Na taua e le afioga i le ali’i senatoa ia Galea’i M. Tu’ufuli i le taimi o felafolafoaiga a le maota maualuga i le taeao ananafi, e fa’atatau i le tulafono sa talosagaina e le alii kovana e fa’atula’i ai se Faletupe fou mo Amerika Samoa i lalo o le fa’atautaiga a le malo, e le taitai manuia ni atina’e e fai e le malo.

E ui i le taua o le manaoga e pei ona tula’i mai i le atunu’u i le taimi nei, i le matua mana’omia lea e tagata atoa ai ma le malo o se isi auaunaga fa’a faletupe, na saunoa Galea’i e fa’apea, “e le tatau ona a’afia fua le malo i gaioiga tau pisinisi, ma latou taumafai ai e fa’atula’i se faletupe, o atina’e ia e patino i pisinisi tua, ua tele fo’i atina’e e taumafai i ai le malo, e le taitai manuia ia atina’e”.

“Mo se fa’ata’ita’iga o le Faletupe o Atina’e o lo o pulea e le malo i le taimi nei, o le tele o tausaga e fa’amagalo ai le tele o aitalafu a tagata, e fa’apena fo’i i le faletalimalo o le Rainmaker, e le i manuia lona taunu’uga, ma avea ma itu na matua a’afia ai tagata o le atunu’u”, o le isi lea saunoaga a Galea’i.

Ae ui i se lagona o le afioga Galea’i, na momoli lana fa’afetai i le kovana sili ia Lolo Matalasi Moliga ma le faigamalo, ina ua a’e se tofa e tula’i mai e saili se auala e foia ai le fa’afitauli ua tele tausaga o fetaia’i ma le malo, o le fa’aletonu lea o auaunaga fa’a faletupe i le teritori.

E ui i le fesiligia e le Fono Faitulafono o taumafaiga a le kovana ma le faigamalo e fa’atula’i se faletupe fou mo le atunu’u, na taua e Galea’i e fa’apea, o le matafaioi tonu lena na mafua ai ona fa’atauto sui o le Fono Faitulafono, e le gata latou te fau tulafono, ae ia galulue fo’i e saili ni auala e manuia ai le atunu’u.

Na fa’ai’u le saunoaga a Galea’i i lona fautuaina lea o le ta’ita’ifono o le komiti o le Paketi a le maota maualuga ia Laolagi Fonoti Savali Vaeao ma le maota atoa, ina ia fa’aauau pea sailiiliga mae’ae’a a le maota i le mataupu lenei, ina ia fa’avae ai se fa’aiuga mautu e manuia ai le atunu’u, ae aua ne’i faia pei o le mea na tula’i mai i le maota o sui, o le vave pasia lea o le latou tulafono ina ua una’i mai tua e isi tagata.

“E lelei le tulafono ua talosagaina e le ali’i kovana, pau la tatou galuega e fai, o le va’ava’ai i auala e fa’aleleia atili ma teuteu ai ina ia mautinoa e puipuia ai le atunu’u ma le malo i le lumana’i”, o le vaega mulimuli lea o le saunoaga a Galea’i na lagolagoina e le peresetene o le Senate ia Gaoteote Palaie Tofau.

Saunoa Gaoteote e faapea, ua matua mana’omia lava e le atunu’u se isi faletupe e tali mai i manaoga ua fetuleni mai i le taimi nei, pau lona taofi, e tatau ona malamalama muamua le Fono ma le atunu’u a’o le’i fa’atuina le Faletupe o lo o fesiligia, ina ia mautinoa e leai se ma’a e le’i fulia, e leai fo’i se fesili e le’i tali mai ai le faigamalo.

Na taua fo’i e Gaoteote le tele o vaega o le mataupu lenei o lo o popole ma tu’u fesili ai lona manatu, peita’i e le mafai ona malamalama ma maua tali o nei mau fesili, pe afai e le talanoa ma fetufaa’i le maota ma sui o le malo o lo o afua mai ai lenei tulafono.

I le fa’aiuga o lana saunoaga, e le gata sa ia talosagaina le tatau lea ona toe aami le Komiti Fa’afoe o le Pone ina ia oo mai e toe tali i ni isi o mataupu o lo o fia malamalama i ai le Fono, ae sa ia fa’aleoina fo’i ni isi o suiga na te silafia e talafeagai mo le tulafono.

O ni isi o suiga na taua e Gaoteote e tatau ona faia i le tulafono, e le gata sa ia taua lona lagolagoina o suiga a le maota o sui, ina ia aveese le aia e palota ai le Pulesili o le faletupe, a ia aveese uma fo’i le gagana o lo o taua i totonu o le tulafono, lea e fa’apea mai ai, “o totino e to’afitu o le Komiti Fa’afoe a le Faletupe e tofia e le kovana e aofia ai le Lutena Kovana, Teutupe, Fa’atonusili o le Matagaluega o Alamanuia a le malo, fa’apea ai ma sui e to’afa e filifili mai e le kovana mai le atunu’u lautele ma fa’amaonia e le fono faitulafono”.

O le finagalo o Gaoteote, ia aveese tulaga e pei o le lutena kovana, teutupe ma le fa’atonusili o le matagaluega o alamanuia a le malo, ae tu’u i ai le fa’aupuga, “o totino e to’afitu o le komiti e tofia mai e le kovana ma fa’amaonia e le fono faitulafono”, ona o le agaga, ia aua ne’i saisaitia na o sui o le malo e mafai ona avea ma totino o le komiti fa’afoe o le faletupe, a ia tatala le avanoa i le lautelega o le atunu’u e silafia e le kovana o lo o i ai le agava’a e avea ai ma totino o le komiti fa’afoe o le faletupe.

O le isi suiga sa talosagaina e le afioga i le ali’i senatoa ia Magalei Logovi’i, ia aveese mai fo’i i totonu o vaega tupe a le malo o le a tu’uina atu i lalo o vaega tupe e fa’amau ai tupe o pone ia tupe a le litaea.

E talitonu Magalei, ua mae’a ona i ai le tulafono o lo o puipuia ai tupe o le litaea, ina ne’i avea le tulafono fou lea ma itu e fete’ena’i ai ma le tulafono o lo o i ai.

Ae i le finagalo o le afioga i le ali’i senatoa ia Gaea Perefoti Failautusi, sa ia matua teena ai lona lagolagoina o le fa’atuina o se faletupe e le malo, a ia tu’u pea le avanoa i pisinisi tua latou te fa’afoeina ai le fa’avaeina o se faletupe i le atunu’u.

O le itula e 8:30 i le taeao nei lea ua pasia e le komiti e toe faia ai le isi a latou iloiloga ma le komiti a le Pone, mo le talanoaina lava o le mataup e fa’atatau i le faletupe fou o lo o fuafua le malo e fa’atula’i.