O le aso Tofi na te’a nei sa taua’ao aloa’ia ai e le peresetene o le asosi soka i Amerika Samoa (FFAS), ia Faiivae A. Galea’i le meaalofa tupe e $5,000 i le afioga i le kovana sili, Lolo Matalasi Moliga, e fesoasoani i le fausia o le faleta’alo o lo ua toetoe mae’a lelei nei i le nofoaga sa i ai le Fale Korea i Pago Pago.

O se ‘aiga i le aoauli sa alofaiva i ai le mamalu o le Ofisa o le FFAS i le latou Ofisa autu lea e tuaoi lelei ma le faleta’alo fou lea, sa faia ai lea fa’atasiga taua, ma taua’ao aloaia ai le meaalofa lea.

Na faliu le afioga le Kovana, ma talia le fa’aolooloma’au a le afioga le Maluolefale ma fa’apea atu, “Ona o lo’o outou feagai fa’atua’oi lava i Pago Pago, e fa’aulu sa’o lava fanoga i le fa’asologa o ta’aloga i le faleta’alo ma le taimi o avanoa ai mo lo tou fa’amoemoe, e leai se afaina i le malo o lau talosaga. Peita’i, ua e manatu mai fo’i i le fausaga ma le fa’aaupegaina o le faleta’alo mo ta’aloga eseese ma fuafuaga o le a fa’atautaia ai i totonu, ua lelei lea tulaga i le malo.”

O lenei faleta’alo ua fausia ma le fuafuaga ina ia tautuaina ai le tupulaga talavou o le atunu’u, ma o le a vaaia lenei fale taalo e le Matagaluega o Tina ma Talavou. O lea poloketi o se malilie faatasi a le malo o Amerika Samoa ma le malo o Indonesia sa foai le $300,000 ae fesoasoani atu i ai tupe a le malo o Amerika Samoa.

O lo’o fausia lea galuega e le Paramount Builders.

POLOKALAMA FAAMALOSI TINO

Ua ofi mai nei i Amerika Samoa le polokalama faamalosi tino e taua ‘Let’s Move” o se polokalama faatulai e le faletua ia Michelle Obama, e fesoasoani ai i fanau aoga i setete ma teritori o Amerika.

“O le polokalama lenei sa afua mai i le polokalama na fitaituga i ai le faletua o Michelle Obama, peita’i, na talosagaina e le Ofisa o le Soifua Maloloina, fa’aofi mai fo’i o se tasi o mea e tatau ona fa’aofi i le soifua i aso ta’itasi o le fanau a’oga laiti ma fa’asolo atu ai i matua ma le mamalu faigaluega o le atunu’u,” o se tala lea a le susuga ia “Miki” sa avea ma sui e faatautaia polokalama fa’amalositino a le American Samoa Cancer Coalition. .