O le aso Lulu na fa’atulaga ai se foa’i e le Ofisa o le Sui o Amerika Samoa i le Konekeresi, Aumua Amata Coleman Radewagen e fa’auia i le susuga Troy Polamalu ma le latou aumalaga, ae ua fa’atutu aga’i i le Matagaluega o Tupulaga Talavou ma Tama’ita’i (DYWA).

O lea foa’i ua fa’ailoa mai, sa aumaia o se fa’amomoli a se tasi o talavou mai Maryland, e fia fa’ao’o mai i Amerika Samoa mo le ‘ ASHSAA Football.

Peita’i, ona o lenei vaitaimi ua i ai fo’i le alo lauiloa o Amerika Samoa i o tatou laufanua mo lana fesoasoani sili ua ia faia mo tupulaga uma o lo’o fia maua feso’ota’iga ma ni Kolisi i fafo e fa’aauau ai a’oa’oga, o lea sa finagalo ai le afioga Pulu Ae Ae Jr, ina ia fa’auia lea fesoasoani mo le vasega o fanau laiti e fa’aaoga ai latou taimi a’o faia a’oa’oga fa’apitoa a tina i masini Komipiuta i le tatou Faleta’alo fou.

O le aofaiga o nei Tablets e 20 masini e ta’i 12-inisi le tetele, ae 20 fo’i tablets e ta’i fitu inisi le tetele. Ua fa’ailoa mai e le susuga le sui fa’atonu, Pa’u Roy Ausage, “O le aoga fo’i o lenei foa’i, o le a le fa’apito augafa i ni na’o ni alo o le atunu’u, ae o le a maua le avanoa lelei mo alo uma o le atunu’u e fia fa’aaogaina e a’oa’o ai i latou, a’o fa’atautaia a’oga a latou tina i masini Komipiuta i totonu o le potu fa’apitoa mo ia masini i le Faleta’alo Fou mo Tupulaga ma Tama’ita’i i Pago Pago.”

O le afioga Pulu sa ia taua’aoina lea foa’i e fa’auia atu ia Troy Polamalu ma le Fa’asamoa Initiative, ma taua’ao atu ai i le Taiulu o le Matagaluega o Tupulaga ma Tama’ita’i mo le latou fa’aaogaina.

I se saunoaga a Polamalu e tusa o lea foa’i, sa ia fa’apea ai, “E fa’afetaia lava le agaga foa’i o nisi o lo’o latou manatunatu i tupulaga talavou o Amerika Samoa, so’o se foa’i, itiiti pe tele, e tatau ona tatou iloa lelei, e ao ina fa’aaogaina tatau mo le fanau a le atunu’u, ina ia fai se aoga o le gapatia o sui na latou foa’i mai. Fa’afetai i lena talavou mai Maryland, ua ia manatu mai i alo o Amerika Samoa, ina ia si’itia le atamai i nei fo’i ituaiga o tomai o le talutalu fou, tau ina ia aoga le foa’i mo fanau e maua ai le atamai saili.”

E ese mai lea sa saunia e le Ofisa o Aumua Amata le Tanoa matagofie ma ie lavalava Samoa mo Polamalu ma le aiga, e avea fo’i ma ni fa’amomoli pe o se fa’aoso. Sa foa’i fo’i e le susuga le Pule o le Aufaigaluega a le Sui i le Konekeresi i le teritori se fasi laueleele o lona fanua Sa Pulu i Pago Pago, ina ia fa’atuina ai se nofoaga mo le Polamalu Foundation i le lumana’i.

“O lena laueleele, afai e te finagalo ai, e mafai ona fa’atuina ai se Ofisa autu po’o sou maota e te alaala tumau ai ma le aiga, ae a le lumana’i ma ni au malaga e fai mai i le tatou malo” o se saunoaga lea a Pulu.

Peita’i, sa ata le ali’i Pro-Football ma ia fa’ailoa mai, “Ou te fa’afetaia meaalofa fa’apenei, aua ou te iloa e le lau maua nei ituaiga o foa’i, peita’i, fa’afetai tele lava, o le a fa’agasolo pea fuafuaga, atonu e i ai se aso, ona toe faliu mai lea i lena fo’i foa’i.”