Na tula’i le afioga i le tamaitai faipule ia Vui Florence Saulo ma finau i luma o le maota o sui i le vaiaso nei e faapea, ua o o i le taimi ua tatau ai ona fai ni siitaga i totogi o tagata faigaluega, ma ia toe tatala fo’i le faa faigaluegaina o tagata faigaluega i le atunu’u.

O lea finagalo mai le faipule na afua mai i se molimau mai se sui o le Ofisa o Femalagaaiga, i le silia lea i le 10 tausaga e le i toe faia lava se siitaga i totogi o tagata faigaluega a le Ofisa o Femalagaaiga.

I le taimi o folafolaga a le maota o sui, na talosagaina ai loa e Vui le tatau lea ona toe tatala le tulaga o lo o taofia ai le faa faigaluegaina o tagata i totonu o le malo.

Saunoa Vui e fa’apea, o le faafitauli o le taofi o le faa faigaluegaina o tagata atoa ai ma le taofi o siitaga o totogi o tagata faigaluega, na amata mai i nofoaiga ua mavae atu.

“O nai tagata faigaluega o lo o aafia [i le leai o se sii i totogi] o tagata faigaluega e maualalo le tamaoaiga i totonu o latou aiga, o i latou foi nei o lo o pito sili ona pagatia i maualuga ua i ai le tau o le soifuaga, ma ua tatau ona i ai se fesoasoani mo i latou nei”, o le saunoaga lea a Vui.

Sa ia taua fo’i e fa’apea, o tagata foi nei sa latou filifilia sui mamalu o itumalo taitasi i totonu o le fono, e tatau foi ona fesoasoani atu le fono mo i latou nei.

I le taimi o le iloiloga a le Komiti o Mataupu Tau Tulafono a le maota o sui na taitaia e Vui, na saunoa ai le afioga i le alii faipule mai Aua ia Faimealelei Anthony F. Allen, ma ia saunoa e lagolago le tatau lea ona fai ni siitaga i totogi o tagata faigaluega a le malo e aofia ai ma le Ofisa o Femalagaaiga.

Saunoa Faimealelei e fa’apea, o tagata faigaluega nei o lo o galulue i le ao ma le po, i le faamalosia o tulafono a le malo mo tagata mai fafo e nonofo faasolitulafono i le atunuu.

“Afai e le galulue i latou nei, o le a pagatia Amerika Samoa ma aafia tulafono tau femalagaaiga, o le taua lena o le tautua a i latou nei, e tatau fo’i ona maua ni siitaga i a latou totogi”, o le saunoaga lea a Faimealelei.

Ae na saunoa Vui e fa’apea, e ui o lo o taofia e le malo le toe faa faigaluegaina o ni tagata, ae foliga mai i le paketi o le tausaga tupe fou 2015, e tusa ma le 300 galuega fou faa konekarate o lo o faailoa mai ai, i ni totogi pito sili ona maualuluga, ae o galuega mo tagata o le atunuu e le o ni totogi tetele latou te maua.

Na faaiu le saunoaga a Vui i lona talosagaina lea o le maota o sui, ina ia alofagia le tagi mai o le atunuu i tulaga o galuega ma siitaga o totogi.