Ua i ai se fuafuaga a le malo o le a faia se sauniga fa’apitoa e aloaia ai tulaga maualuga na mafai ona ausia e ‘au ta’aalo a le atunu’u, lea sa fai ma sui o Amerika Samoa i taaloga a le Pasefika i Papua Niu Kini i le masina o Iulai na te’a nei, fa’apea ai ma taaloga a le Olimipeka mo i latou e i ai manaoga fa’apitoa o le tino (Special Olympics).

E le gata o se sauniga fa’apitoa o loo vaavaai i ai le malo e aloaia ai tulaga maualuga sa mafai ona ausia e ‘au ta’aalo a le atunu’u, ae o loo i ai fo’i le fuafuaga a le malo mo le tufatufaina atu o ni meaalofa tupe, e fai meaalofa atu ai ia i latou sa fa’amanuiaina i pine.

I se fa’atalatalanoaga a le Samoa News ma le afioga i le ali’i kovana i le aso Faraile o le vaiaso na te’a nei, na fa’amaonia mai ai e le tofa i le Tootoo ia Lolo Matalasi Moliga le fuafuaga.

Saunoa le ali’i kovana e fa’apea, o lenei fuafuaga ua leva ona mafaufau i ai, ina ia faia se sauniga e fa’afetaia ai e le malo ana tama fanau sa fai ma ave fu’a a le atunu’u i ta’aloga a le Pasefika ma le Lalolagi, ina ia momoli atu ai i ‘au ta’aalo le feau, o loo amanaia e le malo lo latou tautiga i le tu’uina lea o le igoa o Amerika Samoa i luga, e ala i pine sa mafai ona latou ausia mai ta’aloga eseese sa tausino ai.

“Pau le itu lea e tuai ai ona fa’ataunuu le polokalame, se’i toe taliu uma mai i le atunu’u ‘au ta’alo sa tausinio i ta’aloga a le lalolagi, e pei o le tatou ‘au lea sa malaga i le ‘Special Olympic’, a taunu’u uma mai loa ‘au ta’aalo, ona fuafua ai loa lea o se aso e fa’ataunu’u ai le fa’amoemoe,” o le saunoaga lea a le ali’i kovana i le Samoa.

Sa ia taua fo’i e fa’apea, o le Matagaluega o Tupulaga, Tina ma Tama’ita’i lea ua taoto atu i ai le fa’apolokalameina o le fa’amoemoe.

“O lea ua taoto atu i le afioga i le ali’i Fa’atonusili ia Jonathan Fanene ma lana Matagaluega mo le fa’apolokalameina o le fa’amoemoe, afai loa e taunu’u mai le latou polokalame i le auala e fa’atautaia ai le sauniga, atoa ai ma ni nai meaalofa tupe mo ‘au ta’aalo, ona ou sainia loa lea ma fa’ataunuu le polokalame,” o le saunoaga lea a le ali’i kovana.

O le mataupu e fa’atatau i se fuafuaga a le malo mo le tu’uina atu o ni meaalofa tupe mo ‘au ta’aalo pe a manuia lo latou taumafai, na ulua’i fesiligia ai e le Samoa News le afioga i le ali’i kovana, ina ua toe lua vaiaso malaga le ‘au ta’alo a Amerika Samoa i taaloga lona XV a le Pasefika i Papua i le masina na te’a nei, peita’i o le saunoaga a le ali’i kovana, “se’i vaavaai atu lava i ai, e tele le naunau e fai ni mea lelei mo nai alo ma fanau, ae o loo tulaga fa’aletonu lava le itu tau tupe a le malo i le taimi nei.”

O le fesili la pe ua tulaga lelei ea le itu tau tupe a le malo, ina ia mafai ai loa ona fa’atupe e le malo nai meaalofa tupe laiti mo ana ‘au ta’aalo, o le tali e pei ona fa’ailoa mai e le afioga i le ali’i Fa’atonusili ia Fanene, fa’apea ai ma lona sui lagolago, le afioga a Pa’u Roy Ausage i le Samoa News i le aso Faraile na te’a nei, “o loo tulaga fa’aletonu pea lava le itu tau tupe a le matagaluega i le taimi nei, peita’i, o loo vaavaai pea i se auala e mafai ai ona fa’ataunu’u le fa’amoemoe.”

Na fa’amaonia mai e Pa’u i le Samoa News, ua mae’a ona fa’ataoto le polokalame mo ‘au ta’aalo, ae o loo fa’atali mo se tupe e fa’atino ai lea manaoga.

Ae na saunoa le afioga i le ali’i fa’atonusili ia Fanene e fa’apea, o le polokalame o loo fuafua e faia e aofia ai le solo a Ta’avale Teuteuina, lea ua fa’amoemoe e aga’i mai i le taulaga ma fa’amautu uma i le nofoaga o le Youth Center i Pago Pago, o iina fo’i lea ua fa’amoemoe e fa’ataunuuina ai le sauniga e aloaia ai ‘au ta’aalo a le atunu’u.

Afai ae taunu’u le fuafuaga mo meaalofa tupe, e tolu vaega ua fuafua i ai le tufatufaina atu o ia meaalofa tupe, o ‘au ta’aalo mo Ta’aloga a le Pasefika, au si’isi’i mo Ta’aloga a le Oceania Weightlifting Championship (OWC), ma le ‘au ta’aloga sa tausinio i ta’aloga a le Olimipeka (Special Olympic) i Los Angeles i Amerika.

O lo o i ai fo’i le fa’amoemoe o le matagaluega, o le aso Faraile o le vaiaso nei ua fuafua e fa’ataunuu uma ai lenei fa’amoemoe, peita’i, o loo fa’alagolago lava i se saunoaga mai le ali’i kovana.