I le agaga o le fa’afetai sa talia ai e le puleaga o le falema’i LBJ i Fagaalu le foai e $13,000 mai le StarKist Samoa mo galue i le Pediatric Clinic ma Pediatric Ward mo le fa’amoemoe e fesoasoani tele i le fa’apasese maia o foma’i fa’apitoa mo ma’i fatu, lea ua fa’ailoa mai, ua silia ma le 300 a tatou fanauiti ua mae’a va’aia e foma’i e i ai afaina o latou fatu.

E tusa ai ma le foa’i sa o’o atu le ali’i pule sili o le Star Kist Samoa, Sangdong Kwon, ma le sui pule sili Fa’afo’i Palepua ma isi sui iloga e fa’ao’o atu, na fa’ailoa ua pa’u laititi mai lea foa’i mai le $15,000 mai i le tausaga ua tuana’i, peita’i, o le agaga o le foa’i ua matele lava le sao o le aufaigaluega ma le kamupani, ae o le foa’i mai atigi apa mai faleoloa sa maua ai na’o le $1,700.

I le saunoaga a le Kwon sa ia fa’ailoa ai, “Ou te fiafia e sapaia le fa’amoemoe mo a tatou fanau, ina ia mafai ona fa’ao’o mai foma’i mo latou togafitiga. Ou te alofa fo’i i tagata faigaluega uma a le Star Kist sa foa’i mo lenei galuega lelei fa’apea ma matou pa’aga uma, fa’afetai.”

O le leo lava e tasi sa fa’ao’o atu ai e le susuga Palepua le foa’i i le fa’asamoa, ae maise o pa’aga a le Star Kist sa latou galulue fa’atasi i lenei foa’i, “Ia maua e i tatou le agaga alofa e fa’ao’o ai i a tatou fanau se fa’amoemoe e gafatia ona togafitia o latou gasegase, ma te’a ese ai, a’o le’i matutua i latou ma tino mai ni mea lelei latou te faia mo le atunu’u. Fa’afetai foa’i.”

I se tulaga o fa’amaumauga, ua fa’ailoa mai ai, e 300+ le aofai o fanauiti, lalo ane o le 15 tausaga o lo’o ua nofo va’ava’aia ma tusia igoa i le lisi o e ua matauina e i ai afaina i o latou fatu, ma e mo’omia ona faia talavai ta’i lua vaiaso, tolu masina ma le ono masina i nisi, e fuafua i le tulaga o matauina i o latou fatu.

Peita’i, e to’a 20 ua mae’a va’aia ma e leai lava ma se mea e toe popole ai fua matua, tau o le va’ai toto’a o latou tausami ia le so’ona mamafa o latou tino. O le to’a 108 na va’aia e foma’i mo aso e 4 sa faia ai talavai, ua i ai nisi o le fanau e ao ina malaga i fafo mo togafitiga, nisi e fa’aauau ona faia pea iinei a latou talavai, ma ‘aua lava ne’i misia, ma nisi e ta’itolu masina ma toe siaki iinei, ae o nisi e ta’i ono masina ma faia talavai iinei, e toe siaki atoatoa ai po’o a mai o latou fatu.

O le a toe malaga mai fo’i foma’i fa’apitoa o le fatu, ina ia toe sailia nisi fanau o e ua lisia suafa mai talavai fa’atautaia pea a le Pediatric  Clinic. Ua fa’ailoa mai e Dr. Beth Parker o le Ped. Clinic, “O lo ua i ai le vasega o gasegase o le a malaga i fafo mo togafitiga, ma o lo’o ua mae’a saunia lelei aiaiga uma mo latou togafitiga mo’omia, peita’i, o lenei fo’i foa’i ua fa’ao’o mai i le agaga lava o le fa’afetai, e fa’ao’o atu ai e le matou Pulega i le LBJ Medical Center nei, fa’afetai tele lava!”