauga a le fa’amasinoga, o se tasi lea o fa’afitauli na taua e le afioga i le ali’i fa’amasino sili ia Michael Kruse i le vaiaso na te’a nei, “o se fa’afitauli mai le Ofisa o Femalagaaiga o lo o a’afia ai tiute tauave a le fa’amasinoga”.

O lea mataupu na alia’e mai i le aso Faraile na te’a nei ina ua sauni le fa’amasinoga e fa’asala se ali’i mai Samoa o Misi Iti lona igoa, lea na ta’usala i lona umia fa’asolitulafono o vaega o fualaau fa’asaina.

Na fesili Kruse i le ali’i o lo o molia po o ai lona igoa sa’o, ae na tali le ua molia, “o Misi Iki”, peita’i na toe saunoa Kruse, “a o lea fo’i e maua i isi fa’amaumauga a le fa’amasinoga o le isi ou igoa o Misi Iti”, ae na tali le ua molia, “o le isi o’u igoa lena”.

Na liliu le ali’i fa’amasino i le itu o lo o nofo mai ai le loia a le malo o Tony Graf ma fa’ailoa i ai e fa’apea, o se tasi lenei o fa’afitauli o lo o fetaia’i pea ma le fa’amasinoga i le tele o aso, e to’atasi le tagata ae eseese igoa e iloa ai, aemaise lava i tagata mai fafo.

O le vaiaso i ona tua atu “sa ou fautuaina ai le itu a le malo ina ia fai se fa’atatau i le fa’afitauli o lo o tula’i mai i fa’amaumauga a le Ofisa o Femalagaaiga, i le le mafai lea ona fa’aleleia o le latou polokalame lea e maua ai faamaumauga mo tagata e ulufale ma ulufafo i le atunu’u”, o le saunoaga lea a Kruse i le loia a le malo.

Na fa’atatau le saunoaga a Kruse ina ua ia fesiligia le malo i le lua vaiaso talu ai, i le mafua’aga na le mafai ai ona latou maua faamaumauga e faatatau i ni ali’i se to’alua na ta’usala i le faia o ni solitulafono mamafa na a’afia ai ni tama’ita’i talavou i le atunu’u.

O ia ali’i e pei ona taua i fa’amaumauga a le Ofisa o Femalagaaiga, na mae’a le aoga o le pemita na ulufale mai ai le isi ali’i i le 2001, ae o le isi ali’i na mae’a le aoga o le polokalame lea na ulufale mai ai i le teritori i le 2009, ma manatu ai loa le Ofisa o Femalagaaiga e tapuni lana faila e aunoa ma lo latou taumafai e saili ni fa’amaoniga pe ua tuua e lea ali’i le atunu’u.

O le ali’i lea na mae’a le aoga o le pemita na ulufale mai ai i le 2001, ua tuliina nei sana fa’asalaga fa’a falepuipui e 28 masina i le toese i Tafuna, ina ua ta’usala o ia i le mataupu lea na la faiaiga ai ma le tama a lona tuafafine e 16 tausaga le matua, a mae’a ona tuli lana fa’asalaga, ona ia tuua lea o le teritori ae toe fo’i atu i le atunu’u na malaga mai ai.

Ae o le ali’i lea na tapuni e le Ofisa o Femalagaaiga lana faila i le 2009, o ia lea o Seilala Uesi, e 40 masina lea ua fa’asala ai o ia i le fa’amasinoga ma le tuutuuga a mae’a ona tuli lana fa’asalaga, ona ia tuua fo’i lea o le atunu’u.

Na taua e Kruse e fa’apea, ana faatino e le Ofisa o Femalagaaiga la latou tiute o le sailia lea o Uesi, atonu e le tula’i mai le mataupu lea ua molia ai o ia i luma o le fa’amasinoga, lea na a’afia ai ni tama’ita’i talavou ina ua ia taumafai e tagofia a latou itu tinosa.

Na toe liliu Kruse ma saunoa atu i le loia a Iti o Joel Shiver e fa’apea, “e faigata tele i le fa’amasinoga ona fa’atino lana pito laau i le mata’ituina o tagata mai fafo o lo o a’afia i solitulafono eseese i le teritori, pe afai e eseese uma igoa e iloa ai i latou nei i fa’amaumauga a le fa’amasinoga”.

Na taua e Graf i le fa’amasino, o lo o galulue pea le ofisa o Femalagaaiga i le taumafai lea e fa’aleleia la latou polokalame lea e saili ai faamaumauga mo tagata e ulufale ma toe ulufafo mai le atunu’u.

Ae ina ua toe fesili Kruse ia Graf pe na te silafia ua fa’aleleia mo’i lea auaunaga a le Ofisa o Femalagaaiga, na tali le ali’i loia “ou te le iloa.”

Ina ua fesiligia e le Samoa News, na taua e Graf e fa’apea, o lo o galulue pea le malo i se auala e foia ai le faafitauli e pei ona atugalu i ai le faamasinoga, ina ia taofia ai le toe ulufale mai o tagata mai fafo ua ta’usala i solitulafono mamafa i le teritori, e mafua mai i le eseese o latou igoa e tuu i totonu o faamaumauga a le faamasinoga.

O se tasi o auala na taua e Graf o le a mafai ai ona foia lea faafitauli, o le auala lea ua amata faamalosia e le Ofisa o Leoleo i le taimi nei, o le faia lea o faamaumauga i alofilima (finger printing) mo so o se tasi e taofia ma tuuaia i solitulafono eseese, faapea ai ma le pu’eina o latou ata ae tuu i faamaumauga a le ofisa o leoleo, ina ia iloa ai le tagata moni ma lona igoa.

Na taua e le Komesina o Leoleo ia William E. Haleck i sana tusi sa tuuina atu i Leoleo uma o le matagaluega i le vaiaso na te’a nei, ua tatau nei ona amata fa’amalosia le usitaia lea e leoleo o ta’iala o lo o faatino ai tiute fa’aleoleo i so o se setete ma teritori o le Iunaite Setete, o le pu’e lea o ata ma lolomi ata o alofilima o tagata e taofia faapagota i so o se taimi, ina ia mautinoa e mafai e faamaumauga nei ona fesoasoani i faamaumauga a le ofisa o leoleo atoa ai ma le fa’amasinoga.