O tupe ia na maua mai e le “molimau #1” a le malo mai ali’i e to’alua sa latou feusua’i i taimi a o avea o ia ma tagata faigaluega i le Fale Kalapu o le ‘Karaoke Bar’ i Satala, sa ia fa’aaoga tatau e fa’atau ai ana lavalava ma meaai, ae o isi fo’i taimi na te lafo ai se vaega o lea tupe i lona aiga i Samoa, e pei ona ia taua i ana tali i le taimi na fesiligia ai o ia e le ali’i loia ia Fiti Sunia, lea o lo o tula’i mo Fa’asaina Park.

O le taeao ananafi na toe fa’aauau ai le molimau a le tama’ita’i o “I.M”, 36 tausaga mai Samoa i le fa’amasinoga iloilo fa’asaga ia Park, o ia lea o le pule o le Karaoke Bar, ma le tama’ita’i sa faigaluega ai o Lusia Tusi po o Sheila e pei ona iloa ai e le to’atele, ona o tuuaiga i lo la taumafai lea e faamalosi tamaitai faigaluega e fa’atino gaioiga faatalitane faasaga i alii e masani ona tafafao atu i le Fale Kalapu i se taimi o le 2013.

Na toe fa’atepa e Sunia le molimau i lana fa’amatalaga tusitusia sa tuuina atu i leoleo i le aso 30 Aperila 2013, lea sa ia taua ai i se vaega o lea fa’amatalaga, e leai ma se tasi o i latou na usita’i i le fa’atonuga a Park e fa’atosina ali’i o lo o autova’a atu e tafafao i le fale kalapu.

Na taua e le molimau ina ua fesiligia o ia e le loia a le malo, pau le mea e masani ona ia faia i alii e tafafao atu i le fale kalapu, “o lona kisi lea i ai”, sa ia taua fo’i e fa’apea, “e na o le to’alua lava ali’i” e masani ona ia kisi i ai, o le ali’i o “N” ma le ali’i o “S”, o i laua fo’i o ana uo tama i na vai taimi.

I masina e 14 na galue ai le molimau i le fale kalapu i Satala e pei ona ia taua i lana molimau, e le i fa’atasi ona ia fesili ia Park i taimi na te manaomia ai se tupe.

Na fesili Sunia i le molimau pe sa i ai la se isi auala na ia uia ina ia mafai ai ona ia maua se tupe, na tali le molimau, sa faila sana talosaga i le Ofisa o Leoleo ma talanoa ai ma le leoleo e igoa ia “Penitusi”, ma fautua atu ai loa le leoleo lea ia te ia, e onosa’i se’i tu’u atu muamua le mataupu i luma o le fa’amasinoga.

Na toe fesili Sunia i le molimau, pe sa ia faila sana tagi i Hawaii fa’asaga ia Park ina ia mafai ai ona ia maua se tupe, na tali le molimau, “ioe”, na mafua ona ia faila lea talosaga, ona sa fautua atu ni tagata faigaluega se to’alua a le “Social Service” e fai le tulaga lea, ma mafua ai loa ona ia fai i le isi tamaitai sa la to’alua la te tutu fa’atasi e faila le la tagi fa’asaga ia Park, e tu’uaia ai o ia i mea uma nei ae maua ai se la tupe.

Ina ua fesiligia le loia i le latou mafutaga ma ni ali’i se to’alua i le Karaoke Bar, na faamaonia ai e le molimau le i ai o se mafutaga tau feusuaiga i le va o ia ma ali’i ia e to’alua o “N” ma “S”, o ni ali’i fagota uma, e eseese uma fo’i taimi latou te feusua’i ai ma ali’i nei, ae o le tele o taimi o nei feusuaiga, e totogi atu ai e i laua nei tupe ta’i $50 pe $60 i le po mo lea mafutaga, ae a o o loa i le taimi e sauni ai va’a fagota a alii nei e toe fo’i atu i le sami e fagogota, ona avatu lea e i laua nei tupe ta’i $300 pe $400 fo’i, e fa’atau ai mea e mana’o ai ao toesea i laua, ma o se vaega o ia tupe na te lafo i lona aiga i Samoa.

Na fesili le loia a Sheila ia Joel Shiver i le molimau, pe o lona lava loto fuatiaifo na mafua ai ona amata le latou mafutaga ma “N” ma “S”, ae na tali le molimau, o Sheila na fa’atonuina o ia e o ma “N”, ae o isi taimi sei vagana ua fa’ataga mai o ia e Park po o Sheila ona fa’atoa mafai lea ona la momoe ma “S”.

O lo o fa’aauau pea taualumaga o lenei mataupu i luma o le fa’amasinoga maualuga i le taimi nei.