E ui i le tele o atugaluga mai ni isi o le atunu’u e aofia ai ma ni isi o afioga i faipule, e fa’atatau i fuafuaga a le malo e fa’atula’i le Faletupe fou mo le Teritori lea e fa’atupe mai i tupe o le Pone a le malo, peita’i na taua e le sui ta’ita’ifono a le Komiti o le Pone a le malo i luma o le maota o sui i le taeao ananafi, “o se tala fiafia lenei mo le atunu’u, o le masina o Setema ua fuafua le malo e tatala ai le tatou Faletupe fou”.

Ae ui o se tala fiafia lea mo le to’atele o le atunu’u o lo o latou mana’omia auaunaga fa’a faletupe, peita’i na taua e le afioga i le Sui Fofoga Fetalai ia Fetu Fetui Jr e fa’apea, e le tatau i le malo ona latou manatu mama i le fa’amoemoe e tatala le auaunaga a le Faletupe fou, ae tatau ona fa’aeteete ma vaavaai fa’alelei ina ne’i tula’i mai se fa’aletonu i le lumana’i, ona sili ai loa lea ona afaina le atunu’u.

“Ou te ioe e fai se faletupe, ae o popolega ia ou te nofo ma a’u, ou te iloa e laina tutusa uma ai isi afioga i faipule ma le atunu’u atoa, ina ne’i faaletonu tupe maua a le malo e totogi ai le aitalafu o le Pone, tapuni kamupani i’a, ona faaletonu atu ai loa lea ma le faletupe, ae le o ni tupe laiti ia e talanoa i ai tatou, o ta’i miliona e o o atu lava i le sefulu miliona”, o le saunoaga lea a Fetui Jr.

O le mataupu i le fa’atuina o le Faletupe fou a le malo, (Territorial Bank of American Samoa), o se tasi lea o mataupu na mafai ona fesiligia ma fa’asoa i ai afioga i faipule ma molimau a le malo, i le taimi o le iloiloga a le Komiti o le Tamaoaiga a le maota sa faia i le taeao ananafi, e fesiligia ai sui o le Komiti o le Pone a le malo i auala o lo o fa’agasolo ai le totogiina o tupe o le aitalafu a le Pone, atoa ai ma le fa’aaogaina o tupe o le Pone.

O sui o le Komiti o le Pone na molimau e aofia ai le Taitaifono, le Teutupe a le malo ia Ueligitone Tonumaipe’a, faapea ai le sui ta’ita’ifono, le Pulesili o le Pulega o le Eletise ma le Suavai ia Utu Abe Malae.

Na faamanino e Utu i luma o le komiti a le maota o sui e fa’apea, e 39 la’asaga mo le faatula’iina o le Faletupe o lo o galulue i ai le soa komiti o lo o galulue mo le fa’atula’iina o le Faletupe fa’apea ai ma Faufautua mai Amerika i auala e tatau ona ausia mo le faletupe.

O le la’asaga muamua lea ua fa’amoemoe e fa’ataunuuina i le masina lenei o Mati, e aofia ai le tofiaina o sui o le Komiti Fa’afoe e faatautaia le Faletupe, ma o lea fo’i ua mae’a ona tofia e le kovana i latou e galulue i lea tulaga.

“A mae’a loa ona tofia le komiti faafoe e faatautaia le faletupe ma pasia, ona agai atu loa lea i le isi laasaga e aofia ai le tofiaina o le Pulesili o le Faletupe, fa’atula’i ta’iala ma tulafono e lima ta’ita’iina ai galuega a le faletupe, tofia le aufaigaluega, seia oo atu lava i le tatalaina o le faletupe i le masina o Setema o le tausaga nei”, o le saunoaga lea a Utu.

Na faamanino atili e Utu e faapea, e tutusa lava atugaluga o lo o popole i ai le atunuu ma le Fono fa’apea ai le Komiti o le Pone, i ni lu’itau e ono fa’alavelave ao aga’i atu le malo e fa’atino ana galuega ua fuafuaina mo le Faletupe, peita’i, o le faia ma le fa’autatua, fa’amaoni ma mulimulita’i i tulafono, o a’upega ia o lo o fa’aaoga e le komiti ina ia mafai ona taunu’u ai i le manuia ana fuafuaga fa’ataoto, ma avea ai le Faletupe fou lenei o se faletupe e tua i ai le atunu’u i le lumana’i.

Na faaiu le iloiloga i le talosagaina lea e Fetui Jr o molimau, ina ia tatala foi ma se lala o le faletupe fou lenei i Ofu ma Fitiuta e tua i ai tagata o le itumalo o Manu’a.