E leai se kopi o le “Look Out List” na maua e sui o le Fa’amasinoga i le taeao o le Aso Tofi, ina ua poloa’i e le Fa’amasino Sili le Masela o le Fa’amasinoga e alu e aumai se kopi o le Lisi mai le Ofisa o Femalagaaiga.

Na taua e le ‘“IT Administrator” a le Fa’amasinoga ia Loli Ma’o i le taimi na fa’atauto ai o ia mo lana molimau, o le fa’amatalaga na tu’u ane e le alii faigaluega a le Ofisa o Femalagaaiga sa latou talanoa, e le mafai e se isi o le Ofisa ona fai se kopi o le Lisi, se’i vagana ai le ali’i o loo vaaia le “Computer System” a le Ofisa o loo malaga i fafo, le susuga a Lawrence Apo.

I le ogatotonu o le fetaliaiga i le va o le Fa’amasino Sili ia Michael Kruse ma le Pulesili le Tumau o le Ofisa o Femalagaaiga ia Fagamalama Fualaau i le taeao ananafi, na fesili ai loa Kruse ia Fagamalama poo ai tagata ia ua mafai ona latou tatala fa’amaumauga o le Lisi, ae na tali Fualaau, e na o le to’alua tagata e mafai ona laua tatalaina le lisi, ae ina ua ia fa’ailoa i le fa’amasinoga o la suafa, na atagia mai ai, e le to’alua ae to’afa igoa sa ia fa’ailoa i le fa’amasinoga.

“E maua la se kopi o le Lisi i le taimi lenei,” o le fesili lea a Kruse ia Fualaau, ae a tali Fualaau, “Ioe, e maua.”

O le tali lea a Fualaau na poloa’i ai loa e Kruse le malolo o le fa’amasinoga mo sina taimi puupuu, ae se’i alu le Masela e aumai se kopi o le lisi e silasila i ai le fa’amasinoga.

E talitonu le Samoa News, sa fesoota’i sui o le Ofisa o Femalagaaiga sa i ai i le Fa’amasinoga i le Ofisa autu, ina ia tapena se kopi o le lisi mo sui o le Fa’amasinoga lea ua o atu e piki mai.

O le ali’i Masela ia Maua Tupua ma le tama’ita’i ia Ma’o na malaga e aami le kopi o le Lisi, ae ina ua toe taliu mai, o Ma’o na fa’atauto mo le tuuina atu o le ripoti e fa’atatau i le lisi na poloa’i e le fa’amasinoga e aumai.

Na taua e Ma’o i lana molimau e fa’apea, ina ua mae’a ona la talanoa ma le ali’i o loo fa’auluulu i ai le Vaega Suesue (Investigation Section) a le Ofisa o Femalagaaiga ia Nofoa Leota, sa fa’atonu loa e Leota le isi ali’i o le aufaigaluega e lolomi mai se kopi o le Lisi o loo mana’omia e le Fa’amasinoga.

“Pe tusa ma le 5 minute o taumafai le ali’i lea e lolomi se kopi o le Lisi e le mafai, ona ia fa’asaga mai lea ia maua ma le Masela ma fai mai, e le mafai ona lolomi se kopi,” o le molimau lea a Ma’o.

Na fesili Kruse ia Ma’o poo ai le igoa o le alii Ofisa o Femalagaaiga sa taumafai e lolomi le kopi o le Lisi, ae a tali Ma’o, “O Sam Paulo.”

Ae ina ua toe fesiligia Ma’o e Kruse pe aisea na le mafai ai e Paulo ona lolomi se kopi o le isi ae tali le molimau, “Fai mai e na o Ken lava e mafai ona ia lolomia le kopi o le Lisi, ae ina ua ou fesili i ai poo ai Ken, ae fai mai o Ken Dalle.”

O susuga Dalle, lea fo’i sa i ai i totonu o le potu fa’amasino i le taimi lea, o ia o le “IT Manager” mo le Ofisa o le Loia Sili.

“Na maua mai la se kopi o le Lisi,” o le fesili lea a Kruse, ae na tali Ma’o, “E leai.”

Ina ua toe fesiligia e Kruse ia Fualaau i luga o le nofoa molimau poo ai sa’o le tagata e mafai ona ia lolomia le kopi o le Lisi, ae ma tali Fualaau, e na o Apo e mafai ona ia lolomia le kopi o le Lisi.

“O ai la lea ua pepelo i le fa’amasinoga,” o le fesili lea a Kruse ia Fualaau ma lona si’ufofoga ua si’isi’i i luga.

“O lea sa e fai mai i lau molimau e to’afa tagata e mafai ona latou faia suiga i luga o le lisi ma vaavaai i le Lisi, a’o lea foi ua e toe fai mai e na o Apo e mafai ona faia le kopi o le Lisi, lona uiga o lea ua toe sui lau molimau,” o le fesili lea a Kruse ia Fualaau, ae na tali Fualaau i lona si’ufofoga malu, “O lea lava e sa’o la’u molimau lau afioga, ou te le o pepelo fo’i.”