Na fa’ailoa e le afioga i le ali’i fa’amasino ia Michael Kruse i le loia a le malo ia Tiffany Oldfield i le vaiaso nei, afai o lo o su’e e tagata faigaluega a le Falepuipui i Tafuna tagata uma o lo o ulufale atu i totonu o le toese atoa ai ma a latou meatotino e pei o ato ma afifi o lo o avatu i aiga o lo o taofia i le falepuipui, e tatau fo’i ona saili uma ma tagata faigaluega a le TCF.

“E le fou le mataupu lenei i le toese i Tafuna, ma ua tatau fo’i ona amanaia le manatu sa avatu muamua e le fa’amasinoga i isi mataupu ua tuana’i atu, ina ia saili fo’i ma tagata faigaluega a le falepuipui”, o le saunoaga lea a Kruse i le taimi na lau ai le fa’asalaga a le alii o Nathan Mauga, lea na ta’usala i lona umia faasolitulafono o vaega o le laau faasaina o le mariuana ao taofia ai o ia i le toese.

Na fa’ailoa e le tama’ita’i loia na tula’i mo le malo ia Oldfield e fa’apea, o lo o fa’atino e le aufaigaluega a le toese i Tafuna la latou pito laau, ina ia mautinoa e le toe tula’i mai ni isi fa’afitauli fa’apenei i le lumana’i.

“Ae fa’afepea tagata o lo o ulufale atu i le toese, o i ai se faiga ina ia mautinoa e tulimata’i le itu lena”, o le fesili lea a Kruse ia Oldfield, ae na toe tali le tama’ita’i loia, so o se tagata lava e ulufale i le toese, e le gata e saili lona tino ae saili uma foi ma ana meatotino e alu atu ma ia, ina ia mautinoa e le toe tulai mai lava se isi faaletonu i le lumanai.

E le o se taimi muamua lenei ua fesiligia ai e le fa’amasinoga le mataupu e fa’atatau i tagata o lo o ulufale atu i le toese e asi aiga o lo o taofia ai, atoa ai ma faamomoli ma afifi o lo o avatu i totonu o le toese, aemaise lava i taimi e taulima ai e le fa’amasinoga ni mataupu e fa’atatau i ni fualaau fa’asaina na faaulufale faasolitulafono e se tagata i totonu o le toese.

Mo se faataitaiga o le mataupu a Mauga, lea na maua i ai e se leoleo o le toese i Tafuna se afifi o lo o ia te ia, ina ua fa’ataga e le leoleo Mauga e alu e piki mai lona solo sa tautau i le uaea i le isi itu o le lotoa a le toese, ae na avea le fiu o le leoleo e fa’atali le taimi e toe foi atu ai Mauga ma itu na mulimuli atu ai loa, ma maua atu ai le ua molia o lo o taumafai e taai se sikaleti mariuana mai se afifi o lo o i ai lau mamago o le mariuana.

E le o se taimi muamua lenei ua tula’i mai ai le faafitauli lenei i le toese, o le maua i ai o vaega o fualaau faasaina, atoa ai ma isi mataupu i le maua lea e tagata faigaluega a le toese o ni fualaau faasaina e taumafai ni isi e faaulufale i totonu o le toese.

O le mataupu fou lea na tulai mai i le vaiaso na te’a nei, o se tina na taumafai e faaulufale fa’amalosi se afifi pepa fasimoli, ae maua ai e leoleo o le falepuipui i totonu o le afifi fasimoli ni ‘straw’ se lua e tau fai tipi tulimanu, o lo o i ai vaega o le pauta fa’asaina o le aisa, lea sa fa’amoemoe e ave i lona to’alua o lo o taofia i le falepuipui, le ali’i o Samuel Wright.

Ua molia nei e le malo le fafine i lona umia fa’asolitulafono o vaega o le pauta faasaina o le aisa, atoa ai ma lona umia fa’asolitulafono ma le fa’amoemoe e tulei pe fa’atau atu i isi tagata, ae o lona to’alua o Wright, o lo o taofia pea i le itu o pagota ali’i, e fa’atali ai taualumaga o lana mataupu, ona o tu’uaiga i lo latou osofaia lea ma ni isi ali’i le faleoloa o le Gold Gonda i Fagaalu i le masina o Me na te’a nei, ma fa’alala ai se fanau i le fa’atau oloa ae fao fa’amalosi e le isi ali’i sa latou i ai i le osofaiaga se tama’i pusa sa i ai se tinoitupe sa i lalo o le laulau o le masini tupe.

A o le i molia e le malo ia Wright i le mataupu fou e pei ona taofia ai o i le toese i Tafuna, sa fa’a falepuipui muamua o ia e le fa’amasinoga maualuga, ina ua ta’usala o ia i lona umia fa’asolitulafono o vaega o le pauta fa’asaina o le aisa ma le fa’amoemoe e tulei ma fa’atau atu i isi tagata.

O le amataga o le tausaga nei na molia ai e le malo se isi tina talavou, ina ua masalomia lona taumafai e ave fa’amalosi ni vaega o le laau faasaina o le mariuana, i lona to’alua lea o lo o tuli sona fa’asalaga fa’a falepuipui i totonu o le toese, ina ua ta’usala o ia i lona umia fa’asolitulafono o vaega o fualaau faasaina o le aisa ma le mariuana.

E to’alua isi pagota sa tuli a laua fa’asalaga i le toese i Tafuna i le tausaga na te’a nei ua toe molia i lo la umia fa’asolitulafono o vaega o le laau faasaina o le mariuana, ina ua maua i laua e leoleo o le toese o la taumafai e ave fa’anana ni sikaleti mariuana i totonu o le falepuipui.

O i laua uma nei e pei ona taua i fa’amaumauga a le fa’amasinoga, sa tatala i tua e faigaluega ma toe fo/i atu i totonu o le toese mo le tuli fa’amae’aina o a laua fa’asalaga, ae la taumafai ai loa e ave fa’anana mariuana i totonu.

I le silasila a le fa’amasinoga maualuga, o se tasi o auala o lo o mafua ai ona sao fualaau fa’asaina atoa ai ma isi lava mea i totonu o le toese ae le tatau ona i ai, o asiga a aiga a ali’i ma tama’ita’i pagota o lo o faia i fa’aiuga o vaiaso ta’itasi.

I le amataga o le tausaga nei, sa fautuaina malosi ai e le afioga i le ali’i fa’amasino ia Kruse le itu a le malo, ina ia toe silasila toto’a i le polokalame lea e fa’ataga ai asiga mo pagota, ona o le isi lena auala ua maitauina e le fa’amasinoga o lo o mafua ai ona sao fualaau faasaina i totonu o le toese.

E le gata i fualaau fa’asaina o lo o atugalu i ai le finagalo o le fa’amasinoga, ae fa’apena foi i ni isi o mea e le tatau ona i ai ae ua maua ai i totonu, e pei o telefoni, laptop atoa ai mea ma e ono faaaoga e pagota e fai ma a’upega e osofa’i ai isi pagota, e pei o se tasi o fa’alavelave lea na fa’aaoga ai e se ali’i pagota se a’upega maai e tui ai le manava o le isi ali’i pagota, e mafua mai ina ua tula’i mai se feeseeseaiga i lo la va.