O ni isi o suiga tetele ua fuafua le malo e fa’ataunu’u i le tausaga fou lenei i le fa’aleleia o le itu tau i le soifua maloloina o le atunu’u, e le gata ia fa’alautele le tautua a le Ofisa Medicaid ina ia mafai ai ona fesoasoani le vaega o lo o maua e lea ofisa mo le falema’i, ae ua manatu fo’i e taofi le lafoga o totogi e 2% o lo o tipi mo le falema’i o le LBJ.

O le vaega tupe o lo o maua mai e le LBJ i le lafoga e 2% o lo o tipi mai totogi o tagata faigaluega i le atunu’u, o lo o fa’atupe ai le polokalame lea e auina atu ai gasegase i fafo mo togafitiga.

O se tasi o mafua’aga o lo o taua i le ripoti a le malo ua tauaao e le Fono Faitulafono, ua mafua ai ona manatu e taofi le lafoga o totogi e 2%, ona e na o tagata faigaluega o lo o pagatia i le totogiina o le lafoga lea, ae le o aofia ai tagata faigaluega ta’ito’atasi o lo o totogi i tinoitupe.

O le gagana o lo o taua i le tulafono ina ua pasia e le Fono Faitulafono, o tagata faigaluega uma lava o lo o maua a latou totogi i totonu o Amerika Samoa, e tatau ona tipi ese mai le 2% mai o latou totogi.

Ua fuafua le faigamalo e fa’aulu se tulafono fou i luma o le fono mo ni isi alaga tupe e fa’atupu ai tupe o le a le toe maua e le LBJ mai le lafoga o totogi e 2% o le a taofia.

E le o mautu mai i le taimi nei po o afea tonu lea ua fuafua le malo e fa’aulu ai se tulafono e fa’amuta ai le lafoga 2%.

O le isi vaai mamao a le malo mo le fa’aleleia o le itu tau i le soifua maloloina, o le fa’amalosia lea o le itu tau tupe ina ia ausia ai manaoga o lo o tula’i so o mai pea e pei o le le lava lea o foma’i, teine tausi ma’i, atoa ai ma tagata e i ai agava’a fa’apitoa o lo o mana’omia e le falema’i.

Ua amata nei ona auiliili e le Ofisa o le  Medicaid auala uma atoa ai ma tulafono o lo o i ai, e mafai ai ona fa’amalosia le itu tau tupe ma fesoasoani ai i le foiaina o nei fa’afitauli.

E $3 miliona se vaega tupe ua fa’amatu’u mai e le Ofisa o le Medicaid, tauala atu i le Matagaluega o le Soifua Maloloina ma le LBJ, e fa’atupe ai le tautua e taua o le ‘Electronic Health Record (EHR), e fesoasoani ai i le fetufaaina o fa’amatalaga e fa’atatau i se tagata gasegase, ina ia faigofie ai ona togafiti o ia i so o se falema’i e fia asiasi i ai i le atunu’u.

E $750,000 se vaega tupe ua fa’amatu’u atu mo le Ofisa a le Medicaid, i lalo o le polokalame e taua o le ‘State Innovation Model’ (SIM) e fa’aaoga mo le 12 masina, ina ua talia e le feterale le talosaga a le Medicaid mo se fesoasoani.

O le fa’aiuga o le 2015 e o o atu i le amataga o le 2016 ua fa’amoemoe e mae’a ai le toe fa’afouina o nofoaga o lo o i ai le Operating Room, Labor & Delivery Room faapea ai ma le Intensive Care Unit (ICU), mo le fa’aleleia atili o lea fo’i tautua i le atunu’u.

Mo le motu o Manu’a, ua mae’a nei ona auina atu ta’avale a le EMS mo Ta’u, Ofu ma Olosega, e fa’atino ai la latou auaunaga, ma o lea fo’i ua i ai ma le aufaigaluega latou te fa’atinoina lenei tautua masani.

Ua amata fo’i fesuiaiga a le Matagaluega o le Soifua Malolo i le tulaga o foma’i e galulue i Manu’a, ina ia mautinoa e tali i manaoga a tagata Manu’a i vaiaso ta’itasi.