Ads by Google Ads by Google

Ioe se ali’i i lona faia uiga mataga teineititi 9 tausaga

O le ali’i e 29 tausaga le matua mai Samoa lea na tu’uaia e le malo i lona faia o uiga mataga i se teineititi e 9 tausaga le matua, ua ia ta’utino i luma o le fa’amasinoga maualuga i le taeao ananafi, e fa’amaonia tu’uaiga uma sa faia fa’asaga ia te ia, i lona tagofia lea o itutinosa o le teineititi na a’afia ina ia fa’amalie ai lagona tu’inanau na tutupu a’e i lona loto.

 

Na ulua’i tu’uaia e le malo le ali’i o Albert Liu Fa’apu’e i moliaga mamafa e tolu o lona faia lea o uiga mataga i se teineititi e i lalo o le 12 tausaga le matua; faia o amioga fa’asotoma i fanau laiti; atoa ai ma lona tagofia o itutinosa o se teineititi e talavou i lalo o le tulafono, atoa ai ma le moliaga mama o lona faia lea o ni gaioiga e ono lamatia ai le saogalemu o fanau laiti.

 

Ae i lalo o le maliliega lea na sainia e Fa’apu’e ma le malo, lea fo’i ua talia e le fa’amasinoga maualuga, ua ia tali ioe ai i moliaga mamafa e lua o lona faia o amioga fa’asotoma atoa ai ma lona tagofia o itutinosa o se teineitiiti e i lalo o le 12 tausaga le matua, ae solofua isi moliaga.

 

I le tali ioe ai o Fa’apu’e i moliaga e pei ona ta’usala ai o ia, sa ia ta’utino ai e fa’apea, i se taimi o le aso 28 Tesema 2014, sa ia fa’atinoina ai le solitulafono e pei ona ta’usala ai o ia.

 

Na taua e le ua molia e fa’apea, i se taimi o le aso e pei ona taua i le maliliega ina ua mae’a sa latou inugapia sa faia ma ni isi o ana uo, na savali ai loa i le auala mo le toe fo’i atu i lo latou fale.

 

E tusa ai o fa’amaumauga a le fa’amasinoga, o Fa’apu’e e nofo i le fale o le aiga o lo o i tua atu o le fale o le teineititi na a’afia.

 

A o ia savali e aga’i atu i le fale e pei ona taua e Fa’apu’e i le latou maliliega ma le malo, sa tau atu lana vaai i le teineititi na a’afia o lo o moe mai i totonu o le latou fale, ma sa ese ai ni lagona na tutupu a’e i lona mafaufau i lea taimi, ma ua ia mana’o fo’i e faia ni gaioiga e fa’ataunu’u ai ona lagona tu’inanau ua oso a’e i lea taimi.

 

Na taua e Fa’apu’e lona le toe fa’atali, ae ua savali sa’o atu loa ma alu i totonu o le fale o le teineititi na a’afia, ma aga’i atu ai i le vaega tonu o lo o moe mai ai o ia, ma ia fa’ataunu’u ai loa lagona o lo o i lona loto e ala i lona fa’aaoga o ona lima e tagofia ai itutinosa o le teineitiiti na a’afia.

 

Na taua i fa’amaumauga a le fa’amasinoga e fa’apea, na fa’ateia le teineititi na a’afia ina ua ia fa’alogoina se tagata ua tago atu i ona itutinosa, o lea na ala ai loa i luga i lona fia iloa po o ai, ae na te’i ina ua ala a’e i luga, sa ia vaaia ai Fa’apu’e o lo o ia faia uiga mataga ia te ia, ma e le i toe fa’atali i le taimi lea, ae ua pasasa ai loa ma lana a’a i le manava, fa’apea ai ma lona aapa atu ua fela’u ona mata, ma tu ai loa le ua molia i luga ma savali aga’i i tua o le latou fale, ae o le taimi fo’i lea ua ia valaau ai i lona tina e ta’u i ai le mea ua tupu.

 

Na taua e le ua molia i luma o le fa’amasinoga, o lana gaioiga sa faia i lea aso sal e tusa lea ma ala o le tulafono, sa ia faia fo’i ia uiga e aunoa ma le malie i ai o le teineititi na a’afia.

 

O lo o taofia pea Fa’apu’e i le toese i Tafuna ina ua le mafai ona ia totogi le $50,000 sa fa’atulaga e tatala ai o ia, e fa’atali ai le aso 1 Me 2015 lea ua fa’atulaga e lau ai lona fa’asalaga.

 

Na fa’ailoa e Fa’apu’e i le fa’amasinoga, o ia sa fa’au’u mai i le Kolisi a St. Joseph i Samoa i le Vasega 12.