I le fa’aiuga o le fa’amasinoga iloiloga a James Barlow i le aoauli ananafi, na finau ai le loia a le malo ia Tiffany Oldfield i ali’i fa’amasino ina ia fa’amaonia moliaga uma e 18 o lo o tu’uaia ai e le malo le ua molia.

Peita’i i le fa’afinauga fa’aiu a le loia a Barlow ia Christopher D. Meek, sa ia fa’ailoa ai le le tatau lea e le fa’amasinoga ona fa’amaonia tu’uaiga fa’asaga ia Barlow, ona o le fete’ena’i o fa’amatalaga a molimau sa valaauina e le malo.

O Barlow, 67 tausaga le matua, o lo o tu’uaia i moliaga mamafa e aofia ai lona faia o amioga fa’asotoma, faia o uiga mataga i tamaiti e laiti i lalo o le tulafono, faapea ai ma moliaga mama e pei o le ave ta’avale ‘ona, tuuina atu o le ava malosi i fanau laiti, ma le tu’uina atu o ata mataga i fanau laiti.

FA’AFINAUGA FA’AI’U A LE MALO

I le fa’afinauga fa’aiu a le malo, sa ia taua le lava ma totoe mo molimau sa tuuina atu e tamaiti e to’atolu o lo o aafia e fa’amaonia ai tuuaiga fa’asaga ia Barlow.

Na taua e Oldfield e fa’apea, e atagia mai i le mataupu atoa lenei o le amio lava lea a Barlow sa fai o le avatu o tamaiti laiti e fa’ainu pia i lona fale ma fai i ai uiga mataga, e atagia mai fo’i i molimau a tamaiti sa fesiligia, ua fai si umi o fai le mafutaga a Barlow ma le isi ali’i o le to’atolu na a’afia.

Na taua e le malo e fa’apea, e tusa ai o le molimau a le isi tamaititi e 17 tausaga i le taimi nei, ae sa 14 tausaga lona matua i le taimi na tupu ai le fa’alavelave, o ia sa niniva lana vaai i lana fagupia e tasi sa inu, ae ave loa o ia e Barlow i totonu o lona potu moe ma fai ai uiga mataga ia te ia.

Ina ua mae’a ona faia e Barlow uiga mataga i le tamaititi lea, sa ia tuu i ai le $5 ma fai i ai, e aua ne’i ona ta’uina i se tasi le mea sa tupu.

“Sa usita’i le tamaititi i le tala a Barlow, na te le i tauina fo’i i se isi le mea sa tupu e o o lava i le taimi na taofia ai e leoleo latou i le po lea”, o le finau lea a Oldfield, ma ia taua foi faapea, na taua uma e molimau le latou o ma Barlow ma fa’atau mai pia i le faleoloa, ma latou toe fo’i atu ai i le fale ma fai ai loa le latou inuga pia.

I le tuuaiga o le ave ta’avale ‘ona o lo o tu’uaia ai Barlow, na finau ai le malo e fa’apea, sa manino lelei i molimau a ali’i leoleo e to’atolu na fesiligia, sa latou molimauina le mumu o mata o Barlow i le po na taofi ai lana ta’avale, sa tau le manino fo’i lana tautala, atoa ai ma le malosi o le manogi pia na alu atu i lona gutu, ma o ia elemeni uma e atagia mai ai se tagata sa ia tagofia le ava malosi.

FA’AFINAUGA FA’AI’U A LE ITU TETE’E

Na tatala lava le fa’afinauga fa’ai’u a le itu tete’e i le fa’ailoa lea e le ali’i loia ia Meek le tele o itu e fete’ena’i ai fa’amatalaga a molimau sa valaauina e le malo, e le gata i tamaiti e to’atolu o lo o tuuaia na aafia ae faapea foi i molimau a leoleo.

O ni isi o vaega na taua e le itu tete’e e fete’ena’i ai molimau, o lo o fai mai molimau e to’alua o totonu o le potu na fa’atino ai e Barlow uiga mataga ia te i latou uma e to’atolu, peita’i fai mai le molimau e to’atasi o luma i le potu malolo na fa’atino ai gaioiga mataga sa latou faia ma Barlow.

O le isi itu na finau i ai le itu tete’e, o le molimau a le isi ali’i fai mai e leai ni ata leaga na ki i le TV i le po atoa lea, sei vagana ai le MTV sa latou matamata ai latou uma e to’atolu fa’atasi ai ma Barlow.

Na taua fo’i e le itu tetee le eseese uma o taimi na taua e tamaiti na aafia na latou agai atu ai i le faleoloa mo le faatauina mai o ni isi a latou pia, atoa ai ma le eseese o ituaiga pia sa latou taua na faatau mai e Barlow.

I le tuuaiga o le tuuina atu o ata leaga i fanau laiti, na taua ai e Meek e fa’apea, e lei tuuina atu e Barlow ni ata leaga i alii e toatolu o lo o tuuaia na aafia, aua o le ata sa ki i le fale o Barlow, ae o alii nei na o atu lava latou e fia eva i le fale o Barlow.

Afai fo’i o lo o finau le malo i ata leaga o lo o tuuaia ai le ua molia, sa tatau ona latou aumaia ata e avea ma mea molimau o lenei mataupu, po o ni isi foi meatotino a Barlow e lagolago ai a latou tuuaiga, peitai e le i mafai e le malo ona fa’atino lea tulaga.

MOLIMAU MULIMULI

O le molimau mulimuli lava na valaau e le itu tete’e i le taeao ananafi, o se tama’ita’i loia sa galue i le Ofisa o le Loia Fautua a le malo, o ia lea o Leslie Cardin, o ia fo’i lea sa avea ma loia fautua mo ali’i talavou e to’atolu na a’afia, i le taimi na molia ai i latou i le moliaga o le tagofia o le ava malosi ae lei atoa le 21 tausaga le matututua.

Ina ua fesiligia e Meek ia Carlin sa ia taua ai e fa’apea, e tutusa lava fa’amatalaga sa tuuina atu e tamaiti e to’atolu na a’afia ia te ia ma le latou molimau sa ave i le loia a le malo o [Terri] Bullinger lea o lo o taulimaina mataupu a fanau laiti i luma o le fa’amasinoga fa’aitumalo, e lei faia e Barlow ni uiga mataga ia te i latou.

Na mae’a le konekarate a Cardin ma le Ofisa o le Loia Fautua i le masina o Iuni 2013, ma toe malaga atu ai ma faaauau lana tautua fa’aloia i le setete o Georgia, peita’i na samania o ia e le itu tete’e ina ia avea ma latou molimau i le mataupu lenei, o le mafuaaga lena o lona toe oo mai i le teritori.

Ua taoto atu nei se faaiuga o lenei mataupu i ali’i fa’amasino mo sa latou fa’aiuga.

O le afioga i le ali’i fa’amasino sili ia Michael Kruse o lo o fa’afoeina lenei mataupu, i le lagolago sua a afioga i ali’i fa’amasino lagolago ia Logoai Siaki ma Fa’amausili Pomele.