Na taua e le afioga i le alii peresetene o le Senate i se vaega o lana saunoaga, ao fetufaa’i le komiti soofaatasi o le paketi a le fono e faatatau i le paketi a le malo i le taeao ananafi, tusa lava po o ai finagalo le fiafia o le atunuu e faatatau i siitaga o totogi a le fono, e le avea lea ma itu e taofia ai galuega lelei e tatau i le fono ona fai.

Ao fetufaai senatoa ma faipule e fa’atatau i suiga o le paketi a le malo, sa aofia ai i finagalo fa’aalia le ono aafia atu ai ma le paketi a le fono, pe afai e fai suiga e faaitiitia ai tupe lotoifale o lo o valoia e le malo e tatau ona maua i le tausaga tupe fou 2015.

Saunoa Gaoteote Palaie Tofau e fa’apea, e leai se mea e tau toe fesiligia ai fua e tagata le paketi a le fono ua uma ona pasia, ae foliga mai ua tele naua le muimui o le atunuu i le pili a le fono.

“E le aumaia le muimui o tagata e taofi ai mea lelei e tatau ona fai e le Fono, aua fo’i tatou te fefefe e fai le mea sa’o e tatau ona fai”, o le saunoaga fa’amalosi lea a Gaoteote.

Ina ua toe maua le isi avanoa o Gaoteote e toe saunoa ai i luma o le komiti, sa ia toe fesili fa’aataata i le maota o sui, pe ua fai sa latou fa’aiuga i le pili a le senate lea ua pasia e sii ai alauni a senatoa ma faipule, ae na tali fuaitau le fofoga fetalai ia Savali Talavou Ale, o lo o i ai le taofi o se taimi o i luma e fai ai se finagalo o le maota e faatatau i lea mataupu.

O le vaiaso na tea nei na faaalia ai e le toatele o ni isi o le atunuu o latou finagalo tetee faasaga i le tulafono e sii ai alauni a senatoa ma faipule, ona o le latou talitonuga, e le tatau ona sii totogi o le Fono Faitulafono ao lea e oi tagata faigaluega lima vaivai i le maualalo o latou totogi, aua o le paketi a le fono o lo o faatupe mai i tupe lotoifale, lea e aofia ai lafoga o lo o maua mai i tagata faigaluega i le atunuu.

Na fa’aigoa e ni isi o le atunuu na maua le avanoa e talanoa mai ai i le Samoa News siitaga o alauni a senatoa ma faipule, o se gaioiga le alofa ma le ai afu, ina ua latou vaai ifo lava i latou mo lo latou lava lelei, ae ua le silasila i le lautele o le atunuu.

Saunoa le afioga i le alii faipule ia Faimealelei Anthony F. Allen i le vaiaso nei i luma o le maota o sui e fa’apea, e taua ma sa’o finagalo o le atunuu, aua o mataupu faapenei, e le tatau ona vave vave i ai se finagalo o le fono, ae tatau ona fesiligia muamua se finagalo o le atunuu lautele.

Ae na saunoa Gaoteote e fa’apea, o le sii o totogi o le Fono Faitulafono, e le o se galuega e faia e se isi, o le galuega lava e fai e le Fono.