O le agaga autu o suiga ua pasia e le Senate mo le pili sa talosagaina e le faigamalo e fa’atautaia ai e le malo se Faletupe fou mo le atunu’u, ia aua ne’i aumaia le malosi fa’amalo e fa’afoe ai le Faletupe fou, a ia saili mai lava i tagata lautele o le atunu’u o lo o i ai le tomai ma le agava’a i tulaga tau tupe, o i latou ia e tatau ona tofia e le kovana ma fa’amaonia e le Fono Faitulafono latou te fa’atautaia ma fa’afoe galuega a le faletupe.

“Aua le aumaia le malosi fa’amalo e fa’afoe ai le faletupe fou lea, a ia filifili mai lava i le atunu’u tagata agava’a e faatautaia le faletupe, ona manuia ai lea o le atuunu’u ma le malo”, o le saunoaga lea a le ali’i peresetene o le Senate ia Gaoteote Palaie Tofau, ina ua saunoa i le taeao ananafi e fa’amalamalama i le Komiti Fa’afoe o le Pone a le malo, le aano moni o suiga ua finagalo i ai afioga i senatoa.

O le taeao ananafi na pasia ai e le maota maualuga i le faitauina fa’alua le pili a le maota o sui e fa’avae ai se faletupe, fa’atasi ai ma suiga, ina ia aveese le fa’aupuga o lo o i totonu o le tulafono, “o totino e to’afitu o le Komiti Fa’afoe o le Faletupe e aofia ai le Lutena Kovana, Teutupe ma le Fa’atonusili o le Matagaluega o Fefa’atauaiga ma Alamanuia a le malo, fa’apea ai ma totino e to’afa e tofia mai e le kovana i le atunu’u lautele”, a ia tu’u i ai suiga nei, “o totino e to’afitu o le komiti fa’afoe o le faletupe e tofia mai e le kovana ma fa’amaonia e le Fono Faitulafono”.

Na faamanino e Gaoteote i sui o le komiti o le Pone e fa’apea, e le tatau ona tamau i totonu o le tulafono ituaiga tagata e tatau ona avea ma totino o le Komiti Fa’afoe o le Faletupe, ina ne’i saisaitia ai le avanoa e tofia ai e le kovana ni tagata e agava’a e fa’atino le galuega.

O le toe filifilia o le lutena kovana, teutupe ma le fa’atonusili o le ofisa o alamanuia ma fefa’atauaiga e avea ma totino o le komiti fa’afoe, e le o se tulaga e talafeagai i le silasila a le maota, ona o i latou ia ua mae’a ona tofia latou te fa’atinoina a latou tiute, ao lea fo’i o le a toe tofia e galulue i le Faletupe.

“Na tofia e le atunuu le lutena kovana e avea ma lutena kovana, e lei filifilia e fai ma totino o se komiti fa’afoe o le faletupe, e fa’apena fo’i i le teutupe ma le fa’atonusili, ua maea ona i ai o la tiute na mafua ai ona tofia laua e le kovana, o fea la taimi e o mai ai e fa’atino tiute fa’a faletupe”?, o le saunoaga lea a Gaoteote i molimau a le malo.

Na fesili le afioga i le ali’i senatoa ia Magalei Logovi’i i le teutupe a le malo, pe toe fa’afo’i uma mai i le faletupe fou lea o le a fa’atula’i e le malo, tautua o lo o fa’atino e le faletupe o le Zion Bank mo le malo o Amerika Samoa, ae na saunoa Ueligitone Tonumaipea, e na o le ‘payroll’ lava a le malo e fa’afo’i mai i le Charter Bank, ae o isi auaunaga e aofia ai ma le ‘direct deposit’ fa’apea ai ma teugatupe a le malo, e fa’aauau pea ona fa’atino e le Zion Bank.

Ina ua fesiligia e Magalei le mafua’aga ua le aumai ai ma teugatupe a le malo e teu i le faletupe fou lea o le a fa’atula’i, ae na tali Tonumaipea, o le fautuaga sa tu’uina mai e ni isi e malamalama i tulaga tau faletupe, e tatau ona teu tupe a le malo i se faletupe a Amerika, toe puipuia fo’i i lalo o tulafono a le FDIC.

O le faletupe a le ANZ Bank e le o se faletupe a Amerika ae o lo o puipuia e le FDIC, peita’i o le Charter Bank lea o le a fa’atula’i e le malo, e le o puipuia i lalo o tulafono a le feterale, le FDIC.