A’o le’i faamaonia e le Senate i le vaiaso na te’a nei tofiga a le kovana sili mo le tofa i le tootoo ia Velega Savali Jr, e fai ma totino o le Komiti Faafoe a le Falema’i o le LBJ, na folafola e Velega i luma o le komiti e faapea, o se tasi o itu o le a ia taumafai e faatino, o le siitia lea o le tulaga o le tautua a le falema’i i Fagaalu, ina ia mafai ai ona aumaia le tautua a le falema’i mo Fitafita Tuai (VA clinic) e faia i totonu o le LBJ, ma faamanuiaina ai le falema’i i le faitau miliona ma miliona o tupe o lo o faatautaia ai le tautua a le falema’i o le VA.

I le mae’a ai o se iloiloga puupuu na faatautaia e le komiti o le LBJ/Soifua Maloloina a le Senate i le aso Faraile na te’a nei, na pasia ai loa e le maota maualuga tofiga a le kovana mo le tofa Velega i le palota e 11-0.

O le tofa Velega ua sui tulaga ia Tofoitaufa Sandra King-Young sa avea ma ta’ita’ifono o le Komiti Faafoe a le falema’i o le LBJ, lea ua toe tofia e le kovana e avea ma Fa’atonu o le Polokalame o le Medicare ma le Medicaid a le malo.

I lalo o le tulafono, e na o le maota maualuga latou te faamaonia tofiga a le kovana mo sui o le komiti faafoe a le falema’i o le LBJ, ma o le aso Faraile na te’a nei na aloaia ai loa le avea o le tofa Velega ma totino o le komiti faafoe a le falema’i.

Na taua e se sui o le komiti faafoe a le falema’i i le Samoa News e faapea, o le fonotaga a le komiti faafoe i le aso Faraile na te’a nei, na auai le tofa Velega mo le taimi muamua.

I le taimi o le iloiloga na taua ai e le afioga i le ali’i senatoa ia Soliai Tuipine Fuimaono e faapea, e tele naua faafitauli o lo o maitauina i le falema’i i Fagaalu i le taimi nei, e le gata i le maliliu o le toatele o tagata ae le’i o o i le taimi e tatau ai ona maliliu, ae ua maitauina fo’i le to’atele o foma’i ua galulue i le falema’i ae le o mautinoa po o i ai ni a latou laisene fa’a foma’i, aemaise lava i foma’i mai le atu Asia.

Na faamanatu fo’i e Soliai ia Velega le polokalame e ave ai gasegase i fafo mo togafitiga, ina ia toe silasila toto’a i ai ma toe faaauau, ona o le isi lea polokalame o lo o fesoasoani tele i nai tagata lima vaivai o le atunuu.

I le faaiuga o le saunoaga a Soliai, sa ia fautuaina ai Velega ina ia aumai ni foma’i lelei e galulue i le falema’i, ae afai e manaomia le itu tau tupe, ona talosaga atu lea i le fono latou te faatulaga ni lafoga e faatupe ai le totogiina o foma’i.

“Alu laia e galue mo se manuia o le falema’i, ae o le a tapua’i atu le Fono, ua mafua ona faanatinati le aumaia o oe e faapasia, ona ua silafia e le Fono e tele le manaoga o lo o tula’i mai i le falema’i i le taimi nei, ma ua mana’omia fo’i se tagata e mafai ona foia nei fa’afitauli,” o le saunoaga lea a Soliai.

Saunoa le afioga i le ali’i senatoa ia Mauga Tasi Asuega, o ia fo’i lea o le taitaifono o le komiti na faatautaia le iloiloga, o se tasi o faafitauli sa maitauina e le fono i le tele o tausaga ua mavae, o le le galulue faatasi lea o le Matagaluega o le Soifua Maloloina a le malo ma le LBJ, ma o iina le isi mafuaaga o le tula’i mai ai o faafitauli i auaunaga ma tautua ae afaina ai le atunuu.

Ae ui i ia faafitauli, na taua e Mauga se suiga tele ua i ai le galulue vavalalata o le falemai ma le Soifua Maloloina i le taimi nei, talu ona tula’i mai le tofa Motusa Tuileama Nua i le tofi fa’atonusili o le Matagaluega o le Soifua Maloloina, ona o le tele o taimi e telefoni atu ai mo ni isi o faaletonu e maitauina i taumafa o lo o faatau i faleoloa, atoa ai ma faaletonu e tula’i mai i faletaele o fanau aoga, e le umi lava ae tali mai Motusa ua maea ona faalelei faaletonu nei ma ua faia foi i ai suesuega a le latou ofisa.

Na faai’u le saunoaga a Mauga i lona talosagaina lea o Velega ina ia ave lana faamuamua i tagata ma taumafai e fofo faafitauli tau tupe o lo o tula’i mai i le falema’i i le taimi nei.

Ae i le saunoaga mulimuli o le iloiloga mai le afioga i le alii senatoa ia Tuiasina S. Esera, sa ia talosagaina ai Velega ina ia silasila toto’a i le polokalame a le V.A Clinic, lea e faitau miliona tupe o lo o maua mai ai i le malo tele, peitai e le o agavaa ai le falema’i i Fagaalu ona o le maualalo o le tulaga o lo o i ai lana auaunaga.

I le avea ai o ia o se tasi o Fitafita Tuai sa tautua i le taua i Vietnam, na saunoa ai Tuiasina e faapea, e mamalamala lelei lava Velega i le tele o penefiti e maua mai i le tautua a le V.A Clinic, aua o ia fo’i le isi alo o le atunuu sa la i ai i le taua i Vietnam, ma e tatau ona ia galue e saili auala e maua mai ai ia faamanuiaga.

Na faaiu lana saunoaga i lona fautuaina lea o Velega, ina ia silasila i le isi faafitauli o lo o tulai mai i le falema’i, o tagata e le o ni foma’i ae ova atu i le ta’i $90,000 a latou totogi i le tausaga, ma o se tasi lea o auala o lo o tula’i mai ai le faafitauli tau tupe i le auaunaga a le falema’i.

Na faafetaia e Velega fautuaga ma atugaluga o afioga i senatoa mo le falema’i, ae taoto atu se’i alu e vaavaai ona toe logo mai lea o le maota i se isi gaioiga e tatau ona fai.

I le tele ai o taimi o avea o ia ma Teutupe a le malo, na taua ai e Velega e faapea, o le faafitauli numera tasi o lo o feagai ma le falema’i i tausaga taitasi o le le lava o tupe, afai e $10  miliona e tatau ona totogi e le malo i le falema’i i le tausaga, ae uma ane le tausaga na o le $5 miliona ua uma ona totogi, lona uiga o lo o aitalafu le malo i le falema’i i le isi $5 miliona.

Sa ia toe faamanatu i le komiti ni isi o taimi na taofia ai le aumaia o vailaau mo le falema’i mai fafo, ina ua leai se tupe e totogi ai, ma le anoanoa’i lava o isi faafitauli tau tupe.

“Ou te ta’utino atu i le komiti, taoto mai la outou faatuatuaga ia te ia, o le a ou taumafai e siitia le tautua a le falema’i ina ia mafai ai ona aumai le polokalame a le V.A Clinic e faia iinei, ma agava’a ai le falema’i i le tele o faamanuiaga tau tupe,” o le saunoaga faaiu lea a Velega.

O le to’atele o senatoa na maua avanoa e saunoa ai i le taimi o le iloiloga, sa o latou faafetaia le kovana sili ia Lolo Matalasi Moliga, i lona tofiaina lea o Velega e avea ma totino o le komiti faafoe o le falema’i, a’o feagai ai le falema’i ma le tele o faafitauli e pei o le itu tau tupe atoa ai ma tulaga i le fia faia lea o ni faaiuga lelei ma talafeagai mo le manuia o le falema’i.

“Ua sa’o ma talafeagai tofiga a le kovana mo oe Velega e fai ma totino o le komiti faafoe o le falema’i, e le gata e i ai lou tomai i tulaga tau tupe ae o oe fo’i o se ta’ita’i e tumu i le alofa ma le fa’amaoni,” o le saunoaga lea a le afioga i le ali’i senatoa ia Avegalio.

Na faamatala e Soliai le tofa Velega o se ta’ita’i e loto mama toe mamao le tofå, ae fai mai le sui peresetene ia Nuanuaolefeagaiga S. Nua, o Velega o se tagata e finau e fai le mea sa’o toe alofa i le atunuu.