Ads by Google Ads by Google

Fuafua e le kovana se lafoga mo le malae va’alele

O se tasi o pili tupe ua fuafua le faigamalo a Lolo ma Lemanu e tu’uina atu i luma o le Fono Faitulafono, o se pili lea e fa’aee ai le lafoga mo le malae va’alele, lea e totogi e tagata e malaga ese atu ma le atunu’u (departure tax).

 

I se fa’atalatalanoaga a le Samoa News ma le afioga i le ali’i kovana ia Lolo Matalasi Moliga i le vaiaso nei, sa ia fa’amaonia mai ai le galulue o le faigamalo i le tu’u fa’atasia o le tele o pili tupe e tu’uina atu i le Fono Faitulafono, e aofia ai ma le pili e fa’avae ai le lafoga o le malae va’alele.

 

“O le lafoga lea ua fuafua mo le malae va’alele, ua fuafua e fa’aleleia atili ai le auaunaga a le malae va’alele, ae o le 50% o lea tupe o le a fa’aagaga e aveese mai ai tane suau’u o lo o i le malae va’alele, ae si’itia atu i se nofoaga e saogalemu ai”, o le saunoaga lea a le ali’i kovana i le Samoa News.

 

Na taua e le alii kovana i se tasi o fonotaga a le kapeneta ua mavae atu e fa’apea, ua leva ona taoto le fautuaga mai le vaega a le feterale, le FAA, ina ia aveese tane suau’u o lo o i ai i le malae va’alele i Tafuna, e le saogalemu mo le soifua o tagata i le taimi e tula’i mai ai se fa’alavelave.

 

E ese mai i le lafoga i le malae va’alele, o le isi pili tupe lea ua fuafua le faigamalo e fa’aulu i le Fono Faitulafono, o le pili e fa’aee ai totogi mo tautua a le malo o lo o ofo atu mo pisinisi uma i le atunu’u.

 

Na fa’amanino atili e le alii kovana e fa’apea, e ova i le sefulu le aofa’i o Ofisa a le malo o lo o aga’i atu i tua e fa’atino la latou tautua mo pisinisi uma i le atunu’u, e aunoa ma se tupe a le malo o maua mai ai.

 

Saunoa atili le tofa i le tootoo ia Lolo e fa’apea, o le isi pili tupe o le a o fa’atasi ma le pili e fa’aee ai totogi o tautua a le malo mo pisinisi, o le pili lea e si’i ai le totogi o laisene pisinisi.

 

“O le taimi nei, e tiga lava ona tele naua galuega e fa’atino e le malo mo pisinisi tua, e na o le $25 le tupe a le malo e maua mai ai mo le totogi o le laisene pisinisi, o isi la ia pili tupe ua fuafua e tu’uina atu i le Fono Faitulafono, ina ia fesoasoani ai i le fa’aleleia o le tautua a le malo mo le atunu’u”, o le isi lea saunoaga a le ali’i kovana.

 

Na fa’ai’u le talanoaga ma le ali’i kovana, i lona talosagaina lea o ta’ita’i o le fono faitulafono, ina ia fa’anatinati sa latou fa’aiuga i pili tupe ua mae’a ona tu’uina atu, ina ia vave pasia ma vave fo’i ona fa’amalosia e le malo nei tulafono.

 

I luma o le fono faitulafono i le vaiaso nei, na fautuaina ai e ta’ita’i o maota e lua ta’ita’i o komiti ta’itasi aemaise lava i komiti o lo o taoto ai pili tupe a le faigamalo, ina ia fa’anatinati iloiloga mo nei tulafono, ina ia vave faia i ai se faaiuga ae le i malolo le fono mai ana galuega o lo o fa’agasolo i le taimi nei.