FA’ALAUILOA ASO MO FA’AALIGA A LE AUFAI FA’ATOAGA

O le aso 26-27 Novema 2014 lea ua fa’alauiloa e le Fa’atonusili o le Ofisa o Fa’atoaga a le malo, e fa’ataunu’uina ai le Fa’aaliga a le Aufai Fa’atoaga a le atunu’u mo lenei tausaga, i le malae o le Su’igaula a le Atuvasa i Utulei, le nofoaga na fa’atinoina ai le fa’aaliga o le tausaga ua te’a.

E le gata na fa’alauiloa e Lealao M. Purcell lea fuafuaga a le Matagaluega, ae sa ia talosagaina fo’i sui uma o le kapeneta a le kovana ina ia auai e lagolago lea fa’amoemoe taua, ina ia silasila mai fo’i le aufai fa’atoaga o lo o malosi le lagolago atu a le faigamalo.

Na fautuaina e le alii kovana ia Lolo Matalasi Moliga faatonusili ma ofisa taitasi, so o se gaioiga ma polokalame a le malo e faia, e tatau ona auai tagata uma ina ia iloa ai o lo o tutu faatasi le faigamalo e lagolago ana polokalame faataoto mo le manuia o le atunuu.

TAPENA LE MALO MO FA’AFIAFIAGA MASANI O LE KERISIMASI

Ua taoto atu le faatulagaina o se polokalame a le malo mo le Kerisimasi o lenei tausaga, i afioga i ali’i fa’atonusili ia Laloulu Dr. Uta Tagoilelagi ma Fagafaga D. Langkilde, ina ia mautinoa ai e lava se taimi e tapena ai le malo mo lea polokalame masani.

Na taua e le afioga i le alii kovana e faapea, e tatau ona vave logo le malo i se polokalame faataoto mo le kerisimasi ua lata mai, ina ia silafia ai foi e tagata uma a latou tapenaga mo lenei polokalame taua.

O le polokalame o pesepesega a le malo mo le kerisimasi na te’a nei, na tu’u atu ai le avanoa i aufai pese a autalavou, ekalesia ma mafutaga latou te tapenaina ai fa’afiafiaga eseese mo le atunu’u, ao sauni atu e fa’amae’a galuega o le tausaga 2013 na se’i mavae atu nei.

TELE FA’ALETONU I LE FALE O LE MALO I UTLEI, LE EOB

Na taua e le alii kovana i luma o le kapeneta i le latou fonotaga i le aso Lua na te’a nei, le tele o se fa’aletonu o lo o maitauina i le fale o le malo i Utulei, le EOB, e le gata i le fa’aletonu o totonu o ofisa, ae faapena fo’i i faletaele ma isi vaega uma o le fale, ma ua mana’omia ai le tatau lea ona faia aso faigaluega faapitoa a le malo, e galulue ai ofisa uma o lo o i ai i le EOB mo le fa’amamaina o le fale.

Na taua e le tofa Malemo Tausaga e fa’apea, o le faafitauli o lo o mafua ai ona fa’aletonu le EOB, o tagata faigaluega lava a le malo, i le la’u i ai o meaai i totonu o ofisa ma teu solo i pusa toso poo vaega eseese o le fale, ona avea lea ma itu e maua ai ma le isumu. Na fautuaina e Malemo fa’auluuluga o matagaluega ma ofisa uma a le malo, ina ia fautuaina tagata faigaluega e aua nei toe avea ni meaai i totonu o ofisa.

Na lagolagoina e Lolo le saunoaga a Malemo e tusa ai o fa’aletonu o lo o tula’i mai i le EOB i le taimi nei.

O le aso Faraile o le vaiaso fou e pei ona saunoa Lolo, ua fa’atulaga e avea ma aso galue a le malo mo le EOB, i lalo o le taitaiga a le afioga i le Fa’atonusili o Ofisa Tau Pulega a le malo ia Malemo Tausaga, ma le Fa’atonusili o le AS-EPA ia Ameko Pato.