Ads by Google Ads by Google

Gau, Fugafuga, Maisu, Mama’o ma Loli o le Sami

Ua ma’ea ona sainia e le afioga i le kovana sili ia Lolo Matalasi Moliga se Poloa’iga fa’alaua’itele e fa’asa ai mo le ono masina le fagotaina o loli, fugafuga, ma mama’o o le fataifale.

 

Ua mafua lenei fa’asa ona o le popolega ua fagota ma auina ai nei figota o le sami i malo Asia.

 

O le sailiga a le Samoa News, ua o’o lava i le afio’aga o Vatia, ua fa’atalanoaina ai fo’i lea mataupu, aua o afio’aga nei, o lo’o maotua, ma e le mailoa atu lava le faia o fagotaga, ma auina mai i nisi o lo’o fai ma latou lea fo’i faiva o fefa’ataua’iga ma maketi i fafo.

 

“O le mea ua ofo ai, ona ua te’i fo’i i tatou i lenei fa’asa, e i ai lava fa’asa ua mataituina i tulaga o ituaiga i’a, ma ua leva fo’i ona tima’i mai ai le malo, ae o lea ua o’o mai lea fa’asa fa’afuase’i lava, ae ono masina lea ua fa’asa ai.” O se faitioga lea mai se tasi o sui talavou e masani fo’i ma le tai, ae le o mana’o e fa’alauiloa lona suafa.

 

O se tala mai nisi faapea,  “E moni, peita’i, ona ua va’aia le vave tele ona fuli o tagata e fagota nei figota o le sami, o mea nei e tau le taumafaina e nisi, e va’aia lava fo’i i le alititai i so’o se taimi o le ao ae matua fa’ateleina i le po masina ona tolo mai e le ai faifaiva.”

 

Ua malilie mai nei matai, o le a va’ava’ai toto’a i latou ma mataituina fo’i le aufai faiva mo nei mea uma, ia tumau le lelei o le latou fo’i gataifale e pei ona matauina nei.

 

Ua fa’aalia  e le Matagaluega o le gataifale ma le vaomatua, “O mea nei afai ae le toe maua i le alititai, e faigata ona ola isi i’a e tele aua o i latou nei e aoina le tele o mea i le alititai, o nisi o ia mea e pe ai i’a, pe o’ona i i’a, ae o meaola ia e tausamia na mea, ia mama o isi i’a le gataifale. O le latou lea matafaioi na fausia ai e le Atua foafoa, ia paleni lava le tatou si’omaga.”

 

Peita’i, o le fugafuga ua auina atu i Sapani, ma o lo’o fa’atau atu mea’ai e fa’aaogaina ai i se tau taugata lava, ae ua fa’ailoa mai, a tumu le paelo o nei mea, e na’o le $3 lea e totogi ai le faifaiva, pe tolu tala fo’i i le gau po’o le loli e tasi, ae a fa’atau atu i fafo, e $300 i le figota e tasi. O se fa’amatalaga aloaia lea mai le sui o le matagaluega o Faigafaiva ma le Vaomatua.

 

Ona o lea ua taumafai ona fa’ailoa le poloa’iga fa’amalosi a le Kovana Sili e tusa ai o lea fa’asa, ae ua fa’ailoa mai sa ta’amilo fo’i le vaega su’esu’e a lea vaega i le aso Faraile talu ai, ma maua ai lava, o lo’o fa’aauau na fagotaina e tagata le loli, fugafuga, gau, maisu, ma mama’o ma ua latou fa’ao’o ia i latou le fa’autaga ua faia nei.

 

“E le gata i lea, ae ua i ai fo’i le aufai Oloa lea na fa’aulu ai le faitoto’a mo fefa’ataua’iga ma fafo, ua mae’a fa’ailoa ia i latou le tulafono, ua tamau fo’i le mau, afai ae toe maua se fafatala, fa’amaonia so latou auina atu i fafo o nisi uta o fugafuga, gau, loli, maisu ma mama’o, o le a fa’ae’e loa ia i latou le fa’asalaga e le fa’amasinoga.” O se tala mai lea a le Ofisa.

 

Ua talosagaina fo’i le mamalu o le atunu’u, afai e va’aia ua fagogota nisi ma se paelo, i le gataifale i so’o se taimi lava, ia fa’ao’o mai se vala’au ina ia sailia po’o a i’a o le faiva o lea sui e sui tofia o le Matagaluega o le Puipuiga o le Saogalemu Lautele po’o le umera o le telefoni  633-4456 i itula faigaluega.