mo le Kerisimasi ...

Na fefiloi lagona fiafia ma le fa’agae’etia o tama ma tina matutua, i le matagofie o le polokalame a le kovana lea na fa’ataunu’uina i le taeao ananafi i le maota o le Fale Laumei i Utulei, fa’apitoa lea mo tagata matutua uma i le atunu’u.

Na tatala lava le polokalame i le malu taeao na tapena i ai le malo, tauala atu i le Ofisa o Tagata Matutua, ma vaaia ai laufofoga fiafia o nai tama ma tina matutua ina ua maua le avanoa e feiloa’i ai ma uo ua tele aso e le i mafuta.

“O se polokalame ese lenei polokalame talu ona auai i polokalame a tagata matutua i le atunu’u, e le gata o se avanoa lelei ua feiloa’i ai ma uo ma aiga, ae o se avanoa fo’i ou te lagonaina ai le fa’atauaina o matou nei o tagata matutua, e le ali’i kovana ma le faigamalo a Amerika Samoa”, o le molimau lea a le tina matua ia Leata Fiso, 75 tausaga o lona soifua.

Na atili ai ona fiafia tagata matutua ina ua tatala lava le polokalame i fa’afiafiaga ma siva faa Samoa, a o lumana’i ai le amata aloaiaina o le polokalame i le itula e 9:00 i le taeao.

“O ituaiga polokalame nei e fiafia i ai tagata matutua, e le gata o polokalame e maua ai le ata, ae o polokalame fo’i e tele ai taumafa aua o le vai su lena a le isi toeina ma le isi olomatua, o le laualo lava ma le tama o i le lagi”, o le saunoaga lea a Tele’a Utuone, o se tama e 64 tausaga le matua mai Tafuna.

Ae ina ua fesiligia e le Samoa News le tina o Afitu Lemuelu, 71 tausaga o Pago Pago sa auai i le polokalame ananafi, pe ua sauni e talia lana meaalofa ua tapena e le kovana ma le faigamalo, na te’i le tina matua ma fa’apea mai, “Ou te le iloaina e maua ni meaalofa, ae afai e maua sa’u meaalofa, ai lava se seki, o ai na ilu ilu ma talo talo e vave maua sa’u meaalofa mo lenei kerisimasi”.

Saunoa le afioga i le ali’i Fa’atonusili o le Ofisa o TAOA ia Ale Tifimalae i le Samoa News e fa’apea, sa le i manatu le Ofisa e to’atele fa’apea tagata matutua e autova’a atu i le polokalame, ae o se itu e fa’agae’etia ai lona loto ina ua molimauina le to’atele o tama ma tina matutua na mafai ona fa’atasi atu i le aso ananafi.

“O le taua lava o lenei polokalame, ia maua e nai tama ma tina matutua le fiafia, aemaise ai fo’i o le avanoa e feiloa’i atu ai i le Tama o le atunu’u pe a o o i taimi o fa’afiafiaga”, o le saunoaga lea a Ale.

Na tau fai pati pati le aofia ina ua ulufale le aifoga i le ali’i kovana ia Lolo Matalasi Moliga i totonu o le maota, mo le amataina o le polokalame.

E 1,000 le aofa’i o meaalofa na tapena e le malo e tufatufa atu i tama ma tina matutua, o a latou meaalofa lea mo le kerisimasi o lenei tausaga.

O le tele o meaalofa e aofia ai laei, taumafa ma le anoanoa’i lava o ituaiga meaalofa eseese sa tapena mo nai tagata matutua.