O le pasia ai e le maota o sui o le pili e toe teuteu ai vaega o le tulafono tau Femalagaaiga, lea e le mafai ai e se kamupani ona latou toe talosagaina ni tagata mai fafo, se’i vagana ua fa’amalieina isi vaega o le tulafono, ua atagia mai ai le taumafai o le Fono Faitulafono e foia le mama o lo o tula’i mai i se vaega o tulafono tau Femalagaaiga, lea ua leva ona avea ma manu’a i le teritori i le tele o tausaga.

Na fulisia afioga i faipule e lagolago lenei tulafono ina ua faitau fa’atolu i le aso Lua na te’a nei, i le mae’a ai lea o iloiloga sa faia e fesiligia ai le aano moni o lenei tulafono, ma ua tu’u atu nei la latou pili i le maota maualuga mo sa latou fa’aiuga.

Ae o le vaiaso fo’i na te’a nei na faia ai se iloiloga a le Komiti o Mataupu Tau Tulafono a le Senate e fa’atatau i le mataupu lava lenei, lea fo’i na molimau ai le Loia Sili ia Talauega Eleasalo Ale.

I lalo o le Tulafono 41.0408 tuai o lo o i ai i tagata e mafai ona latou talosagaina tagata mai fafo, o lo o taua ai le mafai e tagata Amerika Samoa uma ma kamupani ua fai pisinisi i Amerika Samoa.

Ae o le suiga fou o le tulafono lea ua pasia e le maota o sui mo pisinisi, se’i vagana ua fa’amaonia e le Loia Sili se pisinisi latou te talosagaina ni tagata mai fafo, ona fa’atoa talia lea i lalo o aiaiga nei.

Ia mafai e le kamupani po o le pisinisi ona tausi tagata mai fafo o le a aumai; ia lava le itu tau tupe a le kamupani; ia fa’amaonia le vave ona totogi o lafoga a le kamupani, ae afai o se kamupani fou, ia mautinoa e lelei gaioiga uma e fa’atino e lea kamupani mo le atina’e o Amerika Samoa.

E le mafai fo’i e se kamupani ona ia toe talosagaina se tagata mai fafo, pe afai o lea tagata e i ai sana pule pe a’afia fo’i i le puleaina ma le fa’atautaiga o le kamupani, e pei o se vaega o lo o inivesi i le kamupani, tagata o lo o i ai sana siea i le kamupani, o ia o le fa’atonu o le kamupani po o se tasi fo’i na te umia se tulaga fa’a ofisa i totonu o le puleaina o le kamupani.

O se tasi o suiga i le tulafono lea ua pasia e faipule, e le mafai ona toe fesuia’i tagata e talosagaina le nofomau o le tagata mai fafo, pe afai ua mana’o le kamupani sa latou aumaia le tagata mai fafo e fa’amuta le aia sa latou talosagaina ai le tagata mai fafo.

I se isi fa’aupuga, afai loa e fa’amuta e le kamupani le aia sa ia talosagaina ai le tagata mai fafo, ona toe fa’afo’i loa lea o le tagata lea i le atunu’u na sau ai, e aunoa ma le fesuia’i atu i le isi kamupani e talosagaina ona pepa faigaluega.

Na taua e le loia sili i luma o le senate i le vaiaso na te’a nei, o se tasi lea o fa’afitauli ua tele tausaga o fetaia’i ma le malo i tulaga o kamupani latou te talosagaina tagata mai fafo, o le leai lea o se puipuiga i le auala e talosagaina ai nei tagata mai fafo e ulufale mai i le teritori.

E talitonu fo’i le loia sili, o se tasi lea o mama sa i ai i le tulafono, sa mafai ai ona soona ulufale mai tagata mai fafo aemaise lava i atunu’u Asia e galulue ma ave galuega i Amerika Samoa.

O le agaga o le faigamalo, o le mafua’aga e ala ai ona tatala pisinisi ma kamupani fou, ina ia maua ai e tagata Amerika Samoa le avanoa e faigaluega, ae le o le o mai o tagata mai Asia ave galuega ae o lo o tau saili ni galuega a tagata o le atunu’u.