Ua fa’amanuiaina le talosaga a le Inter Island Airways, le Kamupani Va’alele na afua atu i Amerika Samoa nei, i lana talosaga mo le fia femalaga’i i le va o Apia -Samoa ma Nausori Airport i Suva, Fiti. Ua fa’ailoa mai le aso e mafai ai ona amatalia nei femalaga’iga o le aso 10 Aukuso, 2012.

O se tala fiafia mo le Kamupani Va’alele lea, aua ua le gata i le va o nausori Airport ma Apia, ae ua mafai fo’i ona femalaga’i i le va o Nausori ma Nadi Airport, le malae va’alele lea fa’avaomalo a le malo o Fiti.

“O lona uiga, ua fa’aopoopo se isi malo e gafatia ona femalaga’i ai le Inter Island Airways ma o se si’itaga fo’i lea o le latou taumafaiga e tautua o tatou tagata, ae maise o malo tuaoi mai ia Samoa atoa.” O se tala fiafia lea a le susuga Barney Sene, le Peresetene ma o le CEO fo’i lea o lenei kamupani va’alele.

O lea ua fa’ailoa mai o le a femalaga’i lea Kamupani va’alele i le va o atumotu o Fiti ma Samoa i le igoa “Inater Island Airways Fiji Limited.”

Ua fa’ailoa mai fo’i sa le faigofie le tele o mea e ao ina mataituina mo lenei talosaga e faimalaga le va’alele lea i le va o Fiti i ona atumotu, fa’apea fo’i ma le va ma Samoa na lua, peita’i, e fa’afetaia le galulue malosi ma le fa’amaoni o i latou sa fa’atautaia nei mana’oga uma, ma ua i’u ai i le fa’amanuiaina o le talosaga.

E lua fo’i kamupani va’alele a Fiti lava latou o i ai, fa’atasi ai ma le latou kamupani va’alele tele o le Pacific Sun lea e fa’atautaia feoa’iga i le ea i lea malo, ae fa’afetai ua talia le talosaga a le Inter Island Airways mai Samoa.

O le tala mai, sa tele na’ua le sapaia o lenei mau ma le talosaga fo’i a le Inter Island Airways e le vasega o faletalimalo, Ofisa o Femalaga’iga, Ofisa Feso’ota’i o Malaga, Aufaipisinisi fa’atasi ai ma tagatanu’u o Labasa, Savusavu ma Taveuni o le itu i matu o Fiti, lea ua mafua ai ona agava’a le talosaga a le Inater Island Airways mo le tautuaina o i latou nei.

E mautinoa e le o faigofie fo’i la le suiga tele o le a fa’ae’e i le kamupani va’alele lenei ina ia gafatia lea tautua, e ao ina sauniuni lelei mo le si’itaga o le aofa’i o tagata faigaluega, le aotelega o nofoaga e fa’amautu i ai Ofisa e tautuaina ai le mamalu fegasoloa’i, ae maise o le ituaiga o va’alele ua mae’a fa’ailoa e fa’aaogaina e le Inter Island Airways mo a latou femalaga’iga nei.

 E ese mai lea, ae o le sauniga fo’i o nofoaga fa’apitoa mo va’alele i le malaeva’alele tele i Nausori, e mo’omia ona fa’atele ma ia fa’a’au’upegaina mo galuega patino mo le siakiga o va’alele ma toe faaleleia o ni totoga e mana’omia ona faia. O nei mea uma, au fa’ailoa mai e le susuga le Peresetene CEO, “Ua mae’a taga’i i ai le Inter Island Airways, ae le’i fa’auluina le talosaga ua fa’amanuiaina nei.”

O le tala mai i le taimi na iloiloina ai le talosaga ele Fijia Air Transport Licensing Board, “Sa leai se faigata o le taliaina o le talosaga, ae sa latou taga’i toto’a i mea uma e mua’i fa’atautaia, a’o le’i amatalia femalaga’iga i le va o tatou malo na lua ma Suva Fiti po’o le isi 6 masina o lumana’i nei.”

I le laisene ua toina mai nei ua mafai ona femalaga’i ai le tatou va’alele i le va o motu o Fiti aofia ai ma le va ma le malaeva’alele fa’avaomalo a Fiti i Nadi - Suva - Nadi. O le taimi nei ua amatalia la galuega tetele nei e ao ina mua’i fa’ataunu’uina e le Inter Island Airways e o’o i le auina mai o le latou va’alele tele nai lo va’a o i ai i le taimi nei, ona amatalia lea o femalaga’iga i le ono masina o lumana’i. O le malae va’alele i Nausori, o le nofoaga autu lea mo Ofisa uma o le Inter Island Airways Fiji Limited, ma o le tele fo’i o lea o galuega e ao ina fa’amuamua, o lea lava nofoaga mo a latou tautua feso’ota’i uma.

saunia: Leua Aiono Frost