Na pisapisao totonu o le Falesa a le falema’i o le LBJ i Fagaalu i le pati pati o Tausima’i i le taeao ananafi, ina ua mae’a le saunoaga a le afioga i le ali’i faipule ia Faimealelei Anthony Fu’e Allen e fai ai o ia ma sui o le Komiti Fa’afoe o le LBJ, ma ia taua ai le tatau lea ona faia ni si’itaga i totogi o Tausima’i i Amerika Samoa.

O le afioga a Faimealelei na fai ma sui o le Taitaifono o le Komiti Fa’afoe o le LBJ e saunoa i le sauniga na faataua ai le tautua a Teine ma Tama Tausima’i i le taeao ananafi, ina ua le paau atu le tofa a Leilua Mase Akapo o le ta’ita’ifono o le Komiti, o le saunoaga fo’i lea e atoa i ai saunoaga fa’apitoa e ono sa fa’atulaga mo le aloaiaina o le tautua a Tausima’i i lenei tausaga.

A o le i saunoa le ali’i faipule mai Aua e fa’atatau i le tatau lea ona faia se si’itaga i totogi o Tausima’i, sa ia mua’i fa’afetaia le tautua le fa’alogologo tiga o lo o ofoina atu e Tausima’i i le aso ma le po, e tautua ai le atunuu e sulu atu i le maota o sulu faiga mo se lavea’i.

“O ai lava e sulu mai i le maota lenei o outou lava e muamua tau mai i ai, e tatala atu o outou aao mafola ma ofo atu i ai le tautua le fa’alogologo tiga, o le mafuaaga lena e taua ai la outou galuega i tagata uma,” o le saunoaga lea a Faimealelei.

I le tulaga o le siitia o totogi o Tausma’i, na saunoa ai Faimealelei e fa’apea, o se tasi lenei o mataupu o lo o ia finauina pea i luma o le Komiti Fa’afoe, ona o se tasi o mataupu taua ua leva na tatau ona silasila i ai le Komiti mo sana fa’aiuga mautu.

“Ou te le o fai atu i le mataupu lenei i le siitia o a outou totogi ona o se manatu fa’a polokiki, ae o le mea moni lava outou Tausima’i, ua leva tele ona ou taumafai e una’i le mataupu lenei i luma o le Komiti, ona e le talafeagai le mamao o le va lea ua i ai totogi o Foma’i ma totogi o outou Tausima’i,” o le saunoaga lea a Faimealelei na tau fai pati pati ai Tausima’i sa i ai i le sauniga.

Saunoa le ali’i faipule e fa’apea, e le talafeagai le mamao o le va ua i ai totogi o Tausima’i ua silia i le ta’i 40 ma le ta’i 50 tausaga o tautua, ma totogi o foma’i fa’atoa o mai nei i lalo o konekarate ma latou maua totogi maualuluga.

“Ua ou fautuaina le Komiti Fa’afoe ina ia aofia ai le siitaga o Tausima’i i le paketi a le falema’i mo le tausaga tupe 2015 o lo o loma nei,” o le isi lea saunoaga a Faimealelei na toe fa’alogoina ai le tau fai pati pati o Tausima’i, ae na atili ai ona fa’aauau le saunoaga a le ali’i faipule ma ia taua e fa’apea, “E taua la outou galuega i totonu o le atunuu i so o se taimi ma so o se aso, aua o outou e muamua tau mai ai le tagata ma’i fa’atoa alu e vaai le foma’i.”

Na toe fa’afetaia e Faimealelei ia Tausima’i i le galuega fita o lo o latou fa’atinoina i aso taitasi.

Sa ia taua fo’i e fa’apea, ua tatau ona siitia i se isi la’asaga le tulaga o le tali atu a le falema’i i le auaunaga a Tausima’i.

“E leai se aoga e tele ai mea faigaluega e fa’atino ai galuega a Tausima’i ae le lava Tausima’i e galulue i le galuega, e leai fo’i se aoga e tele ai Tausima’i e galulue ae laiti o latou totogi, lona uiga e tatau ona paleni vaega uma nei mo le manuia o la outou pito laau,” o le saunoaga fa’ai’u lea a Faimealelei.

Ina ua tula’i le Fa’atonusili o le Matagaluega o le Soifua Maloloina ia Motusa Tuileama Nua mo lana saunoaga fa’apitoa, sa ia fa’aamuia ai i Tausima’i a le LBJ ona o le fa’amanuiaga ua folafola latou te mauaina, fa’atasi ai ma lana saunoaga, “Afai e maua siitaga o totogi a Tausima’i o le LBJ, ona manuia lea o i latou, a uma, ona fai fo’i lea o se talosaga a le Soifua Maloloina mo se siitaga o totogi a ana Tausima’i, ina ia manuia ai fo’i matou.”

Na taua e ni isi o Tausima’i sinia i le Samoa News e fa’apea, e ui e taua i lo latou fa’alogologo atu taumafaiga a ta’ita’i mo se tulaga manuia mo i latou, ae le taofia ai lava le ofoina atu o le latou tautua mo le atunuu i so o se taimi e mana’omia ai.

“E le o le totogi le autu o le tautua a Tausima’i, o le alofa i tagata uma ae fusia i le fia auauna mo le atunuu,” o le saunoaga lea a se tasi o Tausima’i e le i finagalo e fa’ailoa lona suafa.

Sa ia taua fo’i e fa’apea, “o se tasi o fa’ailoga e atagia mai ai lo matou naunau i le galuega ae le o le totogi, o ni isi o i matou e aofia ai a’u nei ua ofo atu matou taimi e galulue ai mo le ta’i 20 itula i le falema’i, ae na o le ta’i 8 lava a matou itula o lo o totogi.”