Na fa’ai’u lava saunoaga a le afioga i le fa’amasino sili i lona fa’apea atu i le ali’i na molia o Joe Togitogi, “aua ete toe solitulafono ua tiga mata o le fa’amasinoga ia te oe.”

Saunoa le alii faamasino sili ia Michael Kruse, e le fou le igoa o Togitogi i faamaumauga a le faamasinoga faaitumalo, talu mai lava le taimi a’o laititi o ia i lalo o le tulafono seia oo mai le taimi ua avea ai o ia ma tagata matua.

O Togitogi na ulua’i molia e le malo i le mataupu lea na ia taumafai ai e osofa’i se tamaloa e leai sona aiga e nofo ai, ae nofo nofo lava i tafatafa o le auala i Nuuuli, e latalata i le fale o le ua molia.

O gaioiga na faia e Togitogi i le tagata lea e aofia ai lona faaaogaina o se naifi e faafefe ai o ia, ma fai i ai ni folafolaga tau faamata’u fai mai, e i ai le taimi e toe fo’i atu ai e fasioti o ia ae o le a ia tuuaia i lona uso o ia na fasiotia o ia.

Na taua e le tama a le alii ua molia i le vaiaso na te’a nei i luma o le faamasinoga, talu lava ona taofia lona atalii i le toese, ua leai se isi e fesoasoani i le fesiita’iina o ia i mea e manao e fia alu i ai, ona o ia e alu i le nofoa faataavalevale (wheelchair), e le lelei ona vae (tulou).

O aso uma talu ona loka Togitogi e pei ona taua e lona tama, e gafa ai lava le tina o le aiga ma le fesiita’iina o ia, ma ua avea lea ma itu ua amata ai ona oo ma’i i le tina o le aiga ona o le mamafa o lona tino.

O iina na auala atu ai le talosaga a le tama i le faamasinoga, mo se avanoa sei toe foi atu ai Togitogi i le aiga e tausi o ia ma fesoasoani i lona tina, ma o lea talosaga na iloilo toto’a e le faamasinoga, ma faia ai loa la latou faaiuga i le taeao ananafi, ua lava le umi lea ua maea ona tuli e Togitogi i le toese e fai ma ona faasalaga i lenei mataupu, ae o le a tatala o ia i tua e alu e saili sana galuega ma fai se isi mea aoga mo lona olaga.

E 5 tausaga na manatu le faamasinoga e loka moi ai le ua molia i le toese i Tafuna, peitai o le a faamalumalu lona tuliina o lea faasalaga, ae o le a nofovaavaaia o ia mo tausaga e 5 i lalo o poloaiga a le faamasinoga.

O ni isi o ia poloaiga e aofia ai lona tuliina o masina e 20 i le toese i Tafuna, peitai, o le a lava na o masina e 7 na te tuliina, ae o le isi 14 masina o lo o totoe o le a faatoa tuli i se isi taimi e poloa’i atu e le fa’amasinoga.

Na taua e le loia a Togitogi o Joel Shiver i le faamasinoga, ua atoa nei le 268 aso talu ona loka Togitogi i le toese, lona uiga, ua ova ma le 8 masina talu ona taofia o ia i Tafuna.

Ua poloaina foi e le faamasinoga le ua molia na te faatinoina galuega lelei mo le atunuu i le umi e 300 itula, i lalo o le vaavaaiga a le ofisa nofovaavaaia, a mae’a ona ia faatinoina ia galuega, ona tuu atu loa lea o le 90 aso e saili ai sana galuega tumau e tausi ai ona matua ma saili ai se lumanai lelei mo ia.

Na faatoese le ua molia i le faamasinoga e tusa ai o lana solitulafono sa fai, ma ia tautino ai e faapea, e le toe tulai lava i luma o le faamasinoga i le lumanai.

I le faaiuga o lana mataupu, na faailoa i ai e Kruse e faapea, “aua ete toe solitulafono, matou te le toe fia vaai fo’i ia te oe i totonu o le fale faamasino lenei, ua tiga mata o le faamasinoga ia te oe.”