Na fa’ailoa e le ali’i fa’amasino sili ia Michael Kruse i le vaiaso nei, e le toe fia ma’imauina se taimi o le fa’amasinoga e iloilo ai ni talosaga e fa’avae i luga o ni talosaga vaivai, ina ne’i toe fa’aluaina le isi fo’i mataupu sa tigaina ai le fa’amasinoga e iloilo ae emo ane le ata e leai sona taunuuga.

O le saunoaga lea a Kruse na tuuina atu i le ali’i loia ia Joel Shiver, i le taimi na iloilo ai e le fa’amasinoga maualuga se talosaga na fa’aulu e Shiver mo le ali’i pagota o Fa’atui Fitiao, mo se avanoa e tatala ai o ia i tua e faigaluega i le Aoga Tulaga Muamua a Pava’ia’i, le galuega sa galua ai mo le lata i le 10 tausaga a o le’i taofia o ia i le falepuipui ona o le mataupu e pei ona fa’asala ai o ia e le fa’amasinoga.

Na ta’usala e le fa’amasinoga Fitiao i le moliaga o le umia faasolitulafono o mariuana, atoa ai ma le ave ta’avale ‘ona, ma faasala ai loa o ia i le toese mo le 20 masina, o se tasi lea o tuutuuga o lana nofovaavaaia e 5 tausaga i lalo o tuutuuga a le fa’amasinoga.

O se tasi o tuutuuga a le fa’amasinoga mo Fitiao, o le mafai lea ona ia talosaga i le faamasinoga mo se faatanaga e tatala ai o ia i tua e faigaluega ma toe fo’i i totonu o le toese, pe afai na te fa’amaonia mo’i atu i le fa’amasinoga ua i ai se galuega tumau o le a ia galue ai.

Na taua e lana loia i luma o le faamasinoga i le vaiaso nei e faapea, ua ia taulimaina se tusi mai le Puleaoga a Pava’ia’i, e fa’ailoa mai ai lona mana’o e toe faa faigaluega Fitiao o se ali’i na te teuina meatotino a le aoga (Custodian).

Na taua fo’i e Shiver i le fa’amasinoga, e ova ma le 8 tausaga o galue faamalosi Fitiao i le aoga a Pava’ia’i, ma o ia o se tagata faigaluega ua fa’atuatuaina i lana galuega.

Na fesili Kruse ia Shiver pe i ai se faamaoniga e iloa ai ua talia Fitiao e toe galue i lana galuega, ae na tali le alii loia, o lo o ia te ia se tusi na avatu e le Puleaoga a Pava’ia’i e fa’amaonia ai lona naunau e toe fa’a faigaluega Fitiao, o se tali e le i nofo lelei i le finagalo o le ali’i fa’amasino sili.

Na taua e Kruse e fa’apea, sa i ai fo’i se isi mataupu faapenei na iloilo e le fa’amasinoga i se taimi e le i mamao atu, ona o se ali’i sa nofovaavaaia na mana’o se foma’i mai le falema’i o le LBJ e fa’a faigaluega, e aunoa ma le iloa e le Matagaluega o Tagata Faigaluega a le malo.

“E tele se taimi o le fa’amasinoga na fa’aalu i le tau iloiloina o lea mataupu, ae maua mulimuli ane le tala, o le Matagaluega o Tagata Faigaluega a le malo latou te faa faigaluegaina tagata faigaluega i le malo, ae le o le foma’i o le LBJ”, o se vaega lea o le saunoaga a Kruse, ma ia poloaina ai loa Shiver ina ia aumai ni isi mau maumaututu ma faamaonia e lagolago le talosaga a Fitiao.

“Pau le tulaga lea ua silafia e le faamasinoga, e na o le Matagaluega o Tagata Faigaluega latou te fa’a faigaluegaina tagata, ae afai e te finagalo e sui le tulafono, ona fai lea o se suiga ae ave le malosi i le Puleaoga latou te fa’ataga le fa’a faigaluegaina o tagata i le malo”, o le saunoaga fa’ai’u lea a Kruse.