O le taeao ananafi na tauaao ai e le Pulega o le Falema’i a le LBJ i Fagaalu faatasi ai ma sui o le malo se foa’i mai le Ekalesia a Iesu Keriso o le Au Paia o Aso e Gata ai (LDS), tauala mai i le Sosaiete o le Aualofa, lea e galulue mo le ofoina atu o fesoasoani mo tagata mafatia ma moomia se fesoasoani.

O le afioga i le sui Kovana ia Lemanu Peleti Mauga na fai ma sui o le malo e taliaina lenei foa’i, lea na tauaao atu e sui o le Ekelesia sa malaga mai i Amerika, i se sauniga puupuu sa faia i le falema’i i Fagaalu.

O le foa’i e aofia ai ni masini se lua (mammography & biopsy), lea e faaaoga e saili ai le gasegase o le kanesa o le susu mo tina ma tama’ita’i i le atunu’u, ma ua maea ona tuuina atu nei masini i le vaega e faia ai togafitiga mo le atunuu.

Na taua e le faletua ia Linda K. Burton, o ia lea o le Peresetene o le Sosaiete o le Aualofa a le Ekalesia i le lalolagi atoa, o le faia e le falemai o le LBJ o le tautua e saili ai le gasegase o le kanesa o le susu mo tina uma i Amerika Samoa, ua latou ofoina atu se olaga fiafia i fanau teine uma i le atunuu, aua e tele le avanoa e aafia ai fanau teine i ituaiga gasegase nei pe afai e aafia o latou tina i le kanesa o le susu.

Na faamatala e Mrs. Burton ana granddaughter e toalua o lo o i ai, e 5 tausaga o le isi ae 2 tausaga o le tasi (o le fanau a lana tama tama), e 50/50 le avanoa e aafia ai i latou i le kanesa o le susu i le lumana’i, ona o le tina o le la tina o lo o aafia o ia i le kanesa o le susu i le taimi nei.

Fai mai Burton, “O masini nei ua mafai ona matou foa’i atu mo le LBJ atoa ai ma isi falema’i eseese i totonu o Amerika, o le a mafai ona faasaoina ai ola o fanau laiti o lo o aafia o latou tina i lenei gasegase, e aofia ai ma nai a’u granddaughter ia e to’alua.”

Na faamatala e Burton ni isi o tautua a le Ekalesia o lo o mafai ona ofo atu e ala i le aoaoina o fanau mai le ta’i 18 masina seia oo i le ta’i 12 tausaga, ma faasolosolo atu ai lava le aoaoina o i latou mai isi vasega seia oo ina avea ma tagata matutua.

Na faafetaia e Burton le tautua a le LBJ o lo o ofoina atu i tagata uma o le teritori, aemaise lava i tina ma tama’ita’i o lo o autova’a atu e faia siaki i o latou tino ina ia mautinoa e le o aafia i ituaiga gasegase nei.

Ae na taua e se isi sui o le Ekalesia na malaga mai mo le tauaaoina o lenei foa’i,  le faletua Rosemary M. Wixom, le peresetene o le faalapotopotoga mo fanau iti po o le Peraimeri, e faapea, e le na o Amerika Samoa ua mafai ona oo atu i ai lenei fesoasoani a le lotu Mamona ae ua faasafua solo i le tele o atunuu o le lalolagi, e aofia ai ma Samoa ona o le afa na aafia ai i le faaiuga o le tausaga na te’a nei.

I le avea ai o ia ma tina o tamaitai e to’alima, na taua ai e Wixon le tatau ona ia faasoa atu masini nei, ina ia puipuia ai tamaitai uma o le lalolagi e aofia ai ma Amerika Samoa o lo o i ai le avanoa e ono aafia ai i lenei gasegase faigata.

“O tatou uma o fanau a le Atua, o le mafuaaga foi lena e tatau ai ona tatou faasoa atu le fesoasoani i soo se tasi o lo o manaomia le fesoasoani, ina ia mautinoa e maua e lea tagata le ola ona o la tatou tautua,” o saunoaga faaiu ia a Wixon sa lagolagoina e le susuga a Elder. F. Michael Watson, o se tasi o sui o le Fitugafulu a le Ekalesia LDS.

Na faamanino e Elder Watson e faapea, mai le tele o taimi latou te asiasi mai ai i Amerika Samoa, latou te molimauina pea le manaoga o lo o feagai ma le falema’i i Fagaalu, ma o le latou foa’i ua tuuina mai, o le a tali ai manaoga ua leva ona nonofo ma ni isi o le atunuu o lo o aafia i nei gasegase.

Sa ia taua foi e faapea, afai e talanoa soo tagata kerisiano i le upu o le Faatuatua ae le faatinoina i galuega, e le aoga lea tulaga, sei vagana ua faatino e ala i le aapa atu ma fesoasoani.

O le taitaifono o le Komiti Faafoe a le LBJ ia Sandra King-Young ma Lemanu na saunoa e talia aloaia le foa’i a le Ekalesia.

Na taua e Sandra e faapea, o lenei foa’i, o le a mafai ona fesoasoani i le luitau tele lea o lo o feagai ma le komiti a le LBJ, talu ona tofia i latou e le kovana e galulue i lenei galuega i le aso 18 Ianuari.

Fai mai Sandra, e tele lu’itau o lo o fetaia’i ma le komiti faafoe e pei o le tulaga o tupe, tautua aemaise ai o auala e fesoasoani atu ai i le atunuu, peitai o masini ua foa’i e le Ekalesia, o le a faamama ai le isi vaega o nei lu’itau.

Na faafetaia e Lemanu ia ta’ita’i o le Ekalesia LDS i Amerika Samoa, ona o  tautua e tele mo le malo ma ona tagata, e aofia ai le faamamaina o le Stadium i Tafuna i taimi e maea ai Sisiga Fu’a a le atunuu i tausaga taitasi, ma le faamamaina o nofoaga eseese i le atunuu ao feagai ma le taligamalo a Amerika Samoa mo le Arts Festival i le 4 tausaga talu ai, atoa ai ma le faamamaina pea o le Fanua Tanu a le malo i Satala, e ala i le moaina o le vao ma faamama le otaota i le tele o aso.

Saunoa Lemanu e faapea, o galuega o lo o faia e le Ekalesia, o taulaga ofo uma ia mo le Atua.