Ads by Google Ads by Google

Fuafua se pili toe maua ai Fai Faatoaga fesoasoani mai malo

Ua i ai se fuafuaga a le Fa’atonusili o le Matagaluega o Fa’atoaga, o le tauaofiaga lona fa a le Fono Faitulafono lea o le a toe nofoia ia Iulai o le tausaga nei, o le a toe faaulu ai le pili e talosagaina ai le toe faamatu’u mai o le vaega tupe lea sa fesoasoani atu ai le malo i le Aufai Faatoaga, mo le faaleleia o la latou pito laau i tulaga tau faatoaga.

I se talanoaga a le Samoa News ma le tofa ia Lealaosoloata Melila Purcell Jr i le taeao ananafi a’o le’i tu’uva’a ese atu ma le atunuu mo ana fonotaga i le po anapo, sa ia faamaonia mai ai lea fuafauga a lona ofisa, ona o le manatu ia toe faaauau le fesoasoani a le malo mo le aufai faatoaga.

“Ua maea ona tuuina atu le talosaga i le alii kovana ma ua ia taliaina foi le fautuaga ma le faamoemoe, o le masina o Iulai o le a faaulu ai i luma ole Fono le pili e toe talosagaina ai le polokalame lea sa mafai ai ona fesoasoani atu le malo i tausaga ua mavae i le aufai faatoaga a le atunuu,” o le saunoaga lea a Lealao.

O le faanaunauga a le Matagaluega, ia mafai ona fesoasoani atu le malo i le aufai faatoaga i le afa o le tau o vailaau ma soo se tulaga o loo manaomia mo a latou faatoaga ma atina’e.

O lea fuafuaga e pei ona saunoa le alii faatonu, o nisi ia o gaioiga a le Matagaluega a’o sauni atu ai i le faamautuina lea o le Faaaliga o Faatoaga lea ua faamoemoe e faia i le aso 27-28 o Iulai.

Na taua e le alii faatonusili e faapea, o le faaaliga lea ua faatulaga e le matagaluega, o le a faaalia ai soo se gaioiga a le aufai faatoaga e aofia ai foi ma galuega taulima a tina, e aofia ai ma le faaaliga o kuka eseese.

“O fua o faaeleeleaga uma lava o loo toto i le eleele, lea foi na aofia i le Faaaliga sa faia i le 2008, o le a toe aofia foi i le faaaliga o le tausaga nei, faaopoopo ai loa ma meaai vela, o figota o le sami, faapea ai ma galuega  taulima a tina, e le gata foi la i galuega e pei ona taua, ae o le a aofia ai foi ma le faaaliga o lafu manu e pei o meaituaolo,” o le saunoaga lea a le alii Faatonusili.

Na taua e se sui o le Aufai Faatoaga ia Taimane Johnson e faapea, e tatau ona vaavaai le malo i le faaleleia atili lea o faatoaga i le teritori, ina ia gafatia e le aufai faatoaga ona tali atu i manaoga o le atunuu i soo se taimi.

“O le taimi nei, e le o taitai gafatia e faatoaga o loo i ai ona tali le manaoga o le atunuu i le taimi nei, e le gata e le o lava le talo, fa’i, ufi ma isi lava ituaiga fua o faaeleeleaga e toto i le palapala, ae oo fo’i i fualaau aina e le o taitai ona lava,” o le saunoaga lea a Taimane.

“Afai ua mafai e mafai e isi malo o le Pasefika e pei o Tonga, Fiti ma Samoa ona fesoasoani i le faaleleia ma le atinaeina o a latou faatoaga, aisea e le mafai ai e Amerika Samoa ona fai lea tulaga,?” o le saunoaga lea a Taimane.

O tala ua salalau i le fuafua lea o le totoina o le Alaisa i Samoa, o se lu’itau na taua e Taimane ua atili lagaina ai loto o le aufai faatoaga i Samoa ina ia galulue pea i le faaleleia o le latou pito laau.

Saunoa Taimane, o se tasi o faafitauli o loo feagai pea ma le aufai faatoaga i le taimi nei, o le taugata lea o vailaau o loo tausi ai a latou faatoaga, faapea ai ma fatu laau o loo mafai ai ona toto laau ina ia ola ma mafai ai ona faatau atu i le atunuu.

E silia i le toa 200 le aofai o le aufai faatoaga o loo lesitalaina i Amerika Samoa nei, ma o le toatele o i latou ia o loo mafai ona o latou la’uina atu fua o faatoaga mo le School Lunch faapea ai ma isi o loo faatauina atu a latou faatoaga i le maketi fou i Fagatogo.

Saunoa Lealaosoloata, o le vaiaso nei foi na saini ai e le kovana le faatanaga mo le auina mai lea o se container o vailaau ma faalelei eleele mai fafo, e fesoasoani ai i le aufai faatoaga i a  latou galuega faatino.

O se tasi o auala o loo taumafai le malo e galulue faatasi ai ma le aufai faatoaga, o le talosagaina lea o le Ofisa o le Puipuiga o le Siosiomaga (AS-EPA) i se avanoa e toe faatulaga ai ana tulafono i le faia lea o lo’i (saipua’a) mo meaituaolo (pua’a), ona o le toatele o le au fai lafumanu o lea ituaiga, ua mumusu ma faavaivai e toe faaleleia lea atina’e, ona o le lavelave o tulafono a le EPA o loo faafoe ai a latou  galuega faatino.