Ads by Google Ads by Google

I’u manuia 50 tausaga Konekerenisi Metotisi i Samoa

Ua 'ae mai i fanua le faatautaiina ma le faatamasoaaliiga na alo atu i ai le Ekalesia Metotisi i Samoa, ina ua mae'a le fonotaga a le Ekalesia i le lua vaiaso ua tea na fa’amanatuing ai le 50 tausaga talu ona tu toatasi le Ekalesia Metotisi i Samoa ma atunuu i fafo.

 

Na auai le Afioga i le Ao Mamalu o le Malo o Samoa, Tui Atua Tupua Tamasese Efi ma le Masiofo; le Palemia o Samoa Tuilaepa Sailele Malielegaoi; Lutena Kovana o Amerika Samoa ia Lemanu Peleti Mauga ma le faletua; ma isi malo faaaloalogia i le tatalaina o le ma'a faamanatu o le Ekalesia i Samoa i le aso Sa na tatalaina ai le fono.

 

Na malele Tui Atua e faapea, "O 'au o se tagata Metotisi moni lava, o le tama o lou tuaa o Nelson Taisi lea e iloa lelei lava i nisi o tagata matutua o le Ekalesia, e i ai le afioga i le Peresitene o Aisoli Iuli, o Tupu Folasa, ma Afereti Samuelu ma nisi o tagata ua matutua, o ia o se tagata na sau mai i Peretania e lotu Metotosi, o le ala lena oute fai atu ai o 'au o le Metotisi pauliuli lava. O iina a outou silasila i le mea lea ou te nofo ai, e i ai le Falesa Metotisi i uta i Tuaefu. Ae ave a'i i le malosi o lou tina, lea na i'u ai ina lotu nei i le Katoliko.”

 

O le polokalama sa aofia ai le maa fa’amanatu e manatua ai le 50 tausaga talu ona tu toatasi Samoa mai ia Ausetalia i le tausaga e 1964. O le ma'a faamanatu e i luma o le Falesa poo le Malumalu Sa i Vai'aele i Faga'a, e tu mai i le ituala i uta o le Laumua o le Ekalesia i Faleula.

 

E 15 sinoti maumaututu o le Ekalesia o loo i ai: (1) Apia, (2) Upolu i Sasa'e, (3) Upolu Sisifo, (4) Upolu i Saute, (5) Salafai i Sasa'e, (6) Salafai i Sisifo, (7) Amerika Samoa, (8) Victoria ma Ausetalia i Sisifo, (9) New South Wales, (10) Kuiniselani, (11) Niu Sila i Matu, (12) Niu sila i Saute, (13) Amerika, (14) Hawaii, (15) Ueligitone.

 

Sa amataina le Fono Tele poo le Kokeferenisi i le Aso Gafua i le Lotu Faamanatuga sa auai uma Sea o Sinoti. Ina ua mae'a, ona o lea o Usu-fono i le Maota o le Au'uso Fealofani i Foga'a mo le talanoaina o mau o le Fono i le aso muamua.

 

Sa vaevaeina i komiti e tolu mo le talanoaina o nei mau ma iloilo ai pe pasia ma ave i le va'atele i le aso Lua pe a tuu faatasia o le fono aoao mo le faia i ai o ni manatu i lea mau.

 

Sa i ai Aisoli Iuli, ma le Failautusi o le Ekalesia Aoao o Epineru Talai, o i laua na faafoeina le Fono ma o i laua lena na i ai i le laulauafono, atoa ai ma Alii Sea e toasefululima e fai ma sui e lagolagoina le laulauofono. O Ropeti Faleatua o le Teutupe Aoao a le Ekalesia.

 

O le aoauli i le itula e 4:00 pm na amata ai faafiafiaga saunia mai i Sinoti e sefululima ma aoga a le Ekalesia, pei o le Punaoa College, Uesileana College, Siaosi Palauni Primary School faapea foi le Wesley College mai le Motu tele i Salafai, ia ma le Techical College mai Satupaitea.

 

I taimi o le faafiafiaga e 'ese'ese Sinoti na latou saunia le Pese Samoa, faaevagelia, e mananaia 'ese'ese faafiafiaga na sauni e autalavou o Sinoti e sefululima. Sa valaaulia foi ma le Sinoti Samoa mai i Niu Sila e i ai i le lotu Pacific Islands Church (PIC), na fai meaalofa i le Ekalesia Metotisi i Samoa, e tusa ai ma le latou valauliaina.

 

Sa i ai foi nisi e tupuga mai i le ulua'i Peresitene palagi lea na muamua tofi i le Ekalesia Metotisi i Samoa, o i'i foi ma faamanatuina ai Peresitene e tofafa mai i tia sa, atoa ai ma Peresitene o loo soifua mai nei e i ai le afioga i le Peresitene o Aisoli Iuli, Afereti Samuelu, Tupu Folasa.

 

Ua faaagaaga le susuga i le Failautusi i Apineru Talai mo le tofi o le peresitene pea a uma le tausaga lenei o le peresitene, ona susu ane lea o le Sea ia Faulalo Ieti, i le nofoaga o le Failautusi pe'a malolo le Peresitene.

 

O le afioga a Faulalo Ieti o se tama fanau a le Sinoti o Amerika Samoa, o ia o se sui o le Matagaluega mai Nu'uuli, ua loa foi ona nofo i le tofiga Faifeau.

 

Na faataunuuina i le aso Tofi i le fono le palotaina o le Komiti Tumau (Standing Committee), o le Komiti lenei e taua tele lava i le faagasologa o mea e fai a le Ekalesia. A o'o ina i ai se mea e fia faia o le Ekalesia, ona logo mai lea o le Fono o le Komiti Tumau.

 

O se faataitaiga - afai e finagalo le Peresitene e fa'atauina le fanau, pisinisi ma mea e finagalo ai le Ekalesia, o le Komiti Tumau e maua mai ai le faia ma le faataunuuina, e sasa'a i ai le tofa ma faautuga o le Komiti Tumau.

 

Ma na palotaina le Komiti Tumau i le aso Tofi, ma e sili ai le Sinoti a Amerika Samoa i e maua a latou tulaga e ala i le palotaga, e i ai i latou nei o Meleisea Saulo, Marie Tauanuu Ripley, Vui Florence Saulo, Mata'utia Liuliu Mailo, ma Matthew Tuia.

 

Na taape le fono i le aso Sa, ina ua faalauiloa mai nu'u ma lala o le Ekalesia o le a o i ai lea Faifeau tausi nu'u ina ua atoa le fitu tausaga i lea Matagaluega, pe o ai foi Faifeau ua malolo manumalo mai ua atoa le 70 tausaga le soifua. Ia ma fesitia ai foi Faifeau faigaluega i totonu i Ofisa o le Ekalesia i lala 'ese'ese a le Ekalesia.