Ads by Google Ads by Google

Gerstenberger: E le o se si’i fou le $20 mo talavai faamama toto

I se faatalatalanoaga ma le Samoa News i le vaiaso nei, na taua ai e le susuga a Mike Gerstenberger e faapea, o le $20 lea ua amata faamamalu e le falema’i mo tagata e asia le potu faamama toto, e le o se siitaga fou, ae o se vaega o siitaga na pasia e le Falema’i talu mai le tausaga na te’a nei.

 

“O le siitaga a le falema’i lea na amata mai i le masina o Iulai 2012, sa aofia ai ma le siitaga lea e $20 mo le potu faamama toto, ma o ia siitaga na faatoa faamamalu ina ua maea iloiloga faalaua’itele a le falema’i ma le atunuu, lea sa faia i le amataga o le masina lea, ae le faapea o ni siitaga fou lea ua matou faia,” o le saunoaga lea a le alii pule e faamanino ai le tulaga.

 

“Talu mai lava le taimi na amata faamamalu ai siitaga a le LBJ i le tausaga na te’a nei, e le’i aofia ai i lea siitaga le $20 lea e tatau ona totogi mo le potu faamama toto,” o le saunoaga lea a Gerstenberger i le Samoa News.

 

“Lona uiga lava, e le o se pili fou ae o le pili ua leva ona pasia peitai o le faatoa faamalosia e le falema’i i le taimi nei,” o le isi lea ana saunoaga.

 

Ae ui i lea faamaninoga mai le pulesili o le falema’i e faatatau i le siitaga fou e $20, e le’i mafai ona ofi gofie i finagalo o ni isi o le atunuu o lo o masani ona autova’a atu e faaaoga le tautua a le potu faamama toto i Fagaalu.

 

“Afai la o se pili tuai ua uma ona pasia, aisea na le sii ai le $20 lea i le taimi na amata ai siitaga ia Iulai o le 2012,” o le fesili fia malamalama lea a se tasi o tama matua e faatolu ona agai atu i le falema’i e faamama lona toto (tulou).

 

Na taua e le tama lea i le Samoa News e faapea, o le siitaga e $20 ua faia e le falema’i, e foliga mai o se tali mai lea i le fuafuaga lea ua faataoto e le kovana fou, ina ia toe faafo’i le tupe sa totogi e le atunuu e vaai ai le foma’i, mai le siitaga fou e $20 i le pili tuai e $10 mo tagata uma.

 

E toalua isi tina na talanoa mai i le Samoa News i le taeao ananafi e faatatau i le siitaga fou lea a le potu faamama toto, ma o la faaalia ai le faateia o i laua ina ua oo atu e vaai le foma’i ae faailoa ane le pili e tatau ona totogi.

 

“O lea foi ua toe faaee mai lenei avega, ae o lea e tau totogi tupe mo isi foi tautua a le falema’i, ua le iloa la e le atunuu poo fea o le a sulu i ai mo se fesoasoani,” o le tomumu lea a le isi tina matua e le’i finagalo e faailoa lona suafa, e le’i mana’o fo’i e pu’e sona ata ao i ai i luma o le potu faamama toto.

 

Ae na faamanino e le alii pule o le LBJ e faapea, o le $20 lea ua amata totogi e tagata i le taimi nei, e le o le totogi e vaai ai le foma’i, ae o le totogi mo le faaaogaina o mea faigaluega a le falemai (facility fee)