Na taua e le taitaifono o le Komiti Fa’afoe o le Ofisa o Fesootaiga a le malo (ASTCA) ia Roy J.D. Hall Jr, i luma o le komiti soofaatasi o le paketi a le Fono Faitulafono, sa i ai atoa lona faatuatuaga atoa ai ma lona talitonuga i le ulua’i taimi na avea ai Moefaauo Bill Emmsley ma Pulesili o le ASTCA.

O le afioga i le alii senatoa ia Magalei Logovii ma le tamaitai faipule ia Vui Florence Saulo na fesiligia ia Hall e fa’atatau ia Moeafaauo.

Na fesili Vui ia Hall i le mataupu lea ua faamalolo ai Meafaauo mai le tulaga o le pulesili o le ASTCA, ae o lea sa ia molimau i se iloiloga i luma o le maota o sui i le amataga o le tausaga, ma ia taua ai le la galulue faatasi ma Moefaauo.

Ae na taua e Hall e fa’apea, “e pei ona taua i lau molimau i le masina o Ianuari, sa ou faatuatuaina atoatoa Moefaauo i le taimi muamua, sa 100% foi le ma va, ae o le taimi nei, ua ese foi le tulaga ua i ai, i la’u lea vaai faataitaifono”, o le tali lea a Hall.

Ina ua maua le avanoa o le afioga a Magalei e fesiligia ai le molimau, sa ia toe tuli tatao ai le mataupu e faatatau i le lisi a le ASTCA ma le afioga a Toomata o Leone, lea e pei ona toe talosagaina ai le toe totogi atu e le afioga Toomata o se vaega tupe e $50,000 i le ASTCA.

Na fesili Magalei po o le lisi ma Toomata o lo o faia ma le malo po o le ASTCA, ae na tali Hall, “ou te talitonu o le lisi o lo o i le va ma le malo”.

Na toe fesili Magalei po o le mafuaaga la lea na faate’a ai le pulesili tuai a le ASTCA, ona o le tupe sa totogi mo le lisi, ae na tali Hall, e le mafai ona ia tali atu i le fesili, ona o lea ua mae’a ona i ai le loia a Moefa’auo mo lenei mataupu.

E ui o lo o tumau pea le paketi a le ASTCA mo le tausaga nei faapea ai ma le tausaga fou, o se tasi o mataupu na tele i ai fesili a faipule ma senatoa, o le faaitiitia lea o tagata faigaluega ao lea e faaopoopo le tupe e alu i totogi o tagata faigaluega.

Saunoa le tamaitai faipule ia Vui e fa’apea, e fia malamalama lona sui i le mafuaaga ua faaitiitia ai tagata faigaluega mai le 194 i le 190, ao lea ua siitia le tupe e alu i totogi i le $4.8 miliona mai le $4.5 miliona o lo o i ai.

Na faamanino e le CEO le tumau a le ASTCA ia Aleki Sene Jr e faapea, e ui ua faaitiitia tagata faigaluega, ae o lo o i ai le faamoemoe e ono mafai ona siitia o latou totogi mo le tausaga tupe fou, pe afai e faamanuiaina i latou i aoaoga ua fuafuaina e faalautele ai lo latou iloa i auala e faatino ai galuega.

Ina ua fesiligia e le afioga i le alii faipule ia Vailoata Eteuati Amituana’i le fuafuaga e vave faaola le tautua mo le initaneti i lalo o le BLAST Project o lo o faagasolo i le taimi nei, na taua ai e Sene Jr e fa’apea, o le vaiaso fou lea ua faamoemoe e tatau ona amata faataitai ai lea tautua fou, amata mai i Satala e o o mai i Fagatogo, ae o le masina o Novema ua faamoemoe e toso ai le uaea o fesootaiga i lalo o le sami mo le motu o Manu’a.

O le masina o Iuni 2015 lea o lo o faamoemoe e tatau ona mae’a ai le galuega mai le BLAST project.